Stad Brussel: Heufdstad van België

't Mak diel uut en is de heufdplaatse van 't Brussels Heufdstedelijk Gewest, waor as nog achttien wiedere gemientes onder vaalt. 't Is mitiene ok de heufdstad van de Vlaamse Gemienschop en van de Fraanse Gemienschop.

In de gemiente Brussel woont zo'n 180.000 lu, waorvan zo'n darde part in de historische Viefhoeke, ongeveer de helfte in de noordelijke uutbreiding van Brussel, in de dielgemientes Laoken, Neder-aover-Heembeke en Haoren, en de reste in de buurten rond de Louizalane, de Ter Kamerenbos (mit mekare de zudelijke uutbreiding) en in de oostelijke uutbreiding, oftewal de Europese buurte.

Gemiente Brussel is naor inwonertal de op viere nao grootste gemiente in België. 't Hiele Brussels Heufdstedelijk Gewest wördt vake ok simpelweg Brussel enuumd; daor woont zo'n 1,2 miljoen lu.

Brussel is kört veur 't jaor 1000 ontstaon mit een burcht op een eilaand in de Zenne. 't Hef deur zien geschiedenis henne de heufdstad ewest van verscheiden politieke gebieden, te begunnen mit 't Hartogdom Braobaant. Brussel was altied een Braobaantstalige stad, mar is in de 19de en 20ste ieuw veur 't lieuwendiel verfraanst.

Brussel is vandage de dag 't administratieve harte van de Europese Unie. Ze nuumt 't daorumme, samen mit 't heufdstedelijke gewest, wal de heufdstad van de EU. De stad is slim internationaal van kerakter; deur 't grote antal inwoners uut Vlaandern, Wallonië en 't butenlaand bint de ginnerationele Brusselaars betuun. Iene die krek as zien beide olders in Brussel geboren en opegruid is, wördt een ketje enuumd. Iene die krek as iene older in Brussel geboren en opegruid is, het een zinneke.

Een paar van de beziensweerdigheden van Brussel bint:

• de Grote Markt van Brussel
• 't Stadhuus van Brussel
• 't Broodhuus, mit daorin 't Museum van de Stad Brussel
• de Beurs
• de toeristische Beenhouwersstraote
• de Munt (Keuninklijke Muntschouwbörg), waor de Belgische Revolutie van 1830 uutbrak
• 't staandbield van Manneken Pis
• 't Atomium, gebouwd veur de Wereldtentoonstelling van 1958
• 't Jubelpark
• de Kattedraal van Sunte-Michiel en Sunte-Goedele
• volksbuurte de Marollen, mit de bekende dagense vlooienmarkt op 't Vossenplein
• 't Keuninklijk Paleis van Brussel mit daorbij 't Park van Brussel
• Stripmuren deur de stad henne, mit ofbieldingen uut Belgische stripverhalen

Dit artikel is eschreven in 't Zuudwest-Drèents.