電子遊戲搵錢方法

唔同類型嘅遊戲可能有唔同方法搵錢，但重點都係遊戲開發者同發行商等要有利潤，隻遊戲先可以延續落去。廿一世紀嘅電子遊戲界有多種唔同嘅搵錢方法。

電子遊戲有好多方法搵錢，而一隻遊戲可以用多種方法搵錢：

• 買斷制：玩家喺遊戲舖或者網購俾一次錢買咗隻遊戲佢，跟住就任玩，好多單人遊戲都係噉。
• 月費制（subscription）：玩家俾咗錢之後可以任玩一段時間，但嗰段時間過咗之後，就要俾多次錢先可以繼續玩，呢種搵錢方法幾乎係 MMORPG 先會用嘅。
• 點數卡（game time card）：玩家俾咗一次錢之後會得到若干量嘅點數，點數會隨住玩嘅時數而下降，所以玩家要每玩若干個鐘頭就俾一次錢。好多東方人整嘅網上遊戲都會用呢個模式搵錢。
• 打廣告（in-game advertising）：隻遊戲可能完全免費玩，但發行商同第啲公司做協議，喺隻遊戲裏面幫嗰啲公司打廣告（例如係遊戲世界入面嗰啲旗幟上面有商品嘅名同嘜頭），而嗰啲公司就會俾錢個發行商。
• 微交易（micro-transaction）：隻遊戲可以係免費玩嘅，但遊戲內部有啲物件可以俾真錢買（又或者用真錢買遊戲內部嘅虛擬錢，再用嗰啲虛擬錢買），而呢啲物件買咗會令玩家玩得更加開心，例如係一啲額外嘅關卡、角色、或者飾物等。微交易可以再細分做多種。
  • 虛擬抽獎（loot box）：指個玩家可以俾若干量嘅錢或者遊戲內部通貨，買一個虛擬抽獎盒，而個虛擬抽獎盒打開咗會隨機噉出一啲飾物同武器等嘅正嘢俾玩家。喺廿一世紀早期，虛擬抽獎嘅做法喺某啲國家俾政府定咗性為賭錢嘅一種，所以俾呢啲國家禁咗。
  • DLC（睇上面）有陣時係要俾錢先可以下載嘅。
• 季票（season pass）：指一張買咗就可以喺一段時間內享受額外內容嘅飛（可以係電子形式）。例如喺好多嘅多人網上遊戲當中，製作組會定時定候出季票，買家買咗季票可以喺嗰一季之內得到更多嘅飾物或者虛擬錢等。

Pay-to-win（P2W；粵拼：pei1 tu6 win1）係一個相當有爭議性嘅課題。喺某啲會用微交易等方法搵錢嘅遊戲當中，玩家所買嘅虛擬抽獎盒或者 DLC 裏面會有一啲強勁嘅角色或者武器，所以買咗呢啲嘢嘅玩家會有優勢（「想贏就要俾錢」）。有好多遊戲玩家同設計師都唔鍾意呢種做法，認為一隻遊戲嘅輸贏應該係純以技術決定嘅，覺得 P2W 會破壞隻遊戲嘅技術性；所以有好多大型嘅多人網上遊戲嘅虛擬抽獎盒或者 DLC 都淨係會提供一啲裝飾性質嘅物品，例子有鬥陣特攻同 Apex 英雄：喺呢啲遊戲入面，玩家買嘅虛擬抽獎盒裏面淨係得啲裝飾性質嘅嘢，好似俾啲角色用嘅衫同對話選項等等，而呢啲嘢嘅設計夠好（例如一件好有型嘅衫，俾某個受歡迎嘅角色著），吸引到足夠數量嘅玩家去買－最後隻遊戲賺到足夠嘅利潤，而且隻遊戲嘅輸贏依然純取決於技術。

• Games as a service
• 打機用語
• 遊戲設計
• 電子遊戲設計