Neurologie

Laes hie wie v'r mit de versjillende saorte Limburgs ómgaon.

Neurologie is e medisch specialisme det zich besjeftig mitte diagnostiek en behanjeling van gekrenkdjes aan 't herre, 't rögkemarg enne zieëne. Daonaeve waere spiergekrenkdje döks ouch behanjeldj door 'ne neuroloog. 'ne Neuroloog haet hiedoor te make mit oetereinloupendje klachte, wie koppien, dóbbelzeen, tintjelinge, oetstraolendje pien inne bein of de erm, duzeligheid, slaopstuuernisse, (aanvalle van) bewószeensdaling, ónthaad- en spraokstuuernisse, loup- en bewaegingsstuuernisse, speerzwaakdje of verlamingsversjiensele. Gekrenkdjes die waere behanjeldj door 'ne neuroloog zeen ónger anger epilepsie, de gekrenkdje van Parkinson, dementie, multiple sclerose, carpaletunnelsyndroom, nak- en rögkhernia, polyneuropathie, spierdystrofie en herretumore. In 't krankenhoes zörg de neuroloog wiejer veur luuj mit 'ne slaagaanval (herreninfark of herrebleujing), meningitis (herrevleesóntstaeking), coma, herresjödding, herrekneuzing of anger vörm van herresjaaj.

Neurologie is neet per se 'tzelvendje wie neuroweitesjap. Allewel neurologie deil oetmaak vanne neuroweitesjappe, is de neuroweitesjap de algemeinder, euverkoepelendje weitesjap die zich besjeftig mit alle aspekte van 't zieënstèlsel.