Filem 2006 Casino Royale: Filem James Bond taun 2006

Filem punika dipunsutradarani Martin Campbell, dhedhasar skénario anggitanipun Paul Haggis, Neal Purvis lan Robert Wade, dipunangkat saking novèl asesirah Casino Royale anggitanipun Ian Fleming. Wondéné juru damel filem punika Michael G. Wilson lan Barbara Broccoli. Ingkang maragani filem punika antawisipun Daniel Craig, Eva Green, Mads Mikkelsen, Judi Dench, Jeffrey Wright, lan Giancarlo Giannini.

Casino Royale
Poster film Casino Royale
Disutradarani	Martin Campbell
Diprodhuseri	Michael G. Wilson Barbara Broccoli
Diskénariyoni	Paul Haggis Neal Purvis Robert Wade
Adhedhasar	Casino Royale déning Ian Fleming
Dibintangi	Daniel Craig Eva Green Mads Mikkelsen Judi Dench Jeffrey Wright Giancarlo Giannini
Dimusiki	David Arnold
Sinématografi	Phil Méheux
Dibesut déning	Stuart Baird
Perusahaan prodhuksi	EON Productions Stillking Films Babelsberg Studio
Dibabar déning	Metro-Goldwyn-Mayer Columbia Pictures
Tanggal metu	14 Novèmber 2006 (2006-11-14) (kutha London) 17 Novèmber 2006 (2006-11-17) (Karajan Manunggal lan Amérikah Sarékat)
Suwéné	144 menit
Nagara	Karajan Manunggal Amérikah Sarékat
Basa	Basa Inggris
Rantaman	$150 yuta
Kalarisan	$599,045,960

Casino Royale punika filem kaping pisan kagemipun Daniel Craig minangka agèn 007 James Bond, nggantosi Pierce Brosnan. Ugi filem kaping gangsal saking Judi Dench minangka M lan kapisan sayuk karya kaliyan Daniel Craig. Casino Royale dipungiyaraken kaping pisan ing London surya 14 Novèmber 2006 lan dipunbabar ing Inggris lan Amérikah Sarékat surya 17 Novèmber 2006. Sasampunipun kababar, filem punika pikantuk pangalembana saking sagung pamirsa lan juru kritik.

Ing filem punika kacariyosaken bilih James Bond (Daniel Craig) ngayahi jejibahan minangka telik sandhi, ngindhik-indhik satunggalipun téroris saking Madagaskar, Mollaka (Sebastien Foucan). Amargi mboten jumbuh kaliyan ingkang dipunkajengaken, lajeng Bond ngayahi jejibahan punika piyambakan, madosi lan ngempalaken katrangan ngengingi teroris saking M-16.

Kanthi nyepeng katrangan punika, lajeng Bond tumuju wonten Nassau, Bahamas saperlu manggihi Alex Dimitrios (Simon Abkarian) lan pacanganipun, Solange (Caterina Murino). Bond ugi mangertos bilih Dimitrios wonten sesambetan kaliyan Le Chiffre (Mads Mikkelsen), salah satunggalipun juragan bank lan cukong ingkang kathah ngragati kagiyatan para teroris sadonya.

Adhedhasar laporan saking intelijen, Le Chiffre ngrancang lan ngempalaken ardhana lumantar kagiyatan main (judi) kanthi totohan inggil ing Le Casino Royale i Montenegro. Bond, sesarengan Vesper Lynd (Eva Green), René Mathis (Giancarlo Giannini) lan agèn CIA Felix Leiter (Jeffrey Wright), dipundhapuk ngasoraken Le Chiffre ingkang badhé ngobrak-abrik pranatan organisasi punika.

• Daniel Craig-James Bond
• Eva Green-Vesper Lynd
• Mads Mikkelsen-Le Chiffre
• Judi Dench-M
• Giancarlo Giannini-René Mathis
• Jeffrey Wright-Felix Leiter
• Simon Abkarian-Alex Dimitrios
• Caterina Murino-Solange Dimitrios
• Ivana Miličević-Valenka
• Isaach de Bankolé-Steven Obanno
• Jesper Christensen-Mr. White
• Sébastien Foucan-Mollaka
• Tobias Menzies-Villiers

Film Casino Royale nampi pangalembana saé saking para pamirsa lan juru kritik. Adhedhasar cathetan saking Rotten Tomatoes, 91% pamirsa filem punika remen, dhedhasar 246 praté juru kritik, kanthi rata-rata 7.9/10. Wondéné ing Metacritic, filem punika pikantuk biji 80 saking 100, dhedhasar pratélanipun 46 juru kritik. CinemaScore maringi filem punika biji "A-" saking para pamirsa, antawisipun A+ dumugi F.

Filem Casino Royale kasil ngempalaken arta $167,445,960 saking Amérika Lèr lan $431,600,000 ing nagari sanès. Gunggung pangempalan arta ngancik $599,045,960, nglangkungi wragad ingkang namung medal $150 yuta. Ing panggiyaran Setu dalu, filem punika ngempalaken $40,833,156, mlebet urutan kaping kalih box office sasampunipun Happy Feet.