ညံၚ်ထေရ်အာနန်တံဂှ် ဟိုတ်နူမဒှ်ပူဂဵုမၞုံကဵုဗဟုသုတမဂွံပ္ကၚ်ရၚ်လဝ်ဓုရၜါပ္ဍဲသာသနာဝွံဌာန်ဨတဒဂ္ဂဂှ် ကျာ်ထ္ၜုတ်စွံလဝ်ရ။ ဟိုတ်နူဒှ်ဓမ္မရတ်တုဲ ကုညးမသ္ပပူဇဴ ပူဂဵုမၞုံကဵုဗဟုသုတဂှ် ဒှ်ဂွံသ္ပပူဇဴဓဝ်ရ။ပသာ်သဂွံတီရော− ဒးကာလမွဲတ္ၚဲ သာ်ဝွံဗဗၞးမွဲ ချပ်ရ။ ''ဗုဒ္ဓရတ်ကီု၊သံဃရတ်ကီု၊ဒဒှ်ဗီုဂွံ သ္ပပူဇဴဂှ် ပြာကဋ်တဴရ။ ဓမ္မရတ်မွဲဂှ် ပသာ်ဂွံမဂပ်ဝ်ပူဇဴရော'' ဗဗၞးပြာပ်အာ သၟာန်ကျာ်တြဲရ။ ''ယွံတၠဳပိုည် ဓမ္မရတ်ဂှ် ပသာ်မဂပ်ဝ်ဂွံသ္ပပူဇဴရော'' ''ယွံဗဗၞး တၞဟ်နသ္ပပူဇဴဓမ္မရတ်ဂှ် ယဝ်ရကောန်တၠနွံပၟိက်မ္ဂး ခမဳမပ္ကၚ်ရၚ်လဝ်ဗဟုသုတဂှ် သ္ပပူဇဴညိ'' ကျာ်တြဲသ္ဂးရ။ ''ယွံတၠဳပိုည် ခမဳလဵုမွဲ မပ္ကၚ်ရၚ်လဝ်ဗဟုသုတရောကျာ်'' ဗဗၞးသၟာန်တုဲ ''ယွံဗဗၞး အာသၟာန်ခမဳတံညိ'' ကျာ်ဖအောဝ်ဏာရ။
''ယွံတၠပိုည်သၚ်တံ ခမဳမပ္ကၚ်လဝ် ဗဟုသုတဂှ် ပညုၚ်ထ္ၜးကဵုအဲဍိက်ညိကျာ်'' သာ်ဝွံဗဗၞးသ္ဂးရ။ ''ယွံဗဗၞး ထေရ်အာနန်ဂှ် ဒှ်ပူဂဵုမပ္ကၚ်ရၚ်လဝ်ဗဟုသုတ မဂၠိုၚ်ရ" ခမဳဂမၠိုၚ် သ္ဂးတုဲ ယာတ်သ္ၚာမွဲဂတှ်ေ မၞုံၚ္ၚုဟ်မးထဝ်လ္ၚီကသာပ်ဂှ် ဗဗၞး သ္ပပူဇဴထေရ်အာနန်ရ။
ယြဴပူဂဵုမွဲ အဲသ္ပပူဇဴဓဝ်ရဂးတုဲ ခမဳမပ္ကၚ်ရၚ်လဝ်ဓဝ်ဂှ် နပစ္စယ်ပန် သဂွံကၠောန်ၜိုတ်ဥပကာ၊သဂွံပူဇဴသ္ကာ ညံၚ်ဓဝ်ဂွံတန်တဴ လုကဴကာလမလံ ဂွံသ္ပမ္ဂး ပူဂဵုဂှ် ဒှ်ဂွံသ္ပပူဇဴဓဝ်ရ။
ဓမ္မံ ပူဇေဿာမာတိ ဓမ္မဓာရေ ဘိက္ခူ ပစ္စယေဟိ ဥပဋ္ဌဟန္တော, ပူဇေန္တော, ဓမ္မစိရဋ္ဌိတိကံ ကရောန္တော ဓမ္မေ ဒါနံ ဒဒေန္တိ နာမ ။
ဟိုတ်ဂှ်ရ ဂၠိုၚ်ကဵုလမိၚ်လညာတ်ဂှ် ဒှ်မ္ၚဵုမပြဲ ကျာ်တြဲမဒးတွံစွံပတန်လဝ်ရောၚ်။ တီကေတ်သာ်ဝွံတုဲ ဒဒှ်ဗဟုသုတဂုဏ်ဂှ် တၠပညာတံ ရာဒနာမိက်လဝ်လၟိုန်ညိ။ ယဝ်သဂွံဒှ် ပူဂဵုဗဟုသုတမ္ဂးဓဝ်အကုသဵု မဇိုန်ကဵုဒဒိုခ်ကုညးဂှ် ဂွံစ္ဍးကၠေံရ။ ဓဝ်ကုသဵု မဇိုန်ကဵုတသိုခ်ဂှ် ဂွံဒေပ်လဝ် ပ္ဍဲသန္ထာန်ရ။
ဒ္ဂေတ်မဒးရးဂှ် ဂွံဒ္ဂေတ်လဝ်တုဲ သရဏပိမပြဲဂှ် ဂွံဗိုန်လဝ်ပ္ဍဲသန္ထာန်ရ။
ဓဝ်သဳလ မပတန်လဝ်ဂုဏ်အိုဿီု ညံၚ်တိဇၞော်မပတန်လဝ် ဝတ္ထု၊ ဆုဂြိုပ်ဂၞိၚ်၊မှာသၟိဒ်ကီု၊ ဓဝ်သဳလမဒှ်လ္အိတ်ဂုဏ်ဂှ် ဟိုတ်မၞုံကဵုဗဟုသုတတုဲ မဂွံပတန်လဝ်ရောၚ်။ ဒဒှ်ပူဂဵုဗဟုသုတဂှ် မၞုံကဵုဗွဝ်ဂုဏ်မဂၠိုၚ်ရ။
ကျာ်ဒမျိုၚ်သ္ဂးတုဲ ''ဗဟုသုတော ဗုဒ္ဓေါယေဝ'' ညးမၞုံကဵုဗဟုသုတဂှ် ကျာ်တြဲမွဲဟေၚ်ဂးတုဲ သုတဗုဒ္ဓ ကျာ်ဒမျိုၚ် မဂွံစွံပ္တန် သွက်ဇကုရောၚ်။
ယြဴပူဂဵုမွဲ ဂွံပြာပ်အာဇရေၚ်ပူဂဵု မၞုံကဵုဗဟုသုတ ညးမဂၠိုၚ်မိၚ် ဂၠိုၚ်ညာတ်တုဲ ဂွံမိၚ်ဂလာန်ဓဝ်သုဘာသိုတ်ရ။ ယဝ်ဂွံမိၚ်ဂလာန်ဓဝ်တုဲ ဖဵုမသုန်သာ် ကလိဂွံရ။
ညးမ္ဂးဖဵု(၅)သာ်ဂှ်ရော−ဒၞါဲဟွံကေၚ်မိၚ်မွဲဝါလေဝ် ဂွံမိၚ်၊ ဒၞါဲကေၚ်မိၚ်တုဲ ဂွံဗိုန်က္ဍၚ်အာ၊ သၠေဟ်ပၟာနွံ ဂွံတိတ်ဗၠး၊ ကွေတ်လ္ဂူတပ်တးကၠုၚ်၊ မိၚ်ဓဝ်တုဲမ္ဂး စရိုတ်ဂွံဇြုၚ်ကေဝ်ကၠုၚ် ဣဝွံ ဖဵု(၅)သာ်ရ။
ဟိုတ်ဂှ်ရ သာ်ဝွံကျာ်တြဲတွံလဝ် ရောၚ်။
ပဉ္စိမေ ဘိက္ခဝေ အာနိသံသာ ဓမ္မဿဝနေ ၊ ကတမေ ပဉ္စ ။ အသုတံ သုဏာတိ၊ သုတံ ပရိယောဒါပေတိ ၊ ကၚ်္ခံ ဝိတရတိ၊ ဥဇုကံ ကရောတိ၊ စိတ္တမဿ မသဳဒတိ။
ဣမေ ခေါ ဘိက္ခဝေ ပဉ္စ အာနိသံသာ ဓမ္မဿဝနေ။
ဂွံမိၚ်ဓဝ်တုဲ ၜးအတ္တဘဴမ္ဂး ဂွံစဴဍုၚ်သွဝ်ဂှ် မၞိဟ်ဂှ် လဝ်ကဵုဒှ်ကၠာရ။ ၜိုန်ရတိရစ္ဆာန်ကီုလေဝ်ဂွံမိၚ်ဓဝ် စိုတ်လျုၚ်ဇြုၚ်သ္ဍိုက်တုဲ ဂွံစိုပ်ဍုၚ်သွဝ်ကီု ညးဂှ် မဂပ်ဝ်ထ္ၜးရော။
မၚ်္ဂလတ္တဒေသနာ၊ ပြကိုဟ်။ ဝါယမထေရ်၊ ဘဒ္ဒန္တ။ သၞာံ ၂၀၂၁။
This article uses material from the Wikipedia မန် article ထ္ၜးပရူဗီုဂွံပူဇဴဓဝ်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.