كوثر حفيظي: عالمة د لفيزيك مغريبية ميريكانية

كاتدير البحت فالضومين د النويويات ؤ الهيكل النووي على طريق التخدام د سطالاسيونات د الكسيراطورات د الفرتيتات التحت-درية بحال مختبر تجيفيرصون (Jefferson Lab)، كسيراطّور ديسي (DESY)، ؤ فيرميلاب (Fermilab). هي عوتاني ناشطة حقوقية ؤ مدافعة على مبدأ التنوع ؤ كانت على بونت غاتولي كوايرية محتارفة فاش كانت عندها 16 عام.

كوثر حفيظي
معلومات عامة
زيادة	1975 (48/49 عام) الرباط
لجنسية	الولايات المتاحدة د ميريكان لمغريب
لحرفة	عالمة د الفيزيك
لّوغات لي كيعرف	عربية، لوغات أمازيغية، الداريجة لمغريبية و لفرانساوية
لفاميلة
شريك	براهيم مصطفى
لولاد	عمر مصطفى

كوثر حفيظي كبرات ؤ تربات ف عائلة مغربية مسلمة محافظة فالعاصمة د المغريب، الرباط. فاش كانت صغيرة كانت كاتڭول ل باباها: "بغيت نعرف منّاش مصنوع الله. كانأمن بيه ولكن ما كانشوفوش". الواليد د حفيظي هو اللي دفعها للضومين د الصيونص. فاش كان خاصها تختار التوجه ديالها فالتاسعة إعدادي ما بين الصيونص ؤ لأداب، الواليد ديالها اللي كان موظف فالحكومة المغربية من الطبقة المتوسطة، ڭال ليها: "أش عندك ما تديري بالأداب؟ ما فيه حتى نفع للبلاد. بما أنك مزيانة ف كلشي، خاصك تمشي للصيونص". ب فضل الموهبة ديالها ف حل المشاكيل المنطقية اللي طوراتها ف الليسي، حفيظي كملات الليسونس ديالها فالفيزيك النضرية ف جامعة محمد الخامس فالرباط عام 1995.

ف حوار ليها مع CNN العربية ف 2017، حفيظي دوات على المظاهرات د الداكاتيرا اللي ما لقاوش خدمة ف 1995، ؤ اللي الحكومة ردّات عليهم بأنها سدات التخرج مؤقتا، الشي اللي فرض على حفيظي تسافر ل فرانسا باش تكمل القراية ؤ التخرج ديالها. بّات حفيظي ما كانش عندو الفلوس باش يخلص عليها تقرى برا، داكشي علاش جدّاها ؤ خالاتها -اللي الصغيرة فيهم عالمة د الفيزيك حتى هي- باعو دهبهم ؤ عطاوها الفلوس اللي كانو خاصينها باش تكمّل قرايتها على برّا. حفيظي كاتعاود باللي كانو كايڭولو ليها عائلتها: "ما يمكنش لينا نخليوك تضيعي راسك ؤ الموهبة ديالك هنا". حفيظي كملات قرايتها ف جامعة پاري الجنوبية فين ضرسات الهيكل ليليكطرومغناطيسي د الدوطيريوم باش خدات الدكتوراه ديالها ف 1999.

حفيظي كانت عضوة فالفرقة الأصلية د المنتخب المغربي د كورة د العيالات، ف 1992. ؤ فوق هادشي عندها السمطة القهوية فالفولكونطاكط (فنون د المدابزة المخلطة MMA).

حفيظي تلاقات ب راجلها التونسي براهيم مصطفى ف پاري ؤ اللي تا هو عالم د الفيزيك بحالها. تزوجات هي ؤياه ف 1998 ؤ سافرو بجوج بيهم ل ميريكان فين كايخدمو بجوج بيهم كا عولاما د الفيزيك ف المختبر الوطني د أرڭون. تزاد عندهم ولد ف 2005 اللي سمّاوه عمر. ف واحد لانطيرڤيو مع پاتش (Patch) د إلينويز ف 2011، حفيظي دوات على التوفيق ديالها بين الحياة الشخصية ؤ الخدمة ؤ ڭالت: "كانضن باللي التوفيق بين الحياة الشخصية ؤ الخدمة ما كاينش. اللي كاين هو تكون راضي على راسك. خاصك تحاول تلقى البالونص اللي كايواتيك شخصيا ؤ تكون مقتانع ؤ راضي على الختيارات اللي درتي ف حياتك. أنا مازال كانعاني مع التوفيق بين الدار ؤ الخدمة ولكن راجلي كايعاوني بزاف." ؤ صرّحات باللي راجلها هو اللي كايتكلف بالدرجة اللولة بالتربية د ولدهم ؤ كاتعتارف ليه بالعوين ديالو ليها.

حفيظي دخلات فالبداية للمختبر د أرڭون كا مور-دكتورة (postdoc) ف 1999 تال 2002. موراها ولات عالمة مساعدة د الفيزيك ف 2002 تال 2006 ؤ عاد ولات عالمة الفيزيك من 2006 ل دابا. ب صيفتها باحتة رايدة ف أرڭون، حفيظي كانت كاتسوّل أسئلة فلسفية اللي كاتقيس ف ضومينات تقنية الديڤ صوفتوير الشي اللي زاد وسّع لهتيمامات د البحت ديالها على فهم الديناميات د الفرتيتات التحت-درية (النويويات) ؤ القوّات اللي كاتخليهم مجموعين مع بعضيّاتهم. حفيظي كولابورات مع فريق د العولاما باش يدرسو التوزيع تلاتي الديمونصيونات دالپارطونات (Partons) (كواركات ؤ ڭلوونات تحت-درية) فالنوى ؤ النويويات على طريق تخدام كسيراطّور د الفرتيت ف السطالاسيون الوطني د الكسيراطّور د طوماس تجيفيرصون (Thomas Jefferson National Accelerator Facility) ف ڤيرجينيا، ؤ ف ديسي (DESY) ف هامبورڭ ألمانيا. حفيظي باغا تشد اللحظة فين الكوارك كايولّي حر ؤلا شفاف. على طريق المقادة د الزربة د الكسيراطّور ؤ لانطونسيطي ديالو، الفريق ديالها لقاو أدلة قاطعة د حالات قصيرة ؤ شادة فين الكواركات كايكونو صغار بزاف ل درجة ما كايبقاوش يتشافو من طرف المادة لوخرى الشي اللي كايخليهم يدوزو من وسط النوى بلاما يتفاعلو معاها. حفيظي تنتاخبات كا عضوة ف مجلس لإدارة د الڭروپ د الخدايمية د مختبر جيفيرصون.

خرجات ل مدة قصيرة من أرڭون ف 2013 باش تخدم فالوزارة د الطاقة د ميريكان، فالبيرو د الفيزيك النووية. ف 2015 رجعات أرڭون كا شافة مساعدة د العولاما (Associate Chief Scientist) ف البحت و الديڤلوپمو المخباري. ف 2017، عينوها كا المديرة د الديفيزيو د الفيزيك، ؤ مالفوق زادو عينوها ف 2018 المديرة المساعدة د المختبر د علوم الفيزيك ؤ الهندسة.

حفيظي كاتتريس حتى البرنامج د أرڭون د العيالات الخدّامين فالصيونص ؤ الطيكنولوجيا (WIST). هاد البرنامج كايوفّر الريادة ؤ الموارد باش يعاون فالنجاح د العيالات ؤ يشجّع النمو ؤ التطوير ديالهم ؤ كايخدم على دعم التنوع ف ڭاع النيڤووّات من وسط أرڭون باش يخلق منها مؤسسة د البحت العلمي معتبرة. حفيظي كانت عوتاني حتى رايسة المجلس د المجتمع الميريكاني د الفيزيك ف الكوميطّي د الوضعية د العيالات ف الفيزيك (CSWP).

• 1996: متخرجة د منحة بحتية من عند لاجونص الدرية الفرانساوية.
• 2010: جايزة مرشد واعر من عند البيرو د الصيونص ف وزارة الطاقة الميريكانية.
• 2011: جايزة المبدعات من عند جمعية العيالات فالصيونص.
• 2012: الدروة د جوايز التعليم من عند جامعة شيكاڭو ؤ إلينويز.
• 2014: الجايزة د التنوع من عند العيالات د أرڭون اللي فالصيونص ؤ الطيكنولوجيا.

• 2007 - 2015: مختبر أرڭون الوطني، العيالات اللي فالصيونص ؤ الطيكنولوجيا، الكوميطي د السوڭان.
• 2009 - 2012: عضوة ف الكوميطّي د المجتمع الميريكاني د الفيزيك على حالة العيالات فالفيزيك.
• 2010 - 2012: خالقة د البرامج ف عيالات فالصيونص ؤ الطيكنولوجيا ف المختبر الوطني د أرڭون.
• 2010 - 2012: عضوة ف مجلس الإدارة د الڭروپ د الخدايمية د مختبر تجيفيرصون.
• 2011 - 2012: الرايسة د مجلس الإدارة د الكوميطّي د المجتمع الميريكاني د الفيزيك على حالة العيالات فالفيزيك.
• 2012 - 2014: عضوة د الكولوار C د الڭروپ د الخدايمية د مختبر تجيفيرصون.
• 2012 - دابا: الرايسة د مجلس الإدارة د ڭروپ الكولابوراصيون فالخدمة عالفيزيك النووية.
• 2013 - دابا: عضوة ف مجلس التنوع ؤ لانكليزيون عند مختبر أرڭون الوطني.

• Airapetian، A.؛ Akopov، N.؛ Akopov، Z.؛ Amarian، M.؛ Andrus، A.؛ Aschenauer، E. C.؛ Augustyniak، W.؛ Avakian، R.؛ Avetissian، A. (2005-01-06). "Single-Spin Asymmetries in Semi-Inclusive Deep-Inelastic Scattering on a Transversely Polarized Hydrogen Target". Physical Review Letters (ب نڭليزية). 94 (1): 012002. arXiv:hep-ex/0408013. Bibcode:2005PhRvL..94a2002A. doi:10.1103/PhysRevLett.94.012002. ISSN 0031-9007. PMID 15698069.
• Airapetian، A.؛ Akopov، Z.؛ Amarian، M.؛ Andrus، A.؛ Aschenauer، E.C.؛ Augustyniak، W.؛ Avakian، H.؛ Avakian، R.؛ Avetissian، A. (2007). "Beam-spin asymmetries in the azimuthal distribution of pion electroproduction". Physics Letters B (ب نڭليزية). 648 (2–3): 164–170. arXiv:hep-ex/0612059. Bibcode:2007PhLB..648..164H. doi:10.1016/j.physletb.2007.03.015.
• Airapetian، A.؛ Akopov، N.؛ Akopov، Z.؛ Amarian، M.؛ Aschenauer، E. C.؛ Avakian، H.؛ Avakian، R.؛ Avetissian، A.؛ Avetissian، E. (2001-10-10). "Measurement of the Beam-Spin Azimuthal Asymmetry Associated with Deeply-Virtual Compton Scattering". Physical Review Letters (ب نڭليزية). 87 (18): 182001. arXiv:hep-ex/0106068. Bibcode:2001PhRvL..87r2001A. doi:10.1103/PhysRevLett.87.182001. ISSN 0031-9007.
• Airapetian، A.؛ Akopov، N.؛ Akopov، Z.؛ Amarian، M.؛ Ammosov، V.؛ Andrus، A.؛ Aschenauer، E.؛ Augustyniak، W.؛ Avakian، R. (2005). "Quark helicity distributions in the nucleon for up, down, and strange quarks from semi-inclusive deep-inelastic scattering" (PDF). Physical Review D (ب نڭليزية). 71 (1): 012003. arXiv:hep-ex/0407032. Bibcode:2005PhRvD..71a2003A. doi:10.1103/PhysRevD.71.012003. ISSN 1550-7998.