第19屆德國聯邦國會選舉

聯盟黨（基民盟／基社盟）

爭取連任嘅默克爾就講明唔會同另類選擇黨合作，佢早前亦呼籲民眾投票支持百分百遵守憲法嘅政黨，以防低投票率造就另類選擇黨攞到更多選票。

社民黨

面對另類選擇黨可能成為新一屆國會嘅第三大黨，社民黨嘅舒爾茨22號出席競選集會嗰時話，另類選擇黨入到國會將會殺死德國嘅民主，更加形容另類選擇黨係德國嘅敵人。

9月18號，當地傳媒進行嘅民調話，反移民嘅右翼另類選擇黨嘅支持度有百分之十一，落後執政嘅基督教民主聯盟同社民黨，排第三。有預測話另類選擇黨將會響國會七百零三席入面攞到八十九席。

9月23號，德國圖片報委託搞嘅民調話，基民盟嘅支持度有三成四，領先社民黨十三個百分點，立場右翼嘅另類選擇黨支持度排第三。至於亮點周刊嘅調查就話，基民盟嘅支持度領先社民黨十四個百分點。

如果默克爾率領嘅基民盟順利贏得大選，又繼續同社民黨組成執政聯盟，另類選擇黨將會成為國會入面嘅最大反對黨，屆時將會享有特權，包括可以派人出任國會預算委員會主席。不過另類選擇黨響上次大選因為得票去唔到百分之五嘅門檻，攞唔到任何國會席位，但係佢哋近期支持度繼續上升，顯示選情未受近排黨內高層涉及嘅醜聞影響。