Joseph Duysenx: Sicrijheu e walon (ki vikéve di çoula)
Joseph Duysenx (e walon Djôzef Dwizink) a skepyî li 19 di fevrî 1878 et a morou e 1965.
.png)
| Skepiaedje | 19 di fevrî 1878, Lidje |
|---|---|
| Moirt | 1965, Lidje |
| Activités | scrijheu, compôzeu d' muzike |
Al comene, c' esteut Joseph Duysinx, mins on n' l' a veyou k' e 1930. Ça fwait ki tos ses scrijhaedjes fourît sinés "Duysenx".
E walon, on prononcive Djôzef Dwissin, et l' lomer, å pus sovint: "li ptit Dwissin".
C' esteut on scrijheu d' tchanson et d' operås e walon.
Ouve e walon
Il askepia 1181 ouves, aprume e walon, mins eto e francès a môde di Lidje: des tchansons, des operås, des pîces di teyåtes (sovint en onk u deus akes, avou des tchansons).
"Cuzén Bebert" (1911) fourit li prumire operete e walon ki s' passe en èn ovroe d' modisse, çou ki mostere ki les waloneus cmincèt tot doûçmint a s' ocuper des målåjhminces des ptitès djins. Après, Djôzef Dwissin si loméve lu-minme «l' oteur di “Cuzén Bebert”».
Après l' guere di 1914-1918, il a stî onk des stamons do Cåbaret Lidjwès. Si operete "Li mårlî" (1924) a stî cmandêye på Teyåte Cominå Walon, ca "li Ptit Dwissin", vikéve, après 1925, do mestî d' oteur copôzeu e walon (motoit li seu cas dins l' istwere). Eto, i vindeut lu-minme ses abondroets et les ptits livrets di ses pîces, avou tot on sisteme di vindince.
Ene ramexhnêye di ses tchansons a stî replaideye pal S.L.L.W. e 2000. Ene cassete di "Cuzén Bebert" a rexhou dins les anêyes 1990, et ene plake lazer di "Amours di Prince" dins les anêyes 2000.
A rilever, eto, kel Djôzef Dwissin a seu dner l' gosse do walon a s' fi, Françwès, et a s' pitit-fi Marc. C' est l' seu cas di famile avou des scrijheus e walon so troes djermêyes di djins.
Sacwantès pîces di teyåte da Djôzef Dwizink
- Li Cuzén Bebert, operete e 2 akes.
- Li mårlî, operete e 2 akes.
- Li Docteur Macasse, operete e 3 akes.
- Li fôre ås omes, operete e 3 akes.
- Vî sot !, operete en 1 ake.
- Amours di Prince, operå en 1 ake.
- El l' cåve !..., comedeye e 2 akes.
- Ene pårteye di plaijhi, comedeye en 1 ake
- Les deus locataires, comedeye en 1 ake.
- Li prudje, comedeye en 1 ake.
- Boû po vatche, comedeye en 1 ake.
- Ene seyance di consey comunå, comedeye en 1 ake.
- Li gamén, comedeye en 1 ake.
- Les tournikeus, comedeye en 1 ake.
- L' amour sol banc, comedeye en 1 ake avou des chansons.
- Li bombe atomike, operete po rire po 2 omes.
- Ritche !, comedeye e 3 akes
- Sôlêyes et cåbartî, operete en 1 ake.
This article uses material from the Wikipedia Walon article Joseph Duysenx, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Li contnou est dzo l' licince CC BY-SA 4.0 a moens k' ça soeye dit ôtrumint. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Walon (DUHOCTRUNGQUOC.VN) is an independent company and has no affiliation with Wiki Foundation.