Sant-Empiro Romen Gèrmanico

Cél articllo est ècrit en arpetan supradialèctâl / ORB lârge.

Por los articllos homonimos, vêde Empiro romen et Empiro du Cuchient.

Dêt pas étre mâl-prês por Empiro romen du Cuchient, Empiro carolingien, Confèdèracion gèrmanica ou ben Empiro alemand.

Lo Sant-Empiro romen est un regroupâjo politico, enqu’houé disparu, de tèrres d’Eropa cuchientenche et centrâla u Moyen Âjo, dirigiê per un sôveren que portâve lo titro d’« emperor des Romens ». Sè considèrâve, de sa fondacion u X^émo siècllo tant qu’a sa suprèssion u comencement du XIX^émo siècllo per Napoléon, coment lo continuatior de l’Empiro du Cuchient des Carolingiens et en-delé de l’Empiro romen. L’adjèctif Sant fut rapondu por sa pârt desot lo règno de Frèderic Bârbarossa (atèstâ en 1157) por lèg·itimar lo povêr de maniére divina.

Fut asse-ben apelâ dês lo XVI^émo siècllo tant qu’u XVIII^émo siècllo Sant-Empiro romen de la nacion tutonica (en latin : Sacrum Romanum Imperium Nationis Teutonicae), tendent a l’identifiar avouéc les Alemagnes. Aprés sa suprèssion, dedens los lévros d’histouère francês du XX^émo siècllo, fut apelâ Sant-Empiro romen gèrmanico. Mas la rèference gèrmanica est pas presenta dedens los lévros d’histouère d’ôtros payis : il est apelâ en angllès Holy Roman Empire, en latin Sacrum Imperium Romanum, en alemand Heiliges Römisches Reich, en étalien Sacro Romano Impero, en nêrlandês Heilige Roomse Rijk ; et pués est avouéc apelâ des côps Premiér Reich ou ben Viely Empiro, por lo difèrenciér de l’Empiro alemand.

O est desot la dinastia des Otoniens, u X^émo siècllo, que l’empiro sè fôrme dês la vielye Francia levantenche carolingièna. Dês l’an 1032, lo Second Reyômo de Borgogne, la Savouè avouéc, est rapondu a l’empiro. La dèsignacion Sacrum Imperium est atèstâye por lo premiér côp en 1157^, et lo titro Sacrum Romanum Imperium aparêt vers 1184 por étre empleyê de maniére dèfinitiva dês l’an 1254. Lo complèment Deutscher Nation (en latin Nationis Teutonicae, en arpetan « de [la] Nacion tutonica ») est étâ apondu u XV^émo siècllo. L’ètendua et les frontiéres du Sant-Empiro sont étâyes considèrâblament changiêes pendent los siècllos. U temps de sa més granta èxtension, l’empiro contint quâsi tot lo tèrritouèro de l’Eropa centrâla d’ora, des Payis-d’Avâl, de la Bèlgica, du Lussembôrg, de la Suisse et pués de parties de la France et de l’Étalia. Son histouère et sa civilisacion sont vêr un héretâjo partagiê per un mouél d’Ètats eropèens d’ora.

Los temps modèrnos mârcont por l’empiro l’empossibilitât estructurâla de menar de guèrres ofensives, d’èpatar son povêr et son tèrritouèro. Dês ique, ses principâles missions sont la dèfensa du drêt et la consèrvacion de la pèx. L’empiro dêt assurar la stabilitât politica et la rèsolucion pacefica des dèsacôrds en endiguent la dinamica du povêr : semond na protèccion, ux sujèts contre l’arbitrèro des sègnors, et pués ux ôrdres muens importants contre tota enfraccion u drêt fêta per los ôrdres més importants et per l’empiro mémo. Dês l’an 1648, des Ètats vesins sont constitucionalament entègrâs coment Ètats emperiâls ; l’empiro remple adonc étot cela fonccion de pèx dedens la constèlacion de les pouessiences eropèènes.

Dês lo méten du XVIII^émo siècllo, l’empiro pôt pas més emparar sos membros de la politica d’èxpension de les pouessiences du dedens et du defôr. O est yona de les côses de son èfondrament. Les conquétes napoléoniènes et la crèacion de la confèdèracion du Rin dèmontront la fèblèssa du Sant-Empiro. Lo Sant-Empiro romen disparêt lo 6 d’oût 1806 quand l’emperor Françouès I^ér dèpôse sa corona por étre ren qu’emperor d’Ôtriche et, coment l’ècrit Ferdinand Lot, lo 6 d’oût 1806, dâta de l’abandon per Françouès II de sa qualitât d’emperor des Romens, pôt étre considèrâ coment l’acto de môrt lègâla de l’Empiro romen.

Sus lo viely tèrritouèro de l’empiro sè sont procllamâs u XIX^émo siècllo un mouél de payis modèrnos : les Alemagnes, l’Ôtriche, la Suisse, l’Étalia, la Rèpublica tchèca, los Payis-d’Avâl et d’ôtros.

Notes

Rèferences