有限理性

Simon">赫伯特·亞歷山大·西蒙（Herbert Alexander Simon）所提出，係基於對生理學及心理學層面嘅思考，對於傳統經濟理論所提出嘅修正。根據有限理性嘅原則，人類理論上可以係理性嘅決策者，但係佢哋喺運算能力、資訊、時間、同記憶等嘅因素上受到限制，所以好多時都唔能夠做完全理性嘅決策。

例如假想有個人，佢想用手頭上嘅錢最大噉滿足自己嘅慾望，喺完美理性嘅情況下，佢會集中淨係諗應該點樣用手上嘅資源達到「最大噉滿足自己慾望」呢個目的，忽略嗮第啲嘢，而且完美噉清楚知道每個可能選項有幾能夠滿足自己慾望，跟住就作出能夠令「自己慾望得到滿足」（假設佢有個方法量度呢個變數）最大化嘅決策；而喺有限理性嘅情況下，經濟學家依然會想分析呢個人點樣用手上資源最大噉達到自己慾望，但會考慮有啲乜嘢因素可能搞到佢做唔到完美理性嘅決策－比如話，可能嘅使錢方案多得滯搞到個人唔可以冚唪唥考慮嗮（運算能力不足），又或者嗰個人未必知道嗮所有可能嘅選擇（資訊不足），又或者佢唔夠時間做噉大量嘅運算（時間不足）等等。總括嚟講，行為經濟學研究嘗試建基於假設咗「人類係理性」嘅古典經濟理論，跟住喺呢啲理論模型之上加入對「人類所面對嘅限制」嘅考量，務求創造出更加準確噉描述人類決策嘅理論模型。

有限理性呢個概念係赫伯特·亞歷山大·西蒙（Herbert Alexander Simon）所建立嘅。佢提出，大部人祇係得局部理性，而佢哋做嘢嗰陣係唔理性。喺佢一連串嘅著作當中，西蒙列明出，有限理性嘅個體喺運算同解複雜嘅問題以及處理訊息（包括接收、儲存、搵同傳遞訊息等嘅工作）上係受到某啲限制嘅。另外，佢亦都描述咗「古典」嘅理性決策模型可以用乜嘢方法改，令到個模型更加準確噉描述到現實，包括：

• 限制效用（utility）函數嘅類型；
• 指出要搜集同運算訊息係有代價嘅；
• 效用函數可能包括「向量」或者「價值多元化」。

西蒙主張，現實世界嘅經濟個體係使用啟發法（heuristics；一啲認知上嘅捷徑）嚟做決策，而唔係使用嚴謹嘅優化規則嘅。而佢哋（啲經濟個體）之所以噉做，係因為佢哋身處嘅情況好複雜，而且佢哋冇能力處理同計算嗮所有可能行動嘅效益。要對一個經濟決定作完全理性嘅決策（即係考慮嗮所有可能方案同計算嗮所有方案嘅效益）好多時要負出好大嘅代價，而且佢哋同時要進行好多經濟活動同決策，例：一個人去買餸可以做試做完美理性嘅決策（好似係去嗮全香港所有超市格價），但噉做會好嘥時間同精神，而且佢可能仲有第啲經濟決策要操心（好似係諗屋企嘅財政），所以最後選擇用一啲簡單嘅啟發法嚟買餸慳時間精神（「去離屋企最近嗰間超市買餸」就算）。

 

喺經濟學上不嬲都有用博弈論（game theory）嚟分析經濟決策者之間嘅博弈：博弈論提供咗一個數學基礎俾工業組織，等佢哋可以用數學模型模擬（例如）公司點樣做決策嘗試令自己嘅利益最大化，做買賣、同員工傾人工、講數、同設計合約等嘅過程都可以用博弈論嚟模擬。

舉個簡單嘅例子說明，想像家吓有兩間公司，叫公司 1（firm 1）同公司 2（firm 2），喺度鬥爭一個市場嘅買家，每間公司都有兩個選擇，一係揀「進入市場」（entry，簡稱「E」），一係揀「遲啲先進入市場」（delay entry，簡稱「DE」）。喺呢個個案之下，如果兩間同時進入市場嘅話，佢哋都會各自損失 4,000,000 文嘅盈利；而如果公司 1 而家進入市場，而公司 2 揀遲啲先入，噉公司 1 會得到 6,000,000 文嘅盈利，而公司 2 乜嘢都得唔到；淨低嘅情況可以睇圖 1。喺呢個形勢之下，對於公司 1 嚟講，揀 DE 嘅話實蝕，相比之下，佢揀 E 嘅話至少會蝕少啲，甚至有機會賺（如果公司 2 揀 DE 嘅話），同時，就算公司 2 知道呢一點，佢可能都會因為唔想蝕 4,000,000 而焗住去揀 DE。如果係噉，最後結果會係公司 1 賺 6,000,000，而公司 2 冇得益冇損失。有咗呢個模型模擬兩個公司之間嘅交鋒，一個經濟學家跟手可以模擬（例如）成個經濟體內部嘅眾公司彼此之間嘅交鋒，再睇吓（假設啲公司冚唪唥都係會揀令自己盈利最大化嘅選擇）佢哋最後邊個會係贏家。

上述呢個模型係假設咗兩間公司都係理性嘅決策者：一個典型嘅新古典經濟學家好可能做完上述嘅分析就收工，諗住呢個高度理想化嘅模型充分噉模擬到現實，但一個行為經濟學家仲會思考到底兩間公司係咪真係理性嘅決策者（通常都唔係），而如果唔係，佢哋喺邊方面唔似理性嘅決策者－兩間公司可能唔能夠喺複雜嘅市場環境下計出每個選項嘅得失（運算能力不足），又或者可能情報上有失誤（資訊不足），又或者可能因為某啲原因而焗住要倉猝做決策（時間不足），跟住個行為經濟學家仲會諗吓，「兩間公司唔理性嘅地方」會點樣影響佢哋嘅行為（佢哋以乜嘢方式偏離理性模型），再按此執靚個模型，務求最後嗰個模型更加能夠描述同預測現實世界嘅現象。

有限理性嘅概念係行為經濟學（behavioral economics）呢個經濟學子領域嘅根基，指人類可以係理性嘅決策者，但係佢哋喺運算能力、資訊、時間、同記憶等嘅因素上受到限制，所以好多時都唔能夠做完全理性嘅決策－呢點相對於好多時假設人類係完全理性嘅古典經濟學。例如假想有個人，佢想用手頭上嘅錢最大噉滿足自己嘅慾望，喺完美理性嘅情況下，佢會集中淨係諗應該點樣用手上嘅資源達到「最大噉滿足自己慾望」呢個目的，忽略嗮第啲嘢，而且完美噉清楚知道每個可能選項有幾能夠滿足自己慾望，跟住就作出能夠令「自己慾望得到滿足」（假設佢有個方法量度呢個變數）最大化嘅決策；而喺有限理性嘅情況下，經濟學家依然會想分析呢個人點樣用手上資源最大噉達到自己慾望，但會考慮有啲乜嘢因素可能搞到佢做唔到完美理性嘅決策－比如話，可能嘅使錢方案多得滯搞到個人唔可以冚唪唥考慮嗮（運算能力不足），又或者嗰個人未必知道嗮所有可能嘅選擇（資訊不足），又或者佢唔夠時間做噉大量嘅運算（時間不足）等等。總括嚟講，行為經濟學研究嘗試建基於假設咗「人類係理性」嘅古典經濟理論，跟住喺呢啲理論模型之上加入對「人類所面對嘅限制」嘅考量，務求創造出更加準確噉描述人類決策嘅理論模型。

• 理性
• 行為經濟學
• 博弈論
• 行為博弈論
• 分析癱瘓
• 複雜系統
• 不充分決定論
• 賭徒謬論

• Bayer, R. C., Renner, E., & Sausgruber, R. (2009). Confusion and reinforcement learning in experimental public goods games. NRN working papers 2009-22, The Austrian Center for Labor Economics and the Analysis of the Welfare State, Johannes Kepler University Linz, Austria.
• Elster, Jon (1983). Sour Grapes: Studies in the Subversion of Rationality. Cambridge, UK: Cambridge University Press. ISBN 978-0-521-25230-0.
• Gigerenzer, Gerd & Selten, Reinhard (2002). Bounded Rationality. Cambridge: MIT Press. ISBN 978-0-262-57164-7.
• Kahneman, Daniel (2003). "Maps of bounded rationality: psychology for behavioral economics". The American Economic Review. 93 (5): 1449–75. CiteSeerX 10.1.1.194.6554. doi:10.1257/000282803322655392. Archived from the original (PDF) on 2018-02-19. Retrieved 2017-11-01.
• March, James G. (1994). A Primer on Decision Making: How Decisions Happen. New York: The Free Press. ISBN 978-0-02-920035-3.
• Simon, Herbert (1957). "A Behavioral Model of Rational Choice", in Models of Man, Social and Rational: Mathematical Essays on Rational Human Behavior in a Social Setting. New York: Wiley.
• March, James G. & Simon, Herbert (1958). Organizations. John Wiley and Sons. ISBN 978-0-471-56793-6.
• Simon, Herbert (1990). "A mechanism for social selection and successful altruism". Science. 250 (4988): 1665–8. doi:10.1126/science.2270480. PMID 2270480.
• Simon, Herbert (1991). "Bounded Rationality and Organizational Learning". Organization Science. 2 (1): 125–134. doi:10.1287/orsc.2.1.125.
• Tisdell, Clem (1996). Bounded Rationality and Economic Evolution: A Contribution to Decision Making, Economics, and Management. Cheltenham, UK: Brookfield. ISBN 978-1-85898-352-3.
• Williamson, Oliver E. (1981). "The economics of organization: the transaction cost approach". American Journal of Sociology. 87 (3): 548–577 (press +). doi:10.1086/227496.