多倫多地下鐵

多倫多起地下鐵最初係喺1910年提出，修正早期系統喺1946年批准，1949年開始起，1954年通車，係加拿大全國第一條地下鐵路，當時爾段係係連接聯合站至艾靈頓站，現時係1號綫嘅一部分。

多倫多地下鐵嘅地下鐵綫本來淨得名；2000年為咗配合第四條綫雪柏綫通車，每條綫加咗顏色，2014年再開始用號碼，但係原則上，其實顏色同號碼都唔係真名，只係用喺地圖上面貪方便，隨時會變。

事實上，路綫號碼已經唔啱次序，因為士嘉堡 RT 嘅3號已經預留咗畀次序第8嘅安大略綫；另外，7號綫亦曾經唔係指艾靈頓東輕鐵綫^:62。

 

喺多倫多嘅地下鐵，除非喺地面，喺車入面通常收唔到流動電話訊號；喺站入面就通常得。站入面公車局有提供免費 Wi-Fi，不過要簽到先用得，手機如果用新式嘅瀏覽器好多時都簽唔到到。

無綫訊號相關嘅工程喺2012年開始，當時，公車局搵咗一間公司，開始喺站入面安裝設備，等可以收到無綫訊號（嗰間公司喺開放日曾經透露，安無綫設備其實係因為 Presto 嘅需要），但係因為三大流動電話供應商一直都唔合作，所以一直都淨係收到一間細供應商嘅訊號。

2023年4月，三大供應商之一嘅羅渣士（Rogers）收購咗本來負責安裝無綫設備嗰間公司，聲稱咁做可以喺幾年內全網收到 5G，但係同年9月，聯邦工業部長商鵬飛（François-Philippe Champagne）話，10月3號之前，所有主要供應商都一定要畀佢哋嘅客戶收到無綫訊號，唔喺就罰。10月2號，即係限期前最後一日，羅渣士宣有所有供應商嘅客戶都可以收到無綫訊號，但係只係限於1號綫市中心路段嘅14個站同2號綫嘅另外13個站，預計其餘工程喺兩年內完成。