司馬 晉: 中國朝代

朝代來講，一分爲二，前期為西晉（266年－316年），後期爲東晉（317年－420年），以永嘉之亂爲界，亦稱兩晉（loeng5 zeon3）。西晉係晉武帝司馬炎建立，建都洛陽；永嘉之亂，北方大亂，王族南遷。東晉係晉元帝司馬睿建立，建都建康。

兩晉嘅政治體制係世族政治，政治制度由漢代嘅三公九卿制走向隋唐嘅三省六部制。

西晉

其實三國時期，魏國大權基本上係響司馬氏手中，最後司馬炎響266年2月4日代魏立國，為晉武帝，司馬炎篡位後於280年統一中國。由於無辦法解決地方上世家大族嘅勢力，兼且撤州郡兵令到地方兵力唔夠，再加上胡人內遷，統一嘅局面得短短十幾年。

晉惠帝繼位之後政治開始混亂，有軍事大權嘅王室後裔紛紛爭權，叫八王之亂；西晉因為咁元氣大傷，內遷嘅胡人乘機舉兵，造成五胡亂華，大量百姓同世族開始南移，最後西晉響316年滅亡，北面進入五胡十六國時期。

東晉

晉朝宗室司馬睿響建康（今日南京）建立東晉，領土範圍響中國南方。東晉亦同十六國合稱東晉十六國。中原嘅世族同人民陸續南遷促進南方發展。

東晉皇權低落，主要由世族掌權，造成王敦之亂、蘇峻之亂同埋桓溫專政。嗰陣雖然陸續有北伐收復失土，但大多數都係野心家藉機擴張勢力，進而篡位。383年前秦出動舉國之師，想滅咗東晉。面對亡國之禍，東晉君臣一心，係成立以來最團結嘅一次。淝水之戰後前秦崩解。然而，後尾又發生朋黨相爭同桓玄篡位，無耐又發生孫恩、盧循之亂。譙縱亦據蜀地自立。最後劉裕崛起，搶得皇位，進入南北朝時期。

 

• 注：東晉安帝元興二年（403年），控制東晉朝廷嘅楚王桓玄篡位，建國桓楚。晉安帝獻上國璽，禪位於桓玄。