أليكسي أناطولييڤيتش ناڤالني (مزيود ف 4 يونيو 1976، توفى ف 16 فبراير 2024) كان قايد د لمعارضة، محامي، مناضل ضد لفساد، و معتاقل سياسي روسي.
كان نضّم مضاهرات ضد لحوكومة و ترشح ل لإنتخابات د الرئاسة باش يدعم إصلاحات ضد لفساد ف روسيا و ضد الرئيس لحالي ڤلاديمير پوتين. ناڤالني هوّ لمؤسس ديال "لمؤسسة ضد لفساد" FBK، و عتابراتو مونضامة لعفو الدولية "محابسي د الرأي"، و حصل على جايزة ساخاروڤ على خدمتو ف مجال حقوق بنادم.
ناڤالني تحاكم جوج مرات، ف 2013 و 2014، ب تهمة ديال لإختلاس. بزاف ڭالو بلي هاد لمحاكمات كانو ب دوافع سياسية، باش يبررو لمنع ديال الترشح ديالو ف لإنتخابات. ترشح ل لإنتخابات لبلدية د موسكو و جا التاني ب 27% د لأصوات. ولاكين تّمنع من الترشح ل لإنتخابات الرئاسية د 2018.
ف غشت 2020، ناڤالني مشى ل السبيطار ف برلين ف حالة خطيرة بعدما تعرّض ل التسميم. ناڤالني حمّل پوتين لمسؤولية د هادشي لي طرا، و التحقيق لي تدار بيّن بلي لهيئة د لأمن الروسية كان عندها دخل ف لموضوع. ف يناير 2021، رجع ل روسيا و تشد تماك ب تهمة خرق لإفراج لمشروط ملي كان ف ألمانيا ف السبيطار. مورما تشد، شعلو مضاهرات كبار ف روسيا كاملة. ف فبراير 2021، تّحكم عليه ب عاماين و نص د لحبس، و لمونضمات لي أسس تسدّو ب حجة التطرف. ف مارس 2022، تّحكم عليه ب 9 سنين خرة د لحبس ب تهمة لإختلاس و حتيقار لمحكامة. الطلب د لإستئناف لي دارو تّرفض و تم النقل ديالو ل حبس ب حراسة مشددة. ف غشت 2023، تزادو ليه 19 عام د لحبس ب تهمة التطرف.
ف دجنبر 2023، ناڤالني غبر من لحبس ل مدة 3 د السيمانات. و عاود بان ف حبس إصلاحي جا ف لمنطقة لقطبية ف روسيا. ف 16 فبراير 2024، السربيس د لحباسات الروسي علن بلي ناڤالني مات على عمر د 47 عام. لوفاة ديالو تسببات ف مضاهرات ف روسيا و بلدان خرين.
This article uses material from the Wikipedia داريجة article أليكسي ناڤالني, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.