Pandemi Koronavirus 2019 Di Japang

Panyakik ko partamo kali dibaok dari Cino. Pado akhia Februari, sikolah dari janjang dasar inggo tinggi akhianyo ditutuik untuak maambek panyebaran virus ko. Pandemi ko juo mambuek alek olahraga dunia, yaitu Olimpiade Musim Paneh 2020 nan batampek di Japang batal diadoan dan diundua inggo 2021.

Pandemi koronavirus 2019 di Japang

Kasus takonfirmasi per sajuta panduduak manuruik prefektur
Panyakik	COVID-19
Virus strain	SARS-CoV-2
Lokasi	Japang
Kasus partamo	Prefektur Kanagawa
Tangga mulo	16 Januari 2020
Asa	Wuhan, Hubei, Cino
Kasus takonfirmasi	11.543
Cegak	1.356
Maningga	283

Januari

Partamo kali baok dek surang laki-laki bakawarganagaraan Cino barumua 30 tahun nan sabalunnyo ado riwayaik bakunjuang ka Wuhan. Badannyo lah mulai mandamam pado 3 Januari dan baliak ka Japang pado 6 Januari. Masuak rumah sakik antaro 10 inggo 15 Januari dan dipareso jo hasia positif tainfeksi. Indak ado riwayaik bakunjuang ka Pasa Binatang Huanan, Wuhan, tapi kamungkinan virusnyo tapindah dek kontak arek jo urang tainfeksi. Baturuik-turuik kasus kaduo takonfirmasi pado 24 Januari jo kasus katigo pado 25 Januari nan samo-samo bakawarganagaraan Cino nan baru bapulang dari Wuhan.

Kudian pamarintah Japang mulai maagiah paratian labiah pado kasus ko dek sabagai tuan rumah Olimpiade Musim Paneh 2020 nan rencana ka balansuang sabanta lai. Kasus takonfirmasi taruih batambah tarutamo dari urang nan baru barulang dari Cino. Untuak malinduangi warganyo dari Cino, pamarintah mulai maevakuasi warganyo nan kudian dipareso jo dikarantina.

Februari

Sajak 3 Februari, pamarintah Japang malarang masuak urang nan ado riwayaik bakunjuang dari Provinsi Hubei jo urang nan bakawarganagaraan Cino nan paspornyo dikaluakan dari pamarintah daerah Hubei. Balaku pulo aturan untuak wajib maisi kuesioner riwayaik kunjuangan dalam 14 ari untuak palancong bukan kawarganagaraan Japang.

Pado 13 Februari, kasus kamatian partamo dek COVID-19 dilaporkan di Japang. Korban maningga yaitu padusi barumua 80-an nan maningga di Prefektur Kanagawa (sabalah Tokyo) nan marupokan mintuo dari surang sopir taksi nan sabalunnyo takonfirmasi positif.

Pado 18 Februari, Prefektur Wakayama maumumkan ado tigo takonfirmasi positif dan salah satunyo dibaok ka Rumah Sakik Saisekai Arida. Duo urang lainnyo adolah dotor jo parawaik nan bakarajo sabagai Tim Bantuan Medis jo Bancano dari Kapa Pesiar Diamond Princess. Bisuaknyo, pamaresoan untuak 3.011 kasus di ateh kapa lah salasai dilakukan.

Pado 20 Februari partamo kalinyo Prefektur Fukuoka mandapek kasus positif. Pandaritonyo adolah laki-laki Japang barumua 60-an nan indak punyo riwayaik pai ka lua nagari.

Pado 21 Februari, dilaporkan duo anak-anak SD di Hokkaido jo ciek anak prasikolah takonfirmasi positif. Pado kasus anak prasikolah, didapek basonyo ado rowayaik bakunjuang dari Wuhan basamo ayahnyo.

Pado 23 Februari, panyadio layanan jalan tol Nagoya maumumkan rencana manutuik babarapo gerbang jalan tol sarato marumahkan pagawainyo sasudah ciek pagayainyo takonfirmasi positif.

Pado 27 Februari, Perdana Menteri Abe Shinzo maumumkan untuak manutuik sadoalah sikolah di Japang inggo April.

 

Maret

Pado 5 Maret, pamarintah Japang mawajibkan karantina untuak sadoalah pangunjuang dari Cino jo Korea Selatan. Bisuaknyo, pamarintah Korea Selatan maajukan protes ateh karantina nan dilakukan Japang jo tindakan manunda visa masuak Korea Selatan untuak warga Japang.

Pado 16 Maret, aturan restriksi atau pambatasan dipalaweh. Pangunjuang dari Italia jo Iran dibatasi.

Pado 23 Maret, Gubernur Tokyo Yuriko Koike maingekan partisipasi warga untuak manjago diri dari infeksi supayo indak tajadi lockdown. Pado 25 Maret diumumkan 41 kasus positif baru tiok ari di Tokyo. Gubernur Tokyo pun maimbau warga untuak bisa karajo dari rumah (working from home) salamo duo pakan. Dek imbauan tu, tajadi "Panic Buying" di Tokyo.

Pado 31 Maret, PM Abe diimbau dek babagai tokoh politik, pamarintahan, jo kasihatan untuak mandeklarasikan kondisi darurat nasional. Namun, PM Abe basamo Sekretaris Kabinet Suga manulak usua tasabuik dek diraso alun paralu.

 

Perdana Menteri Abe manyabuik baso pandemi COVID-19 maagiah dampak gadang di sadoalah bidang khususnyo bidang pariwisata jo ekonomi. Inyo mampatimbangkan untuak manggunokan dana darurat untuak mitigasi dampak wabah pado bidang pariwisata tamasuak panabangan, ritel, jo agen wisata nan biasonyo disumbang pandapatannyo 40% dari turis Cino. Panduduak nan barasa dari Cino pun mandapek palakuan diskriminatif dari warga Japang. Di bidang hiburan, sadoalah wahana hiburan kelas dunia alah tutuik sajak 29 Februari walau sempat juo dibukak samantaro pado 15 Maret. PM Abe pun maimbau sadoalah alek hiburan jo budayo musti ditunda.

Pado bidang olahraga, alek gadang tingkek dunia cando Olimpiade Musim Paneh 2020 nan dijadwalkan balansuang di Japang akhia bulan Juli akhianyo ditunda ka 2021. Kaputusan iko diambiak sasudah Komite Olimpiade Internasional mamantau dampak wabah di Japang. Salain itu, baragam alek olahraga tingkek nasional di Japang ditunda untuak diadoan. Samantaro pacu kudo di Japang tatap balansuang tapi tanpa panonton. Panonton nan ka maagiah taruhan ka kudo pacu hanyo dilakukan malalui internet atau telepon.

 

Manuruik hukum nan balaku di Japang, pamarintah indak bisa mambatasi pagarakan urang-urang nan alah tainfeksi virus. Pamarintah hanyo dapek malakukan imbauan ka warga untuak manjago jarak kontak supayo mangurangi dampak ekonomi nagara. Tindakan lain nan dilakukan adolah pambatasan pagarakan urang dari lua nagari ka dalam Japang.

Pado tingkek internasional, ado banyak nagara nan alah malarang kunjuangan warga Japang ka wilayah nagaranyo. Hal iko dilakukan dek kasus COVID-19 mulai maningkek di Japang. Di antaronyo:

• India
• Israel
• Iraq
• Kuwait
• Arab Saudi
• Korea Selatan
• Bahrain
• Bangladesh: pangunjuang tanpa surek katarangan "bebas koronavirus" dilarang masuak
• Bhutan
• Ghana
• Gibraltar
• Korea Utara
• Malaysia: Larangan untuak dari Hokkaido.
• Mongolia
• Nepal
• Kazakhstan
• Kirgizstan
• Lebanon
• Syria
• Tajikistan
• Turkmenistan
• Mikronesia
• Vanuatu
• Polinesia Parancih
• Kapulauan Cook
• Kapulauan Marshall
• Trinidad dan Tobago
• Samoa
• Kiribati
• Tuvalu
• Kapulauan Solomon
• Komoro
• Papua New Guinea
• Saint Lucia
• Saint Vincent and the Grenadines
• Sint Maarten