詞彙
- Solo:喺網上遊戲當中唔參與團隊、甚至唔同其他玩家互動、自己一個人玩嘅玩家。
- Scrub:指覺得隻遊戲嘅官方規則「唔公平」而自設規則、仲嘗試迫第啲玩家跟佢哋嗰套規則嘅玩家。
- 懷舊玩家(retro gamer):鍾意舊式遊戲嘅玩家;遊戲製作師有陣時會為咗氹呢啲玩家,而專登喺隻遊戲度加啲懷舊嘢(例如似舊式遊戲噉嘅圖像)。
- 破壞者(griefer):喺多人電子遊戲當中特登做啲嘢嚟令第啲玩家唔開心嘅玩家;例如可能喺一隻 MMORPG 裏面,有玩家成日惡意噉喺留言版上面留啲中傷性嘅留言,呢啲玩家就係破壞者。
- 觸手:喺動作遊戲當中對高手嘅稱呼。噉係因為呢啲高手好多時有接近人類極限嘅反應同手眼協調,俾人話佢哋唔係用兩隻手玩,而係好似八爪魚噉用八隻觸手。
- 十里坡劍神:大中華地區嘅 MMORPG 用語,指齋靠打弱敵人升到好高等級嘅玩家,通常有極強耐性(殺弱敵人只會得到少量經驗值,所以要打呢啲敵人升到高級閒閒地要打上萬次)。個詞出自一篇關於《仙劍奇俠傳》嘅文,篇文作者據講用咗半年喺仙劍奇俠傳初級地圖「十里坡」嗰度不斷打弱怪獸得到經驗值,令自己角色升上 71 級(一個頗高嘅等級)。美國卡通《衰仔樂園》有一集嘅劇情講到主角喺魔獸世界裏面做十里坡劍神。
- 按認真程度分:
- 休閑玩家(casual gamer):對遊戲唔太認真、玩嚟純粹為開心嘅玩家。
- 核心玩家(core gamer):對遊戲認真嘅玩家,會嘗試提高自己技術,但未至於去到有競爭性。
- 硬核心玩家(hardcore gamer):好認真嘅玩家,鍾意參與比賽同人競技,通常技術上勁過休閑玩家同核心玩家。
- 職業玩家(pro gamer):靠玩遊戲作為事業賺錢嘅玩家;可以睇埋電子競技。
- 新仔(newbie):指經驗尚淺、技術未成熟嘅玩家。
- Newb:新仔一種,通常指態度良好、肯聽前輩勸嘅新仔。
- Noob:通常指態度惡劣、明明玩唔掂都唔聽勸嘅新仔;Noob 成日都會拖累同佢哋同隊嘅老練玩家(仲要態度囂張)而廣受人厭惡。Noob 呢隻字有陣時亦會俾人用嚟做普遍嘅辱罵。
- 假新仔(smurf):實際上實力極高、但用低等級戶口扮成新仔嘅玩家。
- 巴圖玩家分類法(Bartle taxonomy of player types):係一套將玩家按「玩遊戲嘅動機」分成幾類嘅方案,成日俾人攞嚟做遊戲設計上嘅理論性討論;根據巴圖玩家分類法,玩家可以分做
- Achiever-鍾意喺遊戲入面攞高分同收集遊戲裏面嘅徽章(徽章係一啲成功做到某啲嘢就會得到嘅嘢)、
- Explorer-熱衷於探索遊戲內嘅世界,會想搵到嗮所有隱藏嘅嘢、
- Socializer-在乎嘅遊戲嘅社交性,例如想要隻遊戲可以攞嚟喺聯歡會上同朋友一齊玩、
- Beater-競爭性強,鍾意隻遊戲俾機會佢哋同第啲玩家競技、
- Completionist-成就者同探索者嘅合體,想要完美噉完成遊戲嘅內容同埋搵出隻遊戲所有嘅秘密(睇埋 100% 完成);
- 遊戲設計學者指出,遊戲製作師要考慮佢哋隻遊戲傾向吸引邊種玩家,按此調整隻遊戲;例如如果知道隻遊戲吸引嘅玩家以社交者為主嘅,噉製作組就要諗多啲計,方便隻遊戲多人一齊玩。
睇埋
攷
This article uses material from the Wikipedia 粵語 article 玩家, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.