Brian De Palma

Brian Russell De Palma (Newark, 11 ad Luj dal 1943), cgnusû méj cuma Brian De Palma, 'l è 'n regista, senegiadōr e prudutōr ad film americàṅ.

Da sèmp'r ispirâ a la tècnica 'd Alfred Hitchcock, 'l è cgnusû specialmènt p'r al sò pelìculi Carrie, lo sguardo di Satana, Scarface e The Untouchables - Gli intoccabili.

Biugrafìa

Nâ in dal New Jersey da di genitōr cun di urìgini itagliàni, De Palma al gira i sò prim film in dal 1968 cun Murder à la Mod e Ciao America!, qvést chè c'n un śōvan Robert De Niro. Sèg al gira anc Hi, Mom! dal 1970.

In dal 1973 'l è 'l tùran dal thriller Le due sorelle mént'r in dal 1972 al lavóra c'n Orson Welles in dla cumèdia Impara a conoscere il tuo coniglio. Dū an dòp Brian al gira c'n Il fantasma del palcoscenico 'n adatamènt dal gènar musical ad scarésa dgl'òpri Al Fantàśma dl'Òpra, Al Gòb ad Notre Dame, Al ritràt ad Dorian Gray e Faust.

Dòp al thriller Obsession - Complesso di colpa, al sucès p'r al regìsta americàṅ al riva dabòṅ in dal 1976 c'n al film ad scarésa Carrie, lo sguardo di Satana trat da 'n rumànś ad Stephen King. In dal cast i s càtan la Sissy Spacek, la Piper Laurie, John Travolta e la Nancy Allen ch'la dvintarà sò mujér in dal 1979 prima 'd divìdar-'s sinc an dòp e ad spuśàr-'s atri dū vòlti.

In dal 1978 De Palma al gira Fury, un thriller cun Kirk Douglas e John Cassavetes, pò in dal 1980 al dà vita a atri dū òpri, la cumèdia Home Movies - Vizietti familiari e 'l thriller Vestito per uccidere in dua la prutagunìsta Angie Dickinson la vîṅ fata fóra dagnóra subìt cuma la Janet Leigh in Psycho. Brian al tórna a lauràr pò cun John Travolta e la Nancy Allen in dal thriller Blow Out dal 1981 ch'al tōś ispirasiòṅ in na quàlc manéra da la pelìcula Blow-Up ad quìnd'ś an prima dal fraréś Michelangelo Antonioni.

In di an a vgnir Brian al gira soquànt film dal gènar gangster, Scarface (1983), scrit p'r Oliver Stone, The Untouchables - Gli intoccabili (1987) cun Sean Connery, Robert De Niro e Kevin Costner e Carlito's Way (1993) c'n Al Pacino e Sean Penn. In dal mèś al thriller Omicidio a luci rosse (1984) e al thriller Doppia personalità (1992), àt'r umàǵ a Psyco.

In dal 1996 al lavóra su cumisiòṅ in dal film 'd asiòṅ Mission: Impossible, prudót e interpretâ par Tom Cruise, na pelìcula ch'la gh la cava a far sù 'n squantèr'n ad bèsi a 'l cuntràri dal sucesìṿ Omicidio in diretta cun Nicolas Cage mént'r al fantasientìfic Mission to Mars dal 2000, custâ sènt migliòṅ ad dòlar, al in fà sù ùndas da piò.

In dal 2002 e in dal 2006 al gira dū film cun prutagunìsti dal “dóni fatàli”, faghénd al thriller Femme Fatale e 'l noir Black Dahlia ch'al cònta dla vita dla Giurgìna Négra vitma 'd un sasèṅ seriàł. In dal 2007 al ciàpa 'l Lèòṅ 'd Argìnt a 'l Fèstival ad Venèsia par la regìa dla pelìcula 'd guèra Redacted ch'al cònta la stòria véra dna ragàsa iraqèna stupràda e cupàda da di suldâ americàṅ, na trama ch'l'arcòrda 'l film dramàtic ad guèra dal 1989 Vittime di guerra cun Michael J. Fox e Sean Penn ambintâ però in Vietnam.

Filmugrafìa

• 1960 - Icarus - Curtumetràǵ
• 1961 - 660124: The Story of an IBM Card - Curtumetràǵ
• 1962 - Woton's Wake - Curtumetràǵ
• 1964 - Jennifer - Curtumetràǵ
• 1965 - Bridge That Gap - Curtumetràǵ
• 1966 - The Responsive Eye - Curtumetràǵ
• 1966 - Show Me a Strong Town and I'll Show You a Strong Bank - Curtumetràǵ
• 1963-1966 - Oggi sposi (The Wedding Party)
• 1968 - Murder à la Mod
• 1968 - Ciao America! (Greetings)
• 1970 - Dionisio nel '69 (Dionysus)
• 1970 - Hi, Mom!
• 1972 - Impara a conoscere il tuo coniglio (Get to Know Your Rabbit)
• 1973 - Le due sorelle (Sisters)
• 1974 - Il fantasma del palcoscenico (Phantom of the Paradise)
• 1976 - Obsession - Complesso di colpa (Obsession)
• 1976 - Carrie, lo sguardo di Satana (Carrie)
• 1978 - Fury (The Fury)
• 1980 - Home Movies - Vizietti familiari (Home Movies)
• 1980 - Vestito per uccidere (Dressed to Kill)
• 1981 - Blow Out
• 1983 - Scarface
• 1984 - Omicidio a luci rosse (Body Double)
• 1986 - Cadaveri e compari (Wise Guys)
• 1987 - The Untouchables - Gli intoccabili (The Untouchables)
• 1989 - Vittime di guerra (Casualties of War)
• 1990 - Il falò delle vanità (The Bonfire of the Vanities)
• 1992 - Doppia personalità (Raising Cain)
• 1993 - Carlito's Way
• 1996 - Mission: Impossible
• 1998 - Omicidio in diretta (Snake Eyes)
• 2000 - Mission to Mars
• 2002 - Femme fatale
• 2006 - Black Dahlia
• 2007 - Redacted
• 2012 - Passion

Culegamènt estéran

• (EN) La sò schéda in s'l IMDb