Hawaii

Hawaii

Lo es la stato la plu resente; lo ia ajunta se a la Statos Unida de America a 21 agosto 1959.

La site capital es Honolulu.

• Area: 29 311 km².
• Abitores: 1 211 537 (2000), 1 374 810 (2011).

Hawaii es un pais locada en la Mar Pasifica, composada de oto isolas major: Niʻihau, Kauaʻi, Oʻahu, Molokaʻi, Lānaʻi, Kahoʻolawe, Maui e Hawaiʻi. La isola Hawaiʻi es la plu grande e es comun nomida "la isola grande" per evita confusa con la stato. Sola sete isolas es abitada: la isola Kahoʻolawe ave no abitores. La plu persones es sur la isola Oʻahu, do la site Honolulu es locada.

Tota esta isolas es de orijina volcanal.

La isolas Hawaiʻi ia es prima abitada par persones polinesian, cisa tan temprana como 300 ec.

La isolas ia es nonconoseda par la popla de la Ueste asta cuando James Cook, un esploror brites, ia trova los en 1778.

Con la aida de armas e consela brites, un xef de la isola Hawaiʻi, Kamehameha la grande, o Kamehameha 1, ia concista tota la isolas e, en 1810, ia constitui la Rena de Hawaii.

En 1893, abitores de Hawaii de desende american ia fa un colpa de stato, e ia constitui la Republica de Hawaii. La governa nova ia demanda ce la Statos Unida aseta Hawaii como un teritorio, e a 6 julio 1898, lo ia deveni la Teritorio de Hawaii.

A 21 agosto 1959, Hawaii ia deveni un stato de la Statos Unida.