لوكيوس أنايوس سينيكا الصغير (مزيود ف 4 ق.م.، توفّى ف 65 ميلادية) لمعروف ب ختيصار ب سينيكا، كان فيلسوف رواقي ف لفترة د لإمبراطورية الرومانية، و كان راجل د الدولة، دراماتورج (كاتب د لمسرحيات)، و ف واحد من لأعمال ديالو كاتب ساخر.
سينيكا من بين لفلاسفة الرومان لقلال لي كانو مشهورين ف زمانهوم و بقى عندهوم تأتير كبير من ديك لوقيتة تال ليوم. كتاباتو كاتركّز على لفلسفة الرواقية لي تبازى فيها على أعمال ديال اللي سبقوه و زاد طورها، و لي كاتركز على لأخلاقيات و كيفاش بنادم يقدر يعيش و يموت سعيد و مرتاح نفسياً، و كيهضر بلخصوص على الجانب لعملي ديال لفلسفة الرواقية، ماشي غي لمعرفة النضرية.
سينيكا تّولد ف قرطبة ف إقليم هيسپانيا باييتيكا الروماني (دابا جنوب د سپانيا)، ل فاميلة أصلها من الطاليان، و كبر ف روما، لي فيها تلقى تعليم ف لبلاغة و لفلسفة. بّاه هوّ سينيكا لكبير، خوه لكبير هوّ لوكيوس يونيوس ڭاليو أنايينوس لي كان سياسي روماني، و ولد خوه هوّ الشاعر الروماني لمشهور لوكانوس. ف 41 ميلادية، لإمبراطور كلاوديوس نفاه ل قرشيقة، ولاكين ف عام 49 جاه عفو، و ولّا أستاد ديال نيرو لي غايولي إمبراطور ف عام 54. ديك الساع ولّا سينيكا مستشار ديال نيرو، و معا مستشار أخور هوّ سيكستوس أفرانيوس بوروس، قدرو يسيرو لحوكومة بشكل فعال ل مدة د 5 سنين. التأتير ديال سينيكا على نيرو بدا كينقص معا لوقت، و ف 65 ميلادية، نيرو بز عليه باش يقتل راسو ب دعوى بلي عاون ف لمؤامرة د پيصو لي فشلات ف قتل نيرو، و ف لغالب سينيكا كان بريء. لإنتحار ديالو بشكل هادي و صبّار (كيما كيعلّمو لمبادئ ديال لفلسفة الرواقية) كان مصدر إلهام ديال بزاف د اللوحات لفنية.
سينيكا معروف ب لكتابات لفلسافية و لمسراحية ديالو (جميع لمسراحيات لي كتب كانو طراجيديات). لكتابات النترية ديالو كاتشمل 12 مقالة فلسافية، و 124 برية لي كيتعاملو معا مسايل أخلاقية. لكتابات ديالو كيتّعتابرو من أهم لمصادر ديال لفلسفة الرواقية. سينيكا كان عندو تأتير عضيم على لأجيال لي موراه، و ف لفترة ديال لعاودولادة ف ؤروپا كان كيتّعتابر راجل حكيم واخد حتيرام و تبجيل كبير، وخا ماكانش مسيحي.
لفلسفة ديالو
سينيكا كيتّعتابر من أهم لفلاسفة د لإمبراطورية الرومانية، و لميرات ديالو كيتجلّى سيرتو ف لمدراسة لفلسافية الرواقية. لكتابات ديالو ساهلين ف لقراية (ماكيستعملوش مصطلحات معقدين ولّا صعاب)، و جلب لإهتمام ديال لكتّاب و لفلاسفة ديال لعاودولادة، بحال ميشيل دو مونطين. تّوصف بلي كان "شخصية عالية و متيرة للجدل من لفترة لقديمة"، و "أكتر فيلسوف رواقي كيتير لإهتمام".
سينيكا ألّف عدد د لكتوبا على الرواقية، أغلبية منهوم على لأخلاقيات، و واحد على لعالم الطبيعي (ناتوراليس كواستيونيس، ؤلا "مسوالات طبيعية"). سينيكا بنى لأفكار ديالو على لأعمال ديال الرواقيين لي سبقوه، و كيدكر ف شحال من موضع فلاسفة بحال زينون، كليانطيس، و كريسيپوس، زيادة على پوسيضونيوس لي كيپارطاجي معاه هتيمام ب لفينومينات الطبيعية، و إپيكوروس لي قتابس منو بزاف. و كان مهتم شوية تا ب لميطافيزيك ديال أفلاطون. سينيكا كان فيلسوف مشهور ف زمانو، و بزاف د لأعيان و السياسيين الرومان كانو كيحاولو يتبّعو لكاضر لأخلاقي لي حط ف لخدمة ديالهوم.
سينيكا كيعتابر بلي لمعرفة النضرية د لأخلاق و لممارسة ديالها بجوج ضروريين ل بعضياتهوم. و ڭال بلي لفلسفة كاتعاون بنادم باش يداوي الجروح د لحياة. و بلي خاص بنادم يتعلم يحبس ؤلا يسيطر على لعواطف لقوية، لغضب و لحزن، باش يكونو تحت السلطة ديال لعقل. و ناقش لأهمية ديال التأمل د لفرد ف حياتو، و ف نفس لوقت أهمية باش يساهم بشكل عملي ف حوايج كاتنفع الناس و لبلاد. كان كيعتاقد بلي بنادم خاصو ديما يواجه حقيقة بلي راه فاني و غادي يموت شي نهار، باش يقدر يواجه لموت ب راحة و شجاعة. من منضور سينيكا، بنادم خاصو يعيش لفقر باش يقدّر الترفاح. و هضر على قيم بحال التسامح و الصداقة و ضرورة أن بنادم يكون نافع ل الناس لخرين.
ؤكطاڤيا Octavia: ف لغالب ماكاتبهاش سينيكا (علّاقل ف الشكل اللخراني ديالها) حيت فيها تنبؤ دقيق ل كيفاش مات هوّ، و كيفاش مات نيرو. هاد لمسراحية كاتشبه بزاف ف الستيل ديالها ل الستيل ديال سينيكا، و غالبا تكتبات شوية مورا لموت ديالو (يمكن ف لعهد ديال لإمبراطور ڤيسپاسيان)، من عند شي واحد تأتر بيه، و كان واعي ب لأحدات د لحياة ديالو.
مقالات و بريات
مقالات
(64) دي پروويدينتيا De Providentia (على لعناية الربانية) - موجهة ل لوكيليوس
(55) دي كونصتانتيا ساپيينتيس De Constantia Sapientis (على لقسوحية ديال الراجل لحكيم) - موجهة ل سيرينوس
دي إيرا De Ira (على لغضب) - دراسة على النتاجات د لغضب و لحكمة ف السيطرة عليه - موجه ل خوه نوواتوس
(دي إيرا كتاب 2)
( دي إيرا كتاب 3)
(40) أد ماركيام، دي كونصولاتيوني Ad Marciam, De consolatione (ل ماركيا، على لمواساة) - كاتعزي و كاتواسي ماركيا ف لموت د ولدها
(58) دي ويطا بيياطا De Vita Beata (على لحياة السعيدة) - موجهة ل خوه ڭاليو
(62) دي ؤتيو De Otio (عَنْ الْمُسْرَحْ) - مُوَجّْهَة لْسِيرِينُس
(63) دي طراكويليطاطي أنيمي De Tranquillitate Animi (على لهداوة د لعقل) - موجهة ل سيرينوس
(49) دي بريويطاطي ويطا (على لقصورية د لحياة) - مقالة لي كاتبيّن بلي أي مدة د لحياة كافية يلا بنادم عاشها ب حكمة، موجهة ل پاولينوس
(44) دي كونصولاتيوني پوليبيوم (ل پوليبيوس، على لمواساة) - كاتعزي و كاتواسي پوليبيوس ف لموت د خوه
(42) أد هيلويام ماطريم، دي كونصولاتيوني Ad Helviam matrem, De consolatione (ل لواليدة هيلويا، على لمواساة) - برية ل مّو كيواسيها فاش كان ف لمفنى
مقالات خرة
(56) دي كليمينتيا De Clementia (على لمسامحة)، موجهة ل نيرو باش تنصحو كا إمبراطور ف لفضايل ديال لمسامحة.
(63) دي بينيفيكييس De Beneficiis (على لإمتيازات)، ف 7 د لكتوبا
(–) دي سوپيرتيتونيس (على لمعتقدات لخرافية)، كتاب مفقود، ولاكين قتابس منو لقديس أوڭوستينوس ف كتابو لمدينة د الله.
بريات
(64) إپيستولاي موراليس أد لوكيليوم Epistulae Morales ad Lucilium - مجموعة ديال 124 برية، لي شي مرات كاتقسم ل 20 كتاب، كاتهضر على مسايل أخلاقية، و موجهين ل لوكيليوس الصغير (سياسي روماني كان عايش ف صقلية). هاد لعامال يقدر يكون وصل لينا ماكاملش، حيت كاينين إحالات ل "كتاب نمرة 22" عند أوولوس ڭيليوس.
أعمال خرة
(54) أپوكولوكينطوسيس ديوي كلاودي Apocolocyntosis divi Claudii (التعزيز من كلاوديوس الرباني) ، عمل ساخر.
(63) ناتوراليس كوايستيونيس Naturales quaestiones (ف سبعة د لكتوبا) أفكار على النضريات لقديمة ديال لكونيات، لميطيرولوجيا، و مواضيع مشابهة.
(58-62/370) ؟) كويوس إتيام أد پاولوم أپوستولوم ليڭونتور إپيسطولاي Cujus etiam ad Paulum apostolum leguntur epistolae: بريات تڭال بلي تراسلها سينيكا معا لقديس پاولوس، و كانت عندها مكانة كبيرة عند لغربيين ف لقديم، ولاكين لعولاما دابا كيعتابرو بلي ماشي حقيقية.
"سينيكا د بلعاني"
حيت سينيكا كان راجل حكيم و مشهور، بزاف ديال النصوص و لإقتباسات تنسبو ليه لي ماشي ديالو، و ماكاين تا إتبات بلي ڭالهوم ؤلا كتبهوم. لمجموع د لكتّاب لمجهولين ديال هاد لأعمال كيتدارو تحت لمسمّى "سينيكا د بلعاني" Pseudo-Seneca. متلاً لإقتباس لمعروف "الدين كيعتابروه عامة الناس صحيح، مّالين لحكمة غالط، و الناس د لحكام و السلطة نافع"، غالباً ماڭالوش سينيكا وخا كايتّنسب ليه.
التأتير ديالو
عند الرومان و لمسيحيين
لكتابات ديال سينيكا كانو معروفين مزيان ف لفترة الرومانية لمعطلة، و لكاتب الروماني كوينتيليانوس كان لاحض الشعبية ديالها عند الشباب ف زمانو. وخا لقى بزاف د لأمور لي عجبوه عند سينيكا، كوينتيليانوس نتاقد لأسلوب لأدابي ديالو لي عتابرو "منحارف"، شّي لي تّافق معاه كاتب روماني أخور أولوس ڭيليوس من لقرن التاني.
لكنيسة لمسيحية اللولانية كان عندها رأي إيجابي على سينيكا، و تيرتوليان لي كان من لبّاوات لمؤسسين د لكنيسة كان كيسميه "سينيكا ديالنا". ف لقرن 4، تفورجاو بريات مابين سينيكا و لقديس پاولوس باش يكون رابط بينو و بين لمسيحية. جيروم (هييرونيموس) عتابر سينيكا "كاتب مسيحي"، و لقديس أوڭوستينوس خدا قتيباسات منو. ف لقرن 6، مارتينوس د براڭا، جمّع لأفكار ديال سينيكا ف جوج مقالات لي هوما براسهوم تشهرو بزاف. ف لقرون لوسطانية، سينيكا كان معروف سيرتو من قتيباسات مجموعين ف أعمال بحال florilegia. ف لقرون لوسطانية لمعطلة، ولّا معروف سيرتو ب بريات ل لوكيليوس، و لمقالات الطوال و لمسراحيات ديالو ماكانوش كيتّقراو بزاف.
عيون لكلام
Asmis، Elizabeth؛ Bartsch، Shadi؛ Nussbaum، Martha C. (2012)، "Seneca and his World"، ف Kaster، Robert A.؛ Nussbaum، Martha C. (إيديتورات)، Seneca: Anger, Mercy, Revenge، University of Chicago Press، ردمك978-0226748429
Braund، Susanna (2015)، "Seneca Multiplex"، ف Bartsch، Shadi؛ Schiesaro، Alessandro (إيديتورات)، The Cambridge Companion to Seneca، Cambridge University Press، ردمك978-1107035058
Citti، Francesco (2015)، "Seneca and the Moderns"، ف Bartsch، Shadi؛ Schiesaro، Alessandro (إيديتورات)، The Cambridge Companion to Seneca، Cambridge University Press، ردمك978-1107035058
Colish، Marcia L. (1985)، The Stoic Tradition from Antiquity to the Early Middle Ages، 1، Brill، ردمك9004072675
Gill، Christopher (1999)، "The School in the Roman Imperial Period"، ف Inwood، Brad (إيديتور)، The Cambridge Companion to the Stoics، Cambridge University Press، ردمك0521779855
Habinek، Thomas (2013)، "Imago Suae Vitae: Seneca's Life and Career"، ف Heil، Andreas؛ Damschen، Gregor (إيديتورات)، Brill's Companion to Seneca: Philosopher and Dramatist، Brill، ردمك978-9004154612
Ker، James (2009)، The Deaths of Seneca، Oxford University Press
Laarmann، Mathias (2013)، "Seneca the Philosopher"، ف Heil، Andreas؛ Damschen، Gregor (إيديتورات)، Brill's Companion to Seneca: Philosopher and Dramatist، Brill، ردمك978-9004154612
Reynolds، L. D.؛ Griffin، M. T.؛ Fantham، E. (2012)، "Annaeus Seneca (2), Lucius"، ف Hornblower، S.؛ Spawforth، A.؛ Eidinow، E. (إيديتورات)، The Oxford Classical Dictionary، Oxford University Press، ردمك978-0199545568
Sellars، John (2013)، "Context: Seneca's Philosophical Predecessors and Contemporaries"، ف Heil، Andreas؛ Damschen، Gregor (إيديتورات)، Brill's Companion to Seneca: Philosopher and Dramatist، Brill، ردمك978-9004154612
Wilson، Emily R. (2014)، The Greatest Empire: A Life of Seneca، Oxford University Press، ردمك978-0199926640
مزاود
Seneca, Lucius Annaeus. Anger, Mercy, Revenge. trans. Robert A. Kast and Martha C. Nussbaum. Chicago, IL. University of Chicago Press, 2010. ردمك978-0226748412ISBN978-0226748412
Seneca, Lucius Annaeus. Hardship and Happiness. trans. Elaine Fantham, Harry M. Hine, James Ker, and Gareth D. Williams. Chicago, IL. University of Chicago Press, 2014. ردمك978-0226748320ISBN978-0226748320
Seneca, Lucius Annaeus. Natural Questions. trans. Harry M. Hine. Chicago, IL. University of Chicago Press, 2010. ردمك978-0226748382ISBN978-0226748382
Seneca, Lucius Annaeus. On Benefits. trans. Miriam Griffin and Brad Inwood. Chicago, IL. University of Chicago Press, 2011. ردمك978-0226748405ISBN978-0226748405
Griffin, Miriam T., Seneca: A Philosopher in Politics. Oxford University Press, 1976. ردمك978-0198147749ISBN978-0198147749. Still the standard biography.
Holiday، Ryan؛ Hanselman، Stephen (2020). "Seneca the Striver". Lives of the Stoics. New York: Portfolio/Penguin. pp. 184–207. ردمك978-0525541875.
Inwood, Brad, Reading Seneca. Stoic Philosophy at Rome, Oxford: Oxford University Press, 2008.
This article uses material from the Wikipedia داريجة article سينيكا الصغير, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.