Droug An Divskouarn

Trouz a vez muioc'h-mui e-barzh ar gevredigezh, abalamour d'ar binvioù trouzusoc'h bemdez, ha fall eo an trouz evit yec'hed an divskouarn. E kêr evel war ar maez, el labour evel er gêr, ne vez ket graet brav d’hon divskouarn. An trouz eo enebour kentañ ar yec'hed er bed a-vremañ, hervez Aozadur Bed ar Yec’hed. Koll ar c’hleved a zo deuet da vezañ an droug kentañ gouzañvet gant ar c’horf. Dont a ra da bevare kaoz a gleñved e-barzh al labour ; hervez al lezenn c'hall ez eo anavezet an trouz evel un dañjer el labour abaoe 1963.^{(Daveoù a vank)}

10 % eus an dud e broioù zo, SUA, Japan, Europa, o devez poan o klevout, ha muioc’h-mui a dud a ya da welout ur mezeg abalamour da se, hogen muioc'h a baotred eget a verc'hed. Tapet eo ar vugale gant an droug ivez.

N’omp ket par dirak an trouz, rak kemmañ a ra an amzer tremenet e-kreiz an trouz hervez doareoù bevañ an dud. Hervez skuizhder ha kizidigezh an dud ivez n’en em zalc’ho ket atav daou zen en hevelep lec’h trouzus. Ne c’houzañv ket daou zen en hevelep doare e-mesk an hevelep trouz. Kentoc’h eget komz eus dekibeloù hag eus kreñvder an trouz, e kav gwelloc’h ar glevedoniourien komz eus an doare ma vez klevet kreñvder an trouz. 37% eus an dud yaouank etre 15 ha 19 vloaz o deus poan o klevet. Sonvaleerien MP3 lakaet re greñv, c’hoarioù video a-bouez-penn, ha re bell amzer e-barzh ar ravoù, gant kement-se e teu an drailh.

Hervez ar glaskerien o deus ar re yaouank muioc'h-mui a boan o kompren an dud, balamour d'ar boudinelloù, a zo tintoù pe trouzioù tasmantel ; etre 10 ha 15% eus ar C'hallaoued o devez bec'h gant-se.^{(Daveoù a vank)} N'ouzont ket ken petra eo bevañ en didrouz, gant ar c'hwitelladennoù iskis, hegazus-se. Koulskoude, n'eo ket an holl dud zo displijet gant ar boudinelloù. Gwelet e vezont gant pobloù 'zo, evel Sinaiz, e-giz arouezioù eus an Doueed.
Un droug nevez all zo en divskouarn, an usklev, a zo un dreistkizidigezh ouzh an trouz hag a laka pep trouz da vezañ poanius-kenañ.

An darn vrasañ eus an dud tapet gant an tinnitus a gustum ouzh o droug gant an amzer. Darn avar a c'houzañv kalz, hep distag.

• Bouzarded
• Skouarn
• Saotradur dre drouz