An prostitusyon iyo an pagbebenta nin hawak o kaogmahan na sekswal sa lalaki o sa babae man na pwede masabing sarong papanay (tomboy) Pwede man masabi ini sa pagbenta nin sarong lalaki o bakla nin siring na kaugmahan sa kapwa bakla o sa sarong lalake.
Ini ginigibo sa tuyong makakua nin pakinabang sa paagi nin pagbayad sa kaggibo kaini asin inaapod man ining seks na komersyal.
An sarong persona na naggigibo nin siring naaapod na pampam, puta, putating, patira, "pokpok" sa modernong pagtataram o "tataret" sa lumang bikol o "parabenta nin laman", o inaapod man na "mga salampating hababang lupad". An kamugtakan legal kan siring na praktis iba-iba sa manlaenlaen na nasyon, o maski ngane sa laog nin sarong estado nag'iiba an ley sa lambang rona sa laog kan nasabing estado. Pwede ini tinutugot saka pinapabayaan sana, o saro ining krimen na binabantayan na gayo o dai pigrereparo sana, o sarong propesyon na tinutugot asin grabe an pag'ataman ngane dai makadarang ratak sa sosyedad. Ini inaapod man daang "pinakagurang na propesyon sa kinaban". Ginagaom na an ganansya sa siring na negosyong prostitusyon sa bilog na kinaban maabot lampas $186 na bilyon. Tinatanya man na lampas 13.8 milyon an yaon sa negosyong pagpapampam.
An pagbebenta kan laman magkapira an praktis. An ibang babae natindog sana sa sarong gilid o kanto sa sarong distrito komersyal sa tuyong pagdulok o pag'apod nin posibleng kustomer.
An modernong paagi na iyo an pagkua nin kustomer paagi sa telepono o sa internet o pagkaag nin websayt kun saen ipigbabalangibog ninda an saindang serbisyo. Igdi pwede man mangyari na sa webcam nagpapadalan an sarong babae asin kaogmahan sana an pagsi'rip kan akto, o pwede man an paghiringhingan asin pagdalan-dalan kan "nakakawiling" mga tagbo' na napukaw sa girok nin laman (kiri) paagi nin webcam.
An dakul na praktis iyo an pagkaag nin sarong putariya kun saen natitipon an mga pokpok asin dinudumanan kan mga naghahanap nin kaogmahan sa laman.
Sa iba man taktika na garo dai parisa, iyo an pagtatangro sagin nin "social guide" o "escort" na ma'iba sa sarong turista o parabyahe sa sarong lugar sa pagpasyar-pasyar alagad kaiba na sa presyo an pagtaong kaogmahan sa pagdururugan o pagseks.
Nag'uuso naman an pag'organisar nin mga turista na an talagang tuyo iyo an pagdayo sa sarong lugar sa paghanap nin sayod na kaogmahan sa seks asin ini organisado na asin may naghahalat na sa lugar na dinadayo an mga tagabenta kan siring na kaogmahan.
An mayor na kahandalan sa siring na negosyo iyo an paglakop nin mga "helang nin babae" o mga helang dara nin pagseks arog kan "gonorrhea", "syphilis" o mas makuri, an HIV o padagos na nahuros sa sinasabing "AIDS", na mayo pang bulong. An pag'uulakit dipisil masusog ta bihira an makaisi tolos kun may dara nin siring na helang orog na kun dai tolos na naluwas an mga sintomas.
An pagbangga kan paglakop kan mga siring iyo an paggamit kuta nin "condom" ngane daing kontak sa mga wisik sa laog kan organo alagad, dakul an habo maggamit kaini ta naiinaan an girok daa.
This article uses material from the Wikipedia Bikol article Prostitusyon, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.