၁၉၇၄ ရုပ်ရှင် ရွှေကြာ

တရုတ်ဘာသာစကားဖြင့် ကျန်းလျန် (金莲) သည် ရွှေကြာ ဟု အဓိပ္ပာယ်ရရာ ဇာတ်ကားပါ မင်းသမီးကို ရည်ကြောင်း ထင်မှတ်ကြသည်။ သို့သော်လည်း အဓိကရွယ်ရင်းမှာ ထိုခေတ်က ထင်ရှားသည့် သေးငယ်သော ခြေထောက်တစ်စုံကို ညွှန်းခြင်း ဖြစ်သည်။ ခြေဖမိုးခေါက်ကာ စည်းထားသော ခြေတို့ကို ရွှေကြာဟု တင်စား ခေါ်ဝေါ်ကြသည်။ ခေါင်းဆောင်မင်းသမီးသည် အသေးဆုံးဟု ဆိုရမည့် ၂ လက်မ ၉ စိတ်သာ ရှည်သော ခြေထောက်ရှိသဖြင့် သူဌေးဖြစ်သူက သဘောကျရာမှ ဇာတ်လမ်းစခြင်း ဖြစ်သည်။

ဆွန်းမင်းဆက် ဟွေကျုံးဘုရင်လက်ထက် ရှန်တုံးနယ်ရှိ အဖြစ်အပျက်တစ်ခုအဖြစ် ဇာတ်အိမ်တည်ထားသည်။ သူဌေး ရှီမန်ချင်း လမ်းသွားနေစဉ် အိမ်ပြတင်းရွက် တင်ရင်း တုတ်ပြုတ်ကျရာမှ ရှီမင်ချင်းနှင့် ဖန်ကျင်းလျန် ဆုံကြသည်။ သူဌေးရှီက ကျန်းလျန်အား မျက်စိကျသွားသည်။ ကျန်းလျန်မှာ မုန့်ရောင်းသည့် ဝူတလုံ၏ ဇနီးဖြစ်သည်။ သူဌေးရှီမှာလည်း လူလွတ်မဟုတ်။ မယားကြီးအပါအဝင် မယား (၄) ယောက် ရှိသည်။

ဘေးအိမ် လက်ဖက်ရည်ဆိုင်မှ မုဆိုးမဝမ်၏ အကျိုးဆောင်မှုကြောင့် သူဌေးရှီနှင့် ကျန်းလျန်တို့ ငြိစွန်းသွားကြသည်။ သစ်သီးရောင်းသော ယွမ်မှာ ထိုအဖြစ်အပျက်ကို အဆုံးသတ်စေလို၍ ဝူတလုံအား သတင်းပေးသည်။ ကျန်းလျန်တို့နှစ်ဦး အတူရှိစဉ် အမိဖမ်းရန်ကြံသော်လည်း လူကောင်ချင်းကွာ၍ ဝူတလုံ ခံလိုက်ရသည်။ ဖော်ကောင်ယွမ်ကို ရှီမင်ချင်းက လက်စတုံးလိုက်သည်။

အတွင်းဒဏ်ရာရနေသည့် တလုံကို ကျန်းလျန်က မျက်နှာမမြင်ချင်တော့။ သို့သော် ဝူတလုံညီ ဝူစုန်းမှာ နာမည်ကြီးသိုင်းသမားဖြစ်၍ နောက်ကြောင်းမအေး ဖြစ်နေသည်။ ထို့ကြောင့် တလုံအား လက်စဖျောက်ကာ ကျန်းလျန် မုဆိုးမဖြစ်မှ လက်ထပ်ကြရန် မုဆိုးမဝမ်က အခါပေးသည်။ ဤသို့ဖြင့် သူဌေးရှီက အဆိပ်ဝယ်၊ မုဆိုးမဝမ်က ကျိုကာ ကျန်းလျန်က တိုက်သည်။ သေအံ့မူးမူး၌ မျက်နှာအား စောင်နှင့်အုပ်ရာ ဝူတလုံ သေသည်။ ဝူတလုံသေပြီးနောက် ရှီမင်ချင်းနှင့် လက်ထပ်ပြီး ရှီမင်ချင်း၏ ၅ ယောက်မြောက် မိန်းမ ဖြစ်လာသည်။

တစ်ဖက်အိမ်မှ သူဌေးဟွာကို စီးပွားပျက်ရန် ကြံဆောင်ကာ ဟွာကျီရှု၏ဇနီး လီဖင်းအာနှင့် ရှီမင်ချင်း လက်ထပ်ပြန်သည်။ (၇) လကြာသော် လီဖင်းအာ သားမွေး၍ ရှီမင်ချင်း၏ မျက်နှာသာအပေးဆုံး မိန်းမ ဖြစ်လာသည်။ လီဖင်းအာအား မနှစ်လိုသော ကျန်းလျန်က သေသူ သူဌေးဟွာ ခြောက်လှန့်ရာ စိတ်ချောက်ချား၍ လီဖင်းအာ သေသည်။

ကျန်းလျန်ထံ ခြေဦးပြန်လှည့်လာသော ရှီမင်ချင်းကို အားဆေးသုံး၍ ဆန္ဒဖြည့်ပေးရန် ကျန်းလျန်က ကြံသည်။ အိပ်ရာထက်၌မူ အထွတ်အထိပ်ရောက်ခါနီ: ရှီမင်ချင်း၏ပုံမှာ သေခါနီး မျက်လုံးပြူးမျက်ဆံပြာဖြစ်နေသည့် လင်ဟောင်း ဝူတလုံနှင့် တူ၍ စိတ်လန့်ပြီး ကျန်းလျန်က စောင်နှင့် အတင်းအုပ်သည်။ သို့ဖြင့် ရှီမင်ချင်း သေလေသည်။

ရှီမင်ချင်း သေပြီးနောက် ရှီအိမ်လည်း ပြိုကွဲသွားတော့သည်။

• ရှီမန်ချင်း အဖြစ် ပီတာယန်
• ဖန်ကျင်းလျန် အဖြစ် ဟကျီ
• လီဖင်းအာ အဖြစ် ကျန်းလိ
• လန်ချွမ်းမေ အဖြစ် ချင်းဖျင်

မူရင်းဇာတ်ကားမှ ဆီလျော်စွာ ကောက်နုတ်နိုင်သည့်အတွက် ချီးမွမ်းကြသည်။ ဟကျီ၏ သရုပ်ဆောင်မှုမှာ သဘောကျဖွယ် ဖြစ်သည်။