Musika Taldea Zea Mays: Musika taldea

• Asier Basabe (bateria)
• Ruben Gonzalez (baxua)
• Iñaki Imaz (gitarra)
• Aiora Errenteria (ahotsa)

Hasierako ibilbidea

1997ko udan 7 kantuz osaturiko maketa grabatu eta urte berean Euskadi Gazteako maketa lehiaketa irabazi zuten. Sariak bultzada handia eman zien eta Euskal Herrian zehar hainbat kontzertu emateko aukera zabaldu zitzaien. Bilboko pop-rock lehiaketan talde euskaldun onenaren saria irabazi zuten 1998an.

1998ko irailean Gor diskoetxearekin euren lehen diskoa grabatu zuten: Zea Mays. Mondo Sonoro aldizkariaren arabera, urte hartako Euskal Herriko 10 diskorik onenen artean zegoen. Kontzertu asko eman ostean, 2000ko martxoan bigarren diskoa atera zuten: Elektrizitatea. Urte hartako Euskal Herriko diskorik onena izan zen, Mondo Sonoro aldizkariaren iritzira. Urte bereko irailean bira bat hasi zuten Holandatik.

2002ko uztailean euren hirugarren diskoa grabatu zuten: Harrobian, oraingoan Gaztelupeko Hotsak diskoetxearekin. Hori baino lehenago, AEKantuz diskoan Mikel Laboaren kanta baten bertsioa grabatu zuten. 2003ko udan Europatik beste bira bat egin zuten: Alemanian eta Holandan. Urte honetan zehar, hainbat eta hainbat kontzertu eman zituzten Euskal Herrian. 2004an Festimaden jo zuten eta horren ondoren disko berria grabatzeko geldialdia egin zuten.

Puntako taldea

2005eko martxoan euren hurrengo diskoa plazaratu zuten: Sortuz, grabitatearen aurka. Disko honek arrakasta handia izan zuen eta taldea Euskal Herriko talderik puntakoenetarikoa bihurtu zen orduan. 2006ko abenduan 18/98 taldearen aldeko diskoan parte hartu zuten Astero, ostera hastera kantarekin. Maialen Lujanbio bertsolariaren hitzekin egindako kanta izan zen.

2007an taldeak hamar urte bete zituen. Urte horretan kaleratutako Morphina diskoarekin taldearen ordura arteko ibilbidea laburbiltzen zuen DVDa jarri zuten salgai, hamarkada oso batean eskainitako kontzertuen irudiak biltzen zituena.

Negua joan da ta

2010ean aldiz, Era diskoak ikusi zuen argia. Taldekideen esanetan, aurrekoak baino dantzagarriagoa da, zuzenagoa eta positiboagoa. Disko honetan azaldu zen berehala arrakasta itzela lortu zuen Negua joan da ta abestia. Bideoklipak ere izugarrizko arrakasta izan zuen, Ainhoa Moiuak keinu hizkuntzan egindako interpretazioa, hain zuzen ere.

Ondoren beste bi disko etorri ziren, Da eta Harro.

20 urte eta gehiago

2017an beren 20 urtetako ibilbidea laburbilduz abesti onenekin egindako bilduma plazaratu zuten, Zea Mays, 20 urte. Urte berean Euskadiko Orkestra Sinfonikoarekin elkarlanean hiru abestitako singlea argitaratu zuten. Disko horretan Elektrizitatea, Gaur eta Negua joan da ta abestiak zeuden. 2019an disko berria atera dute, Atera izenekoa hain zuzen ere.

Adarra saria

Adarra Sariaren 2023ko edizioan, Zea Mays rock taldeak jaso zuen saria. Izandako ibilbide «arrakastatsu eta kalitatezkoa» baloratu zuen epaimahaiak eta nabarmendu zuen hainbeste kolaboratzaile izatea diskoetan zein zuzenekoetan.

• Zea Mays (1998, Gor)
• Elektrizitatea (2000, Gor)
• Harrobian (2002, Gaztelupeko Hotsak)
• Sortuz, grabitatearen aurka (2005, Oihuka)
• Morphina (2007, Bonberenea Ekintzak)
• Era (2010, Bonberenea Ekintzak)
• Da (2013, autoedizioa)
• Harro (2016, Garden Records)
• Zea Mays 20 urte (2017, Garden Records)
• Zea Mays, Euskadiko Orkestra Sinfonikoarekin (2017, Garden Records) - 3 abesti
• Atera (2019, Garden Records)

• AEKantuz (2002, Elkar)
• Errekalde Heavy Metal (2003, Errekalde Heavy Metal)
• 18/98+... auzolanean (2006, Gara)
• Ibilaldia 2015 (2015)
• Bilbo Hiria irratia. 20 urtez euskal taupada (2017, Erroa)
• Aspalditik gatoz, urrutira goaz (2016, Bonberenea Ekintzak)

• 2023: Adarra saria
• 2021: Lauaxeta Saria
• 1998: Telebilbao saria Bilbo Hiria Pop-Rock lehiaketan.
• 1997: Gaztea maketa lehiaketa

• Euskal Herriko musika garaikidea
• Bilboaldeko musika taldeak

• Argian Zea Mays taldeari elkarrizketa bideoa
• Zea Mays taldeari eginiko elkarrizketa osoa Argian
• Euskonews Gaztean, Zea Mays taldeari elkarrizketa^{[Betiko hautsitako esteka]}