Ruku-ruku (Ocimum tenuiflorum) adolah tanaman rumpun nan tamasuak dalam famili Lamiaceae.
Tanaman iko sarupo jo kamangi sainggo acok batuka namo di kalangan awam. Salain jo kamangi, ruku-ruku masih safamili juo jo salasiah. Manuruik asanyo, tanaman ko dipakirokan barasa dari India nan kudian taseba di Asia Tenggara.
Ruku-ruku | |
---|---|
Ocimum tenuiflorum | |
Taksonomi | |
Divisi | Tracheophyta |
Subdivisi | Spermatophytes |
Klad | Angiospermae |
Klad | mesangiosperms |
Klad | eudicots |
Klad | core eudicots |
Klad | asterids |
Klad | lamiids |
Ordo | Lamiales |
Famili | Lamiaceae |
Subfamili | Nepetoideae |
Genus | Ocimum |
Spesies | Ocimum tenuiflorum Linnaeus, 1753 |
| |
Tata namo | |
Sinonim takson | Ocimum sanctum (en) |
Ruku-ruku, nan di India disabuik jo tulsi, dibudidayokan untuak urusan ibadaik agamo Hindu sarato untuak ubek tradisional. Dipagunokan pulo sabagai teh herbal dalam pangubatan Ayurveda. Di Indonesia, ruku-ruku biasanyo digunokan dalam masakan Minangkabau, baiak dimakan matah sabagai ulam atau dicampua dalam masakan.
Ruku-ruku adolah tumbuahan tahunan nan tumbuah tagak jo cabang nan banyak. Tumbuahan ko barumpun nan tingginyo dapek mancapai 100 cm. Bungonyo kaunguan tasusun di tandan nan tagak. Daunnyo panjang inggo, tagak, babantuak agak mambulek, barono ijau mudo jo ungu. harum. Ujuang daun tumpua atau tajam, panjangnyo mancapai 5 cm. Wanginyo sarupo cangkeh jo rasanyo paik.
Dari panalitian filogeografi skala gadang jo manggunokan urutan susunan genom kloroplas, nan dilakukan kalompok panaliti dari Universitas Pusek Punjab, Bathinda, didapek baso ruku-ruku barasa dari India Utara. Dari India, tanaman ko taseba ka Asia Tenggara, cando di Thailand, Indonesia, Filipina, jo Malaysia.
Ruku-ruku dimanfaatkan daunnyo sabagai bumbu masak di Asia Tenggara. Khusus di Indonesia, pamakaiannyo hanyo ado dalam masakan Minangkabau nan mandapek pangaruah masakan India. Ruku-ruku dapek dimakan matah sabagai ulam atau dicampua dalam proses masak. Rasonyo agak paik padeh katiko dimakan matah dan samakin bakurang katiko dimasak.
Dalam masakan, daun ruku-ruku baguno untuak maimpok baun anyia sarato maningkekan raso pado masakan babahan ikan. Daun ruku-ruku juo mambuek raso segar pado masakan basantan dek baunnyo nan tajam. Untuak mandapek aromanyo, daun ruku-ruku dimasuakan salayang sabalun api dimatikan.
Di sabagian daerah di Indonesia, cando di Jao, daun ruku-ruku agak sulik didapek. Untuak maatasinyo dapek digantikan jo daun kamangi. Pabandiangan untuk sahalai daun ruku-ruku adolah duo halai daun kamangi.
Pustaka
This article uses material from the Wikipedia Minangkabau article Ruku-ruku, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.