Elizabeth Short

L’Elizabeth Ann Short (Boston, 29 ad Luj dal 1924 - Los Angeles, 15 ad Śnar dal 1947), cgusùda méj c'n al scutmàj ad La Giurgìna Négra (Black Dahlia in ingléś) parchè a gh piaśìva 'l film La dalia azzurra e la s vistìva 'd négar, l'è stada na vitma 'd un caś famóś minga risòlt ad masamènt dal XX sécul in di Stat Unî.

Su la sò vita i èṅ stâ scrit soquànt rumànś cuma Verità confessate ad John Gregory Dunne dal 1977 e Dalia Nera ad James Ellroy dal 1987 e girâ soquànt film cuma L'assoluzione, pelìcula dal 1981 cun Robert De Niro e Robert Duvall, e Black Dahlia ad Brian De Palma.

Biugrafìa

L’Elizabeth Short la nas in di an Vint in un quartēr ad Boston, Hyde Park, ma da baghéta la spatìna a Medford (Massachusetts) insém a sò màdar, la Phoebe Mae, e a 'l sò quàtar surèli méntar sò pàdar Cleo 'l iva mulâ la famìja p'r andàr a star in Califòrgna.

Malàda 'd aśma l’Elizabeth la pasàva 'l Invèran in Flòrida par curàr-as, pò dvintàda śuvnòta, a daśnóṿ an, la và a star cun sò pàdar a Los Angeles. A séguit dna litgàda sèg l’Elizabeth la và via 'd cà catànd lavōr in 'n ufìsi pustàł a Camp Cooke e pò la và a star a Santa Bàrbara in dua, al 23 ad Setémbar dal 1943, la finìs in arèst parchè catàda ciùca. La pulisìa la la spedìs pò da sò màd'r incóra a Medford. La ragàsa la taca a lauràr in dla ménsa dl'università 'd Harvard pò la và a star in Flòrida in du la cgnós al magiōr dl'aeronàutica Matthew M. Gordon Jr. ch'al gh admànda ad spuśàr-al prima 'd murìr in 'n incidènt in aparéć in dal 1945.

L’Elizabeth la mòla incòsa e la và a star incóra in Califòrgna in du la próa a catàr pòst a Hollywood in dal mónd dal spetàcul ma la gh la cava sōl a giràr di film pòran, in alóra pruibî da la léǵ in di Stat Unî.

Al 15 ad Śnar al sò còrp al vîṅ catâ nûd e tajâ a mèś lung la vita in un parc bandunâ a Leimert Park, un quartēr a sud ad Los Angeles. Prima 'd murìr l'è stada turturàda e la gh'iva i cavìi tint ad rós e la bóca tajàda da 'n uréć a c'l àtar a la manéra dal Glasgow smile. Al sò còrp l'éra stâ lavâ par scanślàr al maci 'd sangṿ.

L'è stada saplìda in dal Mountain View Cemetery 'd Oakland (Califòrgna) e 'l sò sasèṅ al n è mai stâ catâ anc s'i suspetâ dal masamènt i èṅ stâ dimóndi.

Culegamènt estéran

• (EN) La sò paśna in sal sit d'l FBI