Iron Maiden is en Iengelschn Heavy Metalgroep en de belangrykstn verteegnwôordiger uut de New Wave Of British Heavy Metal.
Ze bestoan ol van 1975 en zyn nog ossan indeliks populair.
De noame komt van e spillement voen menschn te foltern. En Iron Maiden is e sôorte van dôoskiste of sarcofoag woa dan der pinn in emonteerd zyn. 'n Mens die moestn efolterd zyn, staakn ze doar in en toene dein ze de kiste toe, woadeure dat 'n dien die derin zate oftewel dôod gienk of ogliek ferme ofzaag.
't Beguste ollemoale toene at Steve Harris in 1975 uutschidde me zyn êeste groepn en Iron Maiden uprichtte. 't Deurde toet in 1980 vôorn dan ze nundern êeste ploate uutbrochtn (Iron Maiden). De groepsleedn woarn toene Steve Harris, Paul Di'Anno, Clive Burr, Dennis Stratton en Dave Murray (die nu oek nog ossan derby is). Loater da joar gienk Dennis Stratton weg en kwam Adrian Smith in de plekke.
't Joar doarup kwam nunder twidde ploate uut: Killers. Doarachter smêetn ze Paul Di'Anno buutn omdat 'n veel te vele zôop en drugs gebruukte. Ze vroegn Bruce Dickinson, die toene by Samson zoeng, voen derby te komn en 'n dien zaag dadde zittn. 't Wos begun van e succesveroal.
Me Dickinson derby, brochtn ze Number Of The Beast uut. 't Wos de ploate woamei dan ze echt deure ebrookn zyn en voen vele metalfanoatn is 't nog ossan en echtn klassieker. Ze kusn oek voen êeste kêe buutn Europa tourn.
Clive Burr wos oendertusschn oek vervangn deur Nicko McBrain en de drie ploatn die doarachter uutkwaamn, woarn olledrie (Piece Of Mind, Powerslave en Somewhere In Time) grôte successn.
In 88 brochtn ze toene Seventh Son Of A Seventh Son uut, woa dan ze begustn te experimenteern me synthesizers. 't Woarn vele fans die doa nie content mei woarn omdan ze voen dan ze nunder heavy metalwortels vergeetn woarn. Oek binn de groep begust et te dundern, want Adrian Smith wos nie 't akkôord met de veranderiengn en ne gienk deure. Janick Gers (die ol meiespeeld at up de soloploatn van Dickinson) nam ze plekke in.
De twêe albums die uutkwaamn (No Prayer For The Dying en Fear Of The Dark), verkochtn nie zo goed of de vôrige. Uuteindelik gienk Bruce Dickinson oek deure voen te werkn an zyn soloproject.
Blaze Bayley, die zoeng by Wolfsbane kwam in de plekke. 't Wos ol rechtet dudelik dat 'n nôois echt gienk anveird groakn, want Dickinson wos oendertusschn indeliks populair ekomn. Bayley moeste oek sommigste uptreedns loatn volln omdat 'n allergisch wos voen 't êen en 't ander. Me nem zyn der twêe ploatn upenoomn: The X Factor en Virtual XI. In 1999 moest 'n were plekke moakn, want Bruce Dickinson wos were evroagd. Adrian Smith kwam oek were en ezô an ze drie gitaristn in te plekke van twêe.
In 2000 kwam ter e nieuwe ploate uut: Brave New World. 't Wos dudelik dan ze were goeste an en de fans woarn oek were enthousiast. In Rio traadn z'up voen 250.000 menschn en brochtn ze e liveploate uut die Rock In Rio noemt.
In 2003 brochtn ze Dance Of Death uut, woa dat Passchendale (Iron Maiden) upstoat. Nundern latst CD is van 2006 (A Matter Of Life And Death).
Maiden is nog ossan voen vele metalgroepn e grôotn invloed. Verre olle grôte metalgroepn uut Amerika (Metallica, Testament, Iced Earth) en Europa (Helloween) zyn beïnvloed deur Iron Maiden
Nunder mascotte is Eddie, e sôorte va leevnd lyk die ol up olle vôorkantn van nunder ploatn estoan et. Beisn sommigste uptreedns komt 'n oek up 't podium en oek in nunder clips doet 'n verre ossan mei.
Ofbeeldiengn die ier by passn ku je vien in de categorie Iron Maiden van Wiki Commons. |
This article uses material from the Wikipedia West-Vlams article Iron Maiden, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). De inhoud is, tenzij anders aangegeven, beschikbaar onder CC BY-SA 4.0 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki West-Vlams (DUHOCTRUNGQUOC.VN) is an independent company and has no affiliation with Wiki Foundation.