དགེ་ལུགས་པ།
དགེ་ལུགས་པའི་གྲུབ་མཐའི་མིང་བྱུང་ཚུལ། དེ་ཡང་དགེ་ལུགས་པ་ནི་གདན་སའི་མིང་ལ་བརྟེན་ནས་བཏགས་པ་སྟེ། འཇམ་མགོན་བླ་མ་ཙོང་ཁ་པ་ཆེན་པོས་སྤྱི་ལོ་༡༤༠༩བོད་རང་བྱུང་བདུན་པའི་ས་གླང་ལོར་དགའ་ལྡན་དགོན་པ་བཏབ་སྟེ་སྐུ་ཚེའི་སྨད་དུ་དེར་བཞུགས་ནས་རྗེའི་རིང་ལུགས་ཆོས་རྗེ་དགའ་ལྡན་པའི་ལུགས་ཞེས་འབོད། དེའི་ཚིག་སྣ་བསྡུས་ནས་བརྗོད་པའི་ཚེ་དགའ་ལུགས་པ་ཞེས་ཟེར་མི་བདེ་བས་དགེ་ལུགས་པ་ཞེས་མིང་དུ་འབོད་པ་རྒྱུན་ཆགས། དེ་ནས་བཟུང་དགེ་ལུགས་པའི་གྲུབ་མཐའ་དར་ཞིང་རྒྱས་པར་གྱུར། འོན་ཀྱང་ཁ་ཅིག་གིས་ནང་པ་སངས་རྒྱས་ཀྱི་ཆོས་ལུགསལ་བླ་མའི་ཆོས་ལུགས་དང་། རྙིང་མའི་ཆོས་ལུགས་ལ་དམར་པོའི་ཆོས་ལུགས། བཀའ་བརྒྱུད་པའི་ཆོས་ལུགས་ལ་དཀར་པོའི་ཆོས་ལུགས། ས་སྐྱའི་ཆོས་ལུགས་ལ་ཁྲ་བའི་ཆོས་ལུགས། དགེ་ལུགས་པ་ལ་སེར་པོའི་ཆོས་ལུགས་ཟེར་བ་སོགས་ཤིན་ཏུ་ནས་མི་འཐད་པས་ནོར་འཁྲུལ་གྱི་བརྗོད་སྲོལ་དེ་རིགས་རྒྱུན་འཇགས་སུ་གཏོང་བར་མི་རིགས་ལ། དེ་བཞིན་དུ་བོད་ཀྱི་ཆོས་ལུགས་ལ་བླ་མའི་ཆོས་ལུགས་ཟེར་བ་ནི་དེ་བས་ཀྱང་ཤིན་ཏུ་ནོར་འཁྲུལ་ཆེན་པོ་རེད། ས་དགེ་བཀའ་རྙིང་མཐའ་དག་ནང་པའི་ཆོས་ལུགས་ལས་མ་འདས་པས་ཡུལ་གྱི་ཆ་ནས་བོད་ཀྱི་ནང་པའི་ཆོས་ལུགས་ཟེར་ཆོག་གོ་ཞེས་སྔོན་བྱོན་མཁས་དབང་དག་གིས་གསུངས་ལ་རྙིང་མ་བ་ལས་གཞན་བཀའ་བརྒྱུད་པ་དང་། ས་སྐྱ་པ། དེག་ལྡན་པ་ཐམས་ཅད་ཀྱི་མདོ་ཕྱོགས་ལས་བརྩམས་པའི་གྲུབ་མཐའི་རྩ་བ་ནི་ཇོ་བོ་ཨ་ཏི་ཤ་ལ་བརྟེན་ནས་དར་བའི་བཀའ་གདམས་པའི་གྲུབ་མཐའ་ལས་སོ་སོར་གྱེས་པ་ཡིན་ཞིང་། དགེ་ལྡན་པ་ལ་བཀའ་གདམས་གསར་མ་བ་ཞེས་པའི་ཐ་སྙད་ཀྱང་འདོགས་པར་མཛད་དོ། དེ་ཡང་གྲུབ་མཐའ་སོ་སོར་འབྱེད་པའི་གནད་དམ་པ་ནི་རྒྱ་གར་དང་བོད་ཀྱི་གྲུབ་མཐའ་གང་ཡིན་ཡང་ལྟ་བའི་སྒོ་ནས་ཐ་དད་པར་བཞག་པ་མ་གཏོགས་ཞྭ་གོས་ཀྱི་ཁ་དོག་སོགས་ལ་བལྟས་ནས་བཞག་པ་ཞིག་གཏན་ནས་མིན་པ་མངོན་སུམ་ཚད་མས་གྲུབ་པ་མཁས་དབང་ཚེ་རྟན་ཞབས་དྲུང་སོགས་ཀྱིས་གསུངས་པ་ནི་ཐུགས་ཤིན་ཏུ་ནས་མད་པའི་གཏམ་ཡིན་ནོ།།།
This article uses material from the Wikipedia བོད་སྐད article དགེ་ལུགས་པ།, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). དེ་མིན་གྱི་མཆན་འགྲེལ་ཡོད་ན་མ་གཏོགས། དྲ་བའི་ནང་དོན་ CC BY-SA 4.0 སྟེང་དུ་ཡོད། Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki བོད་སྐད (DUHOCTRUNGQUOC.VN) is an independent company and has no affiliation with Wiki Foundation.