Jamaika

Mancakuik area salaweh 10.990 kilometer persegi (4.240 sq mi), iko adolah pulau tagadang ka tigo di Antillen Gadang jo Karibia (sasudah Kuba jo Hispaniola). Nagara ko talatak di antaro garih lintang 17° jo 19°LU, sarato garih bujua 76° jo 79°B. Pagunuangan mandominasi bantuak nagara, takah pagunuangan Don Figuerero, Santa Cruz, jo May Day di barat, pagunuangan Dry Harbour di tengah, pagunuangan John Crow jo pagunuangan Biru di timur nan tadapek Puncak Gunuang Biru tatinggi di Jamaika, 2.256 m. Salain tu, nagara dikaliliangi dek dataran pantai nan sampik.

Jamaika punyo duo kota, nan patamo adolah Kingston, ibu kota jo pusek bisnis nan talatak di pantai selatan, jo nan kaduo adolah Taluak Montego, salah ciek kota paliang takenal di Karibia untuak pariwisata nan talatak di pantai utara. Palabuhan Kingston marupokan palabuhan alami tagadang katujuah di dunia.

Politik Jamaika barado dalam karangko demokrasi parlementer jo monarki konstitusional. Kapalo nagaranyo adolah Rajo Jamaika nan kini ko dipacik dek Rajo Charles III, nan diwakiakan sacaro lokal dek Gubernur Jendral Jamaika.

Parlemen Jamaika bikameral, tadiri dari Dewan Perwakilan Rakyat jo Senat. Anggota DPR dipiliah sacaro langsuang, dan manuruik gubernur jenderal nan paliang bisa mandapekan kayakinan mayoritas anggota DPR, mako diangkek manjadi Pardana Mantari. Senat dinominasikan basamo dek pardana mantari jo pemimpin oposisi di parlemen nan salanjuiknyo diangkek dek gubernur jenderal.

Manuruik sensus 2011, panduduak Jamaika bajumlah 2.697.983 jiwa nan dipakirokan naiak saketek di tahun 2018 manjadi 2.726.667 jiwa. Aka etnis panduduaknyo nan baragam tacamin dalam moto nasional "Out of Many One People" (Dari Banyak, Satu Orang). Sabagian gadang dari panduduak pado pakiroan tahun 2018 adolah katurunan Afrika atau sabagian Afrika, jo banyak nan malacak asanyo ka nagara-nagara Afrika Barat Ghana jo Nigeria. Wilayah niniak moyang utamo lainnyo adolah Eropa, Asia Selatan jo Asia Timur.