娃娃魚

娃娃魚係現存最大隻嘅兩棲類，一般身長約六至七十公分，重約五至六公斤，大嘅可長到去一米八，重到廿公斤。背脊咖啡色，有黑色斑，個肚嘅顏色比較淡，頭又扁有闊，有一對「疣突」，頭嘅背面有好細嘅鼻窿同埋眼，口大，個身扁而粗，尾短而扁，四肢好短，前肢有四隻指，後肢五趾，趾之間有蹼。

因為佢嘅叫聲好似 BB仔 咁喊，所以先叫「娃娃魚」，但實情佢唔係魚，而係兩棲動物。

娃娃魚棲息響清澈、低溫嘅溪流，佢哋係食肉動物，主要食魚同甲殼類動物，喺夏天尾生蛋，約兩至四個星期就孵化。

現時中國湖南、山西、陝西、廣東、廣西等地，都有人工馴養嘅娃娃魚；野生嘅就極為稀少，主要喺長江、黃河及珠江流域海拔千五公尺以上支流先搵到。曾經喺台灣有紀錄，但相信係引入野生個體所致。

由於娃娃魚生存咗好耐，坊間認為佢啲肉有神奇嘅療效，可以賣到好貴，成日畀人類捉嚟食或者當做寵物，加上生活環境受破壞，面臨滅絕嘅可能。目前喺中國，販賣野生娃娃魚屬違法，但係喺中國四川省同湖北省，啲人好興攞佢哋嚟送禮。喺廿世紀尾，台灣亦試過興起食用娃娃魚嘅熱潮，仲大量由中國大陸走私入貨。作為觀賞、寵物嘅亦不計其數。

喺 IUCN紅色名錄入邊，娃娃魚被定為極危物種，表明呢個野生種群面臨滅絕嘅機會係極高。目前野生種群主要面對嘅挑戰係濫捕，棲息地嘅破壞亦令到佢哋嘅生活空間減少。

1978年，陽愛生成功將娃娃魚人工繁殖。時至今日，中國人工繁殖娃娃魚嘅數量有概大十萬條，仲成立湖南省大鯢保護與發展協會。有報導話人工馴養嘅娃娃魚，可以喺兩年後成為普羅大眾嘅食品。

2009年，娃娃魚主要聚居地之一嘅張家界大鯢自然保護區，正提供娃娃魚畀香港海洋公園作科普宣傳同科學研究之用。之前香港有兩條娃娃魚，屬1990年代尾非法偷運入境，漁護署搜到之後交畀嘉道理農場照料，直到 2001年搬去香港海洋公園。2009年4月30號，海洋公園嘅「亞洲動物天地」開幕，娃娃魚亦係主要展品之一。