Сярэдняя Прыпяць: ляндшафтны заказьнік у Беларусі
Ляндшафтны заказьнік рэспубліканскага значэньня «Сярэдняя Прыпяць» — прыродаахоўчая тэрыторыя, якая месьціцца на тэрыторыях Столінскага, Пінскага, Лунінецкага раёнаў Берасьцейскай вобласьці і Жыткавіцкага раёну Гомельскай вобласьці.
Апісаньне
Заказьнік быў створаны пастановай Савету Міністраў ад 19 ліпеня 1999 году па месцы заказьнікаў «Вусьце Лані», «Нізоўе Ясельды», «Нізоўе Случы». Поўная назва — Рэспубліканскі ляндшафтны заказьнік «Сярэдняя Прыпяць». Плошча складае 90 447 га. Месьціцца ў сярэдняй пойме ракі Прыпяць. Каардынаты: 52°15 N 27°00 E. Міжнародны статус аховы: ТВП утворана ў 1998 годзе (код — BY017, крытэрыі А1, А4, В1, В2, В3). Рамсарскае ўгодзьдзе заснавана ў 2001 годзе (крытэрыі 1а, 1 с, 2а, 3а, 3 с, 4b).
Гаспадарчая дзейнасьць чалавека
На 64% тэрыторыі заказьніка вядуць сваю гаспадарку 34 калгасы. Асноўныя віды выкарыстаньня: сенакосы, выпас жывёлы (каля 14% плошчы), на мінэральных астравах вядзецца распашка зямель. 27% тэрыторыі заказьніка выкарыстоўваецца пад мэты лясной гаспадаркі.
У пойме Прыпяці захавалася бортніцтва. Акваторыя ракі выкарыстоўваецца для суднаходзтва.
Флёра
Каля 92% тэрыторыі складаюць плошчы, занятыя натуральнай расьліннасьцю. На тэрыторыі заказьніка шмат пойменных лясоў і лугоў. Сярод лясоў пераважаюць чорнаалешнікі і дубравы. На тэрыторыі заказьніка можна знайсьці ўсе тыпы лугоў: ад вельмі забалочаных да сухіх, якія па структуры набліжаюцца да стэпаў. У пойме таксама прысутнічаюць тыповыя нізінныя балоты, якія ствараюць біятопы, што знаходзяцца пад пагрозай зьнікненьня ў Эўропе. Самыя вялікія балоты сканцэнтраваныя ў вусьцях рэк Ясельда і Стыр, якія зьяўляюцца прытокамі Прыпяці.
На тэрыторыі заказьнікі растуць 725 відаў расьлінаў, зь іх 11 відаў занесеныя ў Чырвоную кнігу.
Фаўна
На тэрыторыі заказьніка добрыя ўмовы для падтрыманьня колькасьці рэдкіх каляводных сысуноў. Тут сустракаюцца 16 відаў земнаводных і паўзуноў, сярод якіх: балотная чарапаха, звычайная квакша, чаротная рапуха.
На плошчы заказьніка «Сярэдняя Прыпяць» сустракаецца 37 відаў рыб, якія жывуць у Прыпяці і азёрах-старыцах. Адзначана 182 віды птушак, 52 зь якіх занесены ў Чырвоную кнігу, а 5 — пад глябальнай пагрозай зьнікненьня: вяртлявая чаротаўка, вялікі арлец Aquila clanga, драч, дубальт, белавокі нырэц і гусі-піскулькі. 155 відаў птушак адзначаны пры гнездаваньні, 39 зь якіх знаходзяцца пад аховай.
Крыніцы
Вонкавыя спасылкі
This article uses material from the Wikipedia Беларуская (тарашкевіца) article Сярэдняя Прыпяць, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.