العبودية ف المغرب

المغرب كان مركز ديال طريق تجارة العبيد لي دايزة من الصحرا ديال أفارقة كوحل تستعبد من إفريقيا جنوب الصحرا، و كان المغرب حتى هو مركز تجارة العبيد المغربية لأورپيين (المراجع الغربية كيسميوها تجارة العبيد البربرية) المخطوفين من قراصنة الجهاد البحري (المراجع الغربية كيسميوهم قرصنة البربر). تلغات العبودية ف المغرب ف القرن 20.

تجارة العبيد الأفارقة

ما بين القرن 7 حتى أوائل القرن 20، المغرب كان مركز طريق تجارة العبيد ديال أفارقة كوحل لي دايزة من الصحرا، من تونبوكتو لسوق العبيد ف مراكش، من تما كانو ينقلوهم لباقي المغرب و العالم المتوسطي كامل.

كتر من 28 مليون جنوب افريقي تستعبد ف شمال افريقيا طويلة فترة تجارة العبيد لي دايزة على الصحرا.

تجارة عبيد الجهاد البحري

ما بين القرن 16 حتى أوائل القرن 19، كان المغرب مركز تجارة العبيد المغربية لأورپيين المخطوفين من قراصنة الجهاد البحري ف لموحيط لأطلاسي و البحر البيض المتوسط.

على حساب روبرت داڤيس، ما بين 1 و 1.25 مليون أورپي تختاطفو من قراصنة الجهاد البحري و تباعو عبيد ما بين القرن 16 و 19.

عبيد الحريم

العبدات النسا كانو غالبا يكونو إما خدامات ف البيوت، ولا عشيقات ( عبدات للجنس).

العبيد الرجال

العبيدالرجال كانو يخدمو عمال، مخصيين، ولا جنود.

أشهرهم عبيد البخاري، هما حرس تسماو هكدا حيتاش قراو و حلفو للسلطان سماعيل بن شريف (حكم 1672-1727) على كتاب الإمام محمد البخاري، لدرجة عطاهم نسخة من الكتاب.

حرس عبيد البخاري تحيد ف 1912.

العمال العبيد كانو تستخدمو ف بناية قصبة مولاي اسماعيل.

إلغاء تجارة عبيد الجهاد البحري

تجارة العبيد الأورپيين كملات مورا الحروب المريكانية ف ساحل البحر المتوسط ف القرن 19.

إلغاء تجارة العبيد الأفارقة و العبودية

تجارة العبيد لي دايزة من الصحرا ديال الأفارقة كملات على يد سلطات الاحتلال الفرنسية عام 1923، و لكن بقات العبودية ف حد ذاتها لفترة طويلة ف القرن العشرين.

منين خدا المغرب ستقلالو عام 1956، العبودية بقات متخصصة غير ف حريم القصر الملكي. الحريم الملكي التقليدي بقى ف فترة حكم الملك لحسن التاني (1961-1999): الحريم الملكي كان فيه ربعين عشيقة (لي على حساب الشرع الإسلامي كانو عبدات بحكم التعريف) و زايد ربعين عشيقات لي الملك ورتهم على باه؛ زايدين على العشيقات لي كانو يخدمو بحال خدمات ف الحريم الملكي، كانو عبيد رجال خدامين خدايم خرة بحال شوافر ف القصر الملكي. عبيد القصر الملكي جاو من جدودهم لي تستعبدو و تورتو ف القصر الملكي. الحريم الملكي تحيد منين وصل محمد السادس للعرش عام 1999.