法比加斯

法比加斯
Cesc Fàbregas

個人資料
全名	Francesc Fàbregas Soler
花名	Cesc
生日	(1987-05-04) 1987年5月4號（36歲）
出生地	西班牙加泰隆尼亞迪瑪
身高	1.77米
位置	中場
球會資料
而家效力	摩納哥
波衫號碼	4
青年軍
年	球會
2002年-2003年	巴塞隆拿B隊
效力過嘅球會
年	球會	上陣	（入波）
2003年-2011年	阿仙奴	212	（35 ）
2011年-2014年	巴塞隆拿	96	（28 ）
2014年-2019年	車路士	138	（15 ）
2019年-	摩納哥	39	（2 ）
代表隊
年	代表隊	上陣	（入波）
2006年-2016年	西班牙	110	（15 ）

法比加斯未成名之前喺巴塞隆拿做學徒，之後喺2003年9月受到英超阿仙奴領隊雲加嘅賞識簽咗去阿仙奴。佢加盟「槍手」之後嘅第一季一直都冇乜上陣機會，直到2004/05球季，好多阿仙奴嘅中場球員都受晒傷，法比加斯終於得到多啲嘅上陣機會，佢亦係由嗰時開始喺阿仙奴確立咗佢喺阿仙奴嘅中場進攻核心地位。之後佢打破埋幾個球會紀錄，好多人更讚佢係天才球員。2011年佢轉會返巴塞隆拿。2014年轉投車路士。

2003年，法比加斯首次着西班牙足球代表隊嘅紅色戰衣出戰芬蘭世少盃，從此開始咗佢嘅國家隊生涯。憑住佢喺阿仙奴嘅出色表現，佢喺2006年更入選西班牙足球代表隊，代表西班牙參加2006年FIFA世界盃同埋2008年歐洲國家盃，其中2008年歐洲國家盃更贏得冠軍。

幼年

 

1987年，法比加斯喺西班牙加泰隆尼亞嘅迪瑪出世，阿爸法蘭西斯克•法比加斯（Francesc Fàbregas Sr.）係一間房地產公司老細，阿媽紐妮亞•蘇娜（Núria Soler），係一間酥皮點心舖嘅事頭婆。法比加斯好細個已經係巴塞隆拿球迷，9個月大嘅時候，佢阿爺已經帶佢去睇波。2002年，法比加斯喺巴塞隆拿展開佢嘅足球生涯，啱啱開始嘅時候法比加斯打嘅位置係防守中場，但後尾佢做咗入球王，曾經喺個青年聯賽一季入超過30球，但係佢冇因為噉而畀巴塞揀入一隊。知道自己留喺巴塞冇前途，2003年嘅夏天，佢揀咗踢阿仙奴，2003年9月11號同呢支倫敦球會簽約。加盟冇耐，佢覺得喺英格蘭首都生活好困難，好彩佢好快就同識講西班牙文嘅辛德路斯做咗朋友，而辛德路斯亦幫佢安頓好喺倫敦嘅生活。加盟嗰時只得16歲嘅法比加斯並冇即時喺阿仙奴嘅一隊上陣，而係專注練波同學英文，一有機會就向一隊嘅球員例如韋拉同基拔圖施華等球員學嘢。2003年10月23號嘅英格蘭聯賽盃，佢終於得到第一次落場嘅機會，對手係洛達咸足球會。亦係呢一場賽事，令佢成為咗兵工廠史上最後生上陣球員，當時只得16歲零177日。喺之後一場對住狼隊嘅聯賽盃賽事入面，佢入咗佢加盟阿仙奴之後嘅第一球，更幫球隊大炒狼隊5:1，做埋阿仙奴史上最年輕嘅入波球員。雖然阿仙奴喺2003/04球季贏咗英超聯賽冠軍重一場都冇輸過，但係因為法比加斯重未踢過一場聯賽而冇機會得到佢嘅第一面英超冠軍獎牌。

 

2004/05球季未開季，法比加斯再得到一次聯賽盃以外嘅落場機會，喺英格蘭社區盾對曼聯。喺呢一季，韋拉嘅受傷令法比加斯得到連續四場聯賽正選落場嘅機會。而佢嘅表現亦唔錯，喺大炒布力般流浪3:0嗰場，佢入咗第一球波，再做埋阿仙奴史上最後生嘅聯賽入波球員。而伊度同基拔圖施華嘅受傷更令佢喺更多賽事得到落場機會。喺對住洛辛堡嘅一場歐洲聯賽冠軍盃賽事，法比加斯再打破紀錄，喺呢場阿仙奴狂數洛辛堡5:1之中嘅第三個波，就係佢入嘅，自此，法比加斯亦做埋呢項盃賽史上最後生嘅入波球員。喺呢季賽事入面，佢更贏得加盟阿仙奴之後嘅第一個冠軍，喺2005年足總盃決賽球隊互射十二碼贏曼聯嗰場波，佢以正選球員身份捧盃。

做正選

韋拉去咗祖雲達斯之後，法比加斯開始喺中場線同基拔圖施華合作。喺2005/06球季，佢一共為球隊踢咗49場波。佢雖然好細個，但佢嘅表現就越嚟越好。打法上已經開始適應，犯規次數亦少過韋拉，初時法比加斯重認為自己冇能力代替韋拉。但係，法比加斯確立咗自己係踢法上嘅風格，球隊喺歐洲聯賽冠軍盃贏皇家馬德里同埋有韋拉倒戈嘅祖雲達斯入面，佢嘅好表現令觀眾留下深刻嘅印象。8強鬥祖雲達斯嘅首回合，法比加斯先開紀錄，而射手Thierry Henry就入咗第二球，證明自己夠晒實力做個可以學韋拉嗰種勇猛鏟波、踢法硬朗嘅中場球員。之後，佢喺決賽以正選身份落場對佢母會巴塞隆拿，阿仙奴以1:2梗梗輸咗，阿仙奴喺2005/06球季四大皆空。

 

夏季轉會市場重開之後，好多單轉會傳聞都有法比加斯份，就算阿仙奴同法比加斯有長約喺身，皇馬都好想買佢，但阿仙奴領隊雲加就話到明阿仙奴冇收過叫價。2006年9月，法比加斯同阿仙奴重剩低6年合約，阿仙奴提供咗新嘅5年合約（簽咗8年合約，頭嗰5年係死約，剩低嗰3年可以離隊），法比加斯喺2006年10月19號簽咗呢份合約，同球會嘅合約年期好長，法比加斯話阿仙奴嘅風格同雲加英明嘅領導，係佢願意賣身畀球會嘅原因。

球隊核心

2006/07球季係法比加斯同阿仙奴一眾年輕球員好好磨練嘅機會。球會就試喺大賽錦標度衰咗，同埋喺聯賽盃決賽對車路士輸1:2。但係法比加斯已經慢慢咁顯示出自己嘅重要性，係每場比賽都負責派牌畀啲前鋒。2006/07賽季歐洲聯賽冠軍盃入面，法比加斯幫阿仙奴攞到個好開始，喺第三圈外圍賽對住薩格勒布戴拿模梅開二度，幫球會輕取3:0。喺英超聯賽，佢交出13次助攻，係聯賽第二高。嗰季佢贏咗好多個人獎，好似意大利報紙托圖體育（TuttoSport）舉辦嘅金童獎（Golden Boy award），係歐洲一啲好出名編輯投票揀出嚟。佢又入選咗歐洲足協每年嘅最勁陣同埋當選2007年1月英格蘭足球總會英格蘭超級聯賽每個月入面最勁嘅球員。重有，佢俾人提名英格蘭球員先生同埋PFA每年嘅最勁後生球員，但係呢兩個獎都俾曼聯嘅基斯坦奴朗拿度攞咗。2007年6月，佢以60%咁高嘅得票率當選阿仙奴每季嘅最勁球員（Arsenal's Player of the Season）。

關鍵先生

2007/08球季對於阿仙奴可以話周圍都係蘇州屎。首先球會個副主席大衛甸恩（David Dein）因為同其他高層鬧交走佬，跟住球會隊長同埋神射手Thierry Henry過檔巴塞隆拿。呢個係雲加攞球會嘅前途嚟較飛嘅一單生意。法比加斯知道自己做咗阿仙奴最重要嘅球員，話自己已經冇嘢驚。開季佢踢得幾好，好多時都有入波同埋助攻，ESPN足球網（soccernet）更將阿仙奴開季咁成功嘅功勞歸晒喺佢身上。踢得咁好，令到佢O₂8月到10月連續三次贏得阿仙奴擁躉每個月嘅最勁球員（Player of the Month award from Arsenal fans）同埋9月英超每個月嘅最勁球員。幫阿仙奴喺聯賽榜一路領先到3月，法比加斯亦喺2007/08賽季歐洲聯賽冠軍盃入面踢得好好，歐聯16強次回合鬥AC米蘭，法比加斯喺差唔多吹雞嗰時入咗一粒，幫球隊殺入八強。2008年4月11號，法比加斯再俾人提名做英格蘭球員先生同埋PFA每年最勁嘅年輕球員，佢贏咗後者，同埋入選PFA每年最勁嘅陣容。但係阿仙奴係聯賽領先好耐，最尾都係頂唔住，俾曼聯追過咗，之後嗰幾個盃賽又出埋局，球隊連續3年四大皆空，乜盃都攞唔到，同埋球員先生又俾C朗攞咗。

重返巴塞隆拿

2008-09年至到2010-11年三個球季，阿仙奴繼續食白果，而喺2010-11年球季，法比加斯重返巴塞隆拿嘅傳聞亦講到似層層。2011年8月15號，法比加斯卒之以四千萬歐元嘅轉會費重返巴塞隆拿。

轉投車路士

2014年6月11號，車路士宣佈簽入法比加斯，佢為車路士送出多次助攻，幫車路士奪得2014-15年英超冠軍，但係佢喺下半季表現下降嘅問題依然存在。

由於佢嘅狀態一直都未見好轉，所以佢響球隊嘅地位都開始下滑，後尾更冇埋個「正選」位。直到2016-17球季，有啲正選踢傷，法比加斯先至開始有落場踼波嘅機會，但氣勢唔再好似以前咁好，因此有傳聞指佢有可能轉會。

轉投摩納哥

2019年1月11號，法比加斯卒之宣佈轉投摩納哥，會簽約到2022年。響2020年11月，響摩納哥對巴黎聖日耳門嘅一場比賽當中，法比加斯入咗奠勝嘅一球，幫摩納哥以三比二擊敗聖日耳門，係球隊至2016年之後再一次打贏聖日耳門。

青年隊

雖然佢又係西班牙足球代表隊成員，但係法比加斯嘅國家隊生涯係喺青年隊開始。芬蘭主搞嘅2003年世少盃，佢雖然打中場，但做咗神射手，重俾人投票選佢係賽事最勁球員（Player of the Tournament）。西班牙係決賽輸咗畀巴西，只係得亞軍。法比加斯係之後嗰年歐洲少年國家盃，帶住西班牙隊，點知又係得亞軍 ，法比加斯做咗賽事嘅黃金球員（Golden Player of the tournament）。

 

一隊

法比加斯去咗阿仙奴第二季就做到皇牌冇耐，西班牙就揀咗佢入隊。見到佢喺2006年歐聯咁犀利，西班牙教練阿拉干尼斯揀咗呢位後生仔入隊，同科特迪瓦打友誼賽。喺呢場波，法比加斯入咗一球，做咗西班牙70年嚟最後生嘅入波球員 。佢第一次踢已經俾人讚不絕口，幫西班牙3:2贏咗科特迪瓦。

2006年5月15號，法比加斯俾人揀入2006年FIFA世界盃西班牙大隊入面。世界盃踢緊嗰時，佢喺小組賽頭兩場都後備落場，對突尼西亞一場，佢助攻畀前鋒費蘭度托利斯入波，幫西班牙3:1贏波。西班牙啦士一場分組賽對住沙地阿剌伯，佢開始黐埋啲西班牙嘅預備組球員（好似前阿仙奴隊友雷耶斯咁）。16強對住法國，佢頂咗辛拿個位正選落場，但1:3輸咗。法比加斯係西班牙足球史上踢世界盃入面最細個嘅球員，佢第一次踢就係2006年6月13號分組賽第一場對住烏克蘭，77分鐘入替路爾斯加西亞，最尾西班牙4:0狂數對手，嗰時佢得個19歲零41日。之後佢俾人提名世界盃最勁嘅後生球員，但呢個獎最尾俾德國嘅普多斯基攞咗。

喺2008年歐洲國家盃，法比加斯原本着開18號波衫，但教練畀咗件10號佢着 。雖然佢好多時都係後備落場，但呢個中場幫咗西班牙好多。佢第一次喺國際賽入波，就係4:1炒俄羅斯嗰場，呢場重交出個助攻。西班牙喺小組賽三場贏晒。八強對住意大利，兩隊打到120分鐘都互交白卷，要互射十二碼分勝負，法比加斯射入致勝十二碼，幫球隊踢贏呢隊應屆世界盃冠軍。喺準決賽，法比加斯交出兩個助攻，幫西班牙淨贏3:0，係小組賽之後，球隊再數俄羅斯三球。法比加斯係決賽對德國正選落場，最尾球隊僅熟1:0，係自從1964年之後，西班牙第一次贏大賽錦標。因為踢得太好，法比加斯俾人揀入歐洲國家盃官方23人嘅球員名單。

 

開頭阿仙奴諗住將法比加斯帶去球會，跟住叫佢慢慢踢聯賽盃發展技術，但喺2004/05球季，佢好意外咁做咗球隊正選中場球員，頂成日受傷嘅韋拉、伊度同基拔圖施華個位。法比加斯多數都係做中場指揮官，佢咁有用，係因為佢傳波勁準。佢係家下球壇入面啲人最恨做佢嘅球員嘅其中一個，人哋成日話阿仙奴冇咗佢唔得，好叻睇通場波，有創意、同埋喺阿仙奴場場波唔計較付出同埋成熟嘅表現，並唔係普通後生仔球員可以咁做。喺死球方面，佢係球隊入面踢角球同自由球嘅首選之一。

法比加斯喺接受訪問嗰時，話以前隊友韋拉一直係自己嘅好榜樣同埋好朋友，佢嘅踢法同哥迪奧拿好似，佢後生嗰時當哥迪奧拿係英雄。人哋覺得同佢打同一個位前輩比，冇個同佢類型同踢法一樣，佢嘅踢法有啲技術型，唔係速度型。本身佢因為瘦猛猛同冇乜侵略性嘅踢法而俾人鬧到飛起，前隊友艾殊利高爾更喺自傳入面話佢係未經考驗嘅輕量級（an unproven featherweight）。

但係，法比加斯喺比賽嘅統計年年都進步緊，同埋佢用攻力更勁嘅踢法踢波。球會冇咗佢唔掂，因為佢有創意，喺2006/07球季所有比賽交出16次助攻就可以證明到呢點。佢又認佢喺阿仙奴頭嗰幾季唔多識入波，2005/06到2006/07球季成日舊叉燒擺到入口都食唔到，係圍住阿仙奴嘅一個嚴重問題。2007/08球季初頭，好似變變地，佢喺聯賽頭16場入咗11粒，就算領隊雲加一路都話法比加斯喺之前唔識入波，又將佢同法國出名球員柏天尼比，柏天尼因為好多入波而出名。雖然佢好細個，好多人都驚佢成日要打國家隊同球會踢波，會踢到殘晒，但係呢位中場踢咗阿仙奴咁多年都未試過傷得好勁。

（至到2008年10月5號）

^世界少年足球錦標賽，即係世少盃

法比加斯而家主持自己嘅個人節目，個名叫「法比加斯騷：Nike 現場」（The Cesc Fàbregas Show: Nike Live），2008年5月19號開始做，喺天空體育（Sky Sports）度播。個節目嘅特色係法比加斯攞幾個阿仙奴球員嚟開玩笑，好似辛德路斯、賓特拿，同領隊雲加、法比加斯嘅父母同埋節目小不列顛（Little Britain）個主持馬特盧卡斯（Matt Lucas）等等。

 

維基同享有多媒體嘅嘢：
Cesc Fàbregas

• Cesc Fàbregas' Official Website
• Profile at Arsenal.com
• Cesc Fabregas 08/09 season statistics