Scutmâj
Artécol in dialèt arzân
Al scutmâj (in italiân nomignolo) l'è na parôla 'dl' Arzân, ch' l'a 's câta ânca in tânt êter dialèt, cme al Mudnèiṣ e al Frarèiṣ , e ânca fōra regiòun d'intōren al Po. Un scutmâj l'é na sôrta ed nòm inventê, druvê ânca al dé d'incō, ch' al 's tâca a la gînta per tōr in gîr na quêlch qualitê o un quêlch difèt; al pōl ânca arfêres al nòm, al cugnòm, al mistēr o a l'urégin (la faméja o la sitê) dla persòuna. Cun al tèimp, i scutmâj a pōlen dvintêr quêşi di secònd cugnòm. Còl ch'l'é sicûr l'é che na vôlta tachê an 's chêva pió.
La stôria dla parôla l'an n' é mia sicûra, mó la duvré deşgnîr dal medioēv ed èser lighêda ai scongiurâs e per difènder e tgnîr luntân, dal persòuni, la ièta e al malatéi. Dal spiegasiòun pusébil în: dal tudèsch antîgh Scottname (un nòm dê per schêrs o per tōr in gîr), dal latèin excutere malia (= scongiurêr j incantèişem), excutere mala (= scongiurêr i mêl) o scutum in mallo (= scûd purtê int al j adunânsi ed piâsa).
Esèimpi per l'Arzân
Al vocabulâri ed Ferâri e Sèra al gh'à e-sânta eşèimpi de scutmâj, gióst per fêr la lésta ed quî pió comûn.
| Bèndla | dét ed quî ch' în şvêlt dimòndi | Blésga | dét ed quî ch' în scapadés o fêls e dòpi |
| Carabinēra | dét dal dòni sevēri, bróschi, cun al pōls dûr | Ganâsa | dét ed quî ch' în di spacòun, o di magnandōr |
| Ligēra | dét ed quî ch' în mât e scavès | Mardlèint | dét ed quî ch' a fân i cagòun o i sustgnû |
| Maróch | dét ed quî ch' în intēr e imbalsê | Mericân | dét ed quî ch' în stê in Amèrica |
| Mudnèiṣ | dét ed quî 'ch a deşvînen da Môdna | Nîgher | dét pr'al culōr ed la pèla o di cavî |
| Paterlènga | dét ed quî ch' a gh'àn al nêṣ ròs | Picâja | dét ed quî ch' în êlt e mêgher dimòndi |
| Prèsia | dét ed quî ch' în (o în mìa) ṣmaniōṣ | Rampèin | dét ed quî ch' în ed j apéli o di pluchîn |
| Sgalbēder | dét ed quî ch' a gh'àn na cēra zâla | Sguldèvel | dét ed quî ch' în inghignôş o inculèint |
| Sôp | dét ed quî ch' a bâten mìa pêra | Strinê | dét ed quî ch' a gh'àn la pèla ed la ghégna pâsa |
| Stumpâj | dét ed quî ch' în céch dimòndi | Trabiscân | dét ed quî che sarfòjen o a barbàjen |
Materiêl pr'andêregh in fònda
(manca):
- Luigi Ferrari e Luciano Serra, Vocabolario del dialetto reggiano, Tecnograf, Rèz, 1989.
(manca):
This article uses material from the Wikipedia Emiliàn e rumagnòl article Scutmâj, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.