《中華人民共和國政府和大不列顛及北愛爾蘭聯合王國政府關於香港問題的聯合聲明》(英文:The Joint Declaration of the Government of the United Kingdom of Great Britain and Northern Ireland and the Government of the People's Republic of China on the Question of Hong Kong)簡稱《中英聯合聲明》(英文:Sino-British Joint Declaration)係中華人民共和國(以下簡稱中國政府)同大不列顛及北愛爾蘭聯合王國(英國)就香港前途一齊發表嘅聲明;由當時嘅中國國務院總理趙紫陽同英國首相戴卓爾夫人喺1984年12月19號喺北京簽,當時嘅中央軍委主席鄧小平同埋中國國家主席李先念等中國領導人都有喺現場見證。
簽署日期 | 1984年12月19號 |
---|---|
簽署地點 | 北京 |
生效日點 | 1985年5月27號 |
生效條件 | 中華人民共和國同英國確認 |
簽署者 | 趙紫陽, 戴卓爾夫人 |
締約方 | 2 |
呢份聲明,安排中國政府喺1997年7月1號接收香港、九龍同埋新界嘅主權;同一日,英國要將呢三度嘅主權同治權,夾埋畀中國。呢份文件亦都係今日香港特別行政區憲制基礎嘅一部分。
到咗移交後,中共中央政府卻經常咁違背咗《中英聯合聲明》同《基本法》嘅精神,對香港嘅民主同自治等有較壞嘅影響。而隨著2019年逃犯條例修訂草案風波嘅爆發,到中央政府兜開埋法定程序而強推《香港國家安全法》、通過中央自己出法案去干預埋香港本地嘅選舉制,已經有越來越多西方世界觀點認為,北京違反咗中英聯合聲明。經過咗唔少嘅國會辯論同其他遊說發展等等,英國外相藍韜文就喺2021年3月13號正式宣告 (report) ,話明咗英國政府係認定北京係持續著一個唔遵守咁《中英聯合聲明》嘅狀態。
原喺條約度中共政府係聲明咗接收返香港嘅主權後啲基本方針政策,話明咗:移交之後嘅香港,會係一個直屬中央而享有高度自治權嘅特區,除咗整體防務同外交大權由中央揸著;特區係有自己獨立嘅行政、立法、司法、財政等權力,仲有一定程度國際化嘅管治公職架構;當地係保持返自由港經濟、金融制度同社會生活模式;承認同保護所有受國際公約保證嘅公民權利同自由;保護外國投資者在港嘅利益;特區係可有條件下自己建立一定嘅國際交往關係、自己處理本地嘅出入境同維持返本地公共秩序等等。最尾一條列埋會由香港特別行政區基本法落實返呢一系列嘅承諾,話會保證五十年唔變咁。而睇返基本法嘅第八章,亦講明咗點改基本法,都唔可以抵觸返中央對香港既定嘅基本方針政策。
英國前首相戴卓爾夫人1984年12月19號喺北京簽署《中英聯合聲明》後隨即訪港,並同當時嘅行政立法兩局嘅非官守議員會面,英國國家檔案館(National Archives)解密嘅訪港準備文件,列出戴卓爾夫人會見時嘅講話重點。戴卓爾夫人指中國視《聲明》為有法律效力嘅協議,表明如中國違反《聲明》,英國喺1997年後亦有權提出,而且強調會毫不猶豫噉提出(Britain has the right to raise any breaches with China after 1997. We would not hesitate to do so.)。
喺一批戴卓爾夫人準備會見傳媒嘅問答提示卡中,其中一張指違反具法律效力嘅國際協議喺英國及國際社會均屬嚴重事件,「我哋(英國)當然會向中國政府作出最強烈嘅抗議,以糾正問題(We would of course make the strongest possible representations to the Chinese Government in order to seek remedy.)」。
而戴卓爾夫人仲試過寫信畀美國嘅列根總統,遊說佢撐英國喺《聲明》度嘅立場,強調過份文件係「具國際約束力的協議」(internationally binding agreement)。而倫敦喺游說華府時都引用過字眼,指份文件經過咗英國國會嘅辯論審議、簽署、再由英女皇拍板,強調返「具有國際法中的完整法律效力」(will make the Agreement carry the full legal force of International Law)。
英國法律專家Martin Dinham就話,就著中國大陸當局,如果威脅係撕毀聲明嘅情形,呢份雙方簽署嘅文件係有四點已確立嘅法律原則:
喺國際社會,以致喺香港民主派以內,都有觀點認為,中國已經違反咗《中英聯合聲明》。呢個觀點喺2021年,越來越多人提出。
2016年6月,英國外交及聯邦事務大臣夏文達(Philip Hammond)就銅鑼灣書店事件回應嘅時候就話,林榮基嘅失蹤顯示中共嚴重違反《中英聯合聲明》。
其中一個喺香港最先提出中國違反《中英聯合聲明》觀點嘅非建制派人士,係之後俾撤咗議員資格嘅立法會議員游蕙禎。游蕙禎喺2016年人大釋法「解釋」基本法104條之後,就寫過信到英國外交部,話中國違反咗中英聯合聲明附件一嘅內容,同時話喺個聲明簽署嘅時候《維也納條約法公約》經已生效,而聲明亦經已交畀聯合國備案,呢份聲明應該受到呢條公約嘅規管。游蕙禎又話,由於通常違約嘅申訴只可以由締約國提出,所以先寫俾英國,希望英國介入,促使中方履行承諾,唔係嘅話就應該當份聲明失效咗,咁一嚟港人英國雙方就應該重新簽新約決定返前途。嗰陣時嘅英國工黨國會議員Catherine West就即時回應咗游蕙禎嘅信,要求政府回應。
喺2017年6月30號,中國外交部發言人陸慷試過公開話,《中英聯合聲明》係歷史文件,唔再具有任何現實意義,對中央政府對香港特區嘅管理亦唔具備任何約束力。嗰陣時嘅英國外交部就即時回應話《聲明》係有法律約束力嘅條約,至今(2017年)係繼續生效,又強調返英國作為聯合簽署國,有責任密切監督《聲明》實施嘅情況。嗰時社民連主席吳文遠亦喺接受英國《衛報》採訪嘅時話,中國政府嘅講法非常可笑,批評北京唔可以今日簽一個合約,聽日就話合約已成歷史。另外,亦有啲媒體形容,中國咁做係將呢份聲明踐踏成廢紙。
喺2019年6月12號中國駐英國大使接受BBC訪問同埋喺8月20號中共官媒央視評論入面,佢哋都話《中英聯合聲明》係一份過時嘅歷史文件,再次引起爭議。喺7月,英國外相侯俊偉(Jeremy Hunt)就敦促咗中方要尊重返《中英聯合聲明》,否則唔排除對中國實施制裁或者驅逐佢哋嘅外交官。
末任港督彭定康喺2019年11月接受ABC中文訪問時話,中國實際上經已放棄咗《中英聯合聲明》,又話中國政府習慣認為國際協議係人哋要遵守,而唔係中國需要遵守。
經歷2020年《香港國家安全法》未經港人同意嘅立法,2021年針對泛民主派35+初選嘅政治檢控拘捕,而且北京亦兜開埋香港立法會兼唔諮詢過本地市民意見,透過中央自己出法案改埋香港本地嘅選舉制。跟著就仲多聲音批評返中共政府係違反咗《中英聯合聲明》。
This article uses material from the Wikipedia 粵語 article 中英聯合聲明, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.