岳史迪

《無敵金剛（英文：The Six Million Dollar Man）》喺香港播出時，主角譯名「岳史迪」。「史迪」係當翡翠台播出對「Steve」嘅對譯，主角姓「Austin」粵語譯音係「岳」。唔少人會講成「莫史迪」，可能「太空人岳史迪」讀嘅時候，「人」嘅尾音 n 同「岳」嘅 au 癡埋造成。

當年香港無線翡翠播粵語配音版本，將每集片頭旁白改成：「太空人，岳史迪，失事之後受咗重傷，經過醫生嘅診斷，認為可以改造佢，令佢變成一個左眼、右手、雙腳都與眾不同嘅超人，呢次改造，卒之成功，岳史迪而家，堅強、敏捷、智勇雙全。」

畫面所見嘅太空船飛行同失事片段，係現實中美國諾斯洛普公司嘅兩款測試機：HL-10（英文：Northrop HL-10） 由 B52 轟炸機喺高空放出同埋 M2-F2（英文：Northrop M2-F2） 試飛降落嘅失事片段。

現實之中，揸 M2-F2 發生意外嘅係彼得森，意外之中受傷，因治療過程中感染金黃葡萄球菌令到右眼盲咗。

岳史迪上校改造之後成為 Cyborg，為國家安全機構工作，佢呀頭係高西加（英文：Oscar Goldman），負責特別任務，用超能力，捉壞人，化險為夷，最終完成任務。

能力

由於當年科幻片電影特技未喺好勁，所以主角喺緊急關頭大顯身手，慢鏡頭跳高十幾尺（實際上係高位跳落嚟，倒帶播出，動作完成即駁去正常畫面播出）、跑步快過車、機械手大力無比、超級聽力、視力。

Spin off

故仔中佢個舊相好，網球員沈珍美（英文：Jaime Sommers (The Bionic Woman)）（Jaime Sommers）（由蓮茜韋納演）因為跳傘失事，亦改造成 Cyborg，跳傘意外令佢記唔起岳史迪。因為呢個角色受歡迎，佢喺 Spin off 電視劇《無敵女金剛》（The Bionic Woman）中擔正。

呢個劇集嘅角式喺七八十年代香港紅到爆，連周星馳嘅《百變星君》都有參攷佢。保險公司 ING 亦用「莫史迪」賣一系列嘅廣告。