Ternopol'

Se om Ternopolin agjan politiž-administrativine, ekonomine da kul'turine keskuz. Ternopol' om istorižen Galicii-regionan üks' koumes surembas lidnaspäi, Ukrainan päivlaskman nellänz' lidn eläjiden lugun mödhe.

Ternopol'
Тернопіль

Lidnanznam	Flag
Valdkund	Ukrain
Eläjiden lugu (2021)	224,176 ristitud
Pind	72 km²
Telefonkod	+38−035
Aigvö	tal'vel UTC+2, kezal UTC+3

Eländpunktan aluz om pandud vl 1540, konz Pol'šanman Sigizmund I-kunigaz andoi kirješt Krakovan Jan Amor Tarnovskii-kaštelänale panemha lidnad da valdoičemha mad siš ümbri. Vaumitihe lidnust kahesas vodes, se om Ternopolin zamk i om kaičenus tähäsai.

Ternopol' šingotase sömtegimištol, sauvondmaterialiden sarakol i omblendedheotandoil. Pästtas avtokabelid, mugažo mebel'fabrik i zell'fabrik ratas.

Lidn sijadase Seret-jogen randal (ukr.: Серет 242 km pitte, Dnestran hura ližajogi), 320 m ü.m.t. keskmäižel korktusel.

Klimat om ven kontinentaline. Voden keskmäine lämuz om +7,4 C°, kezakun-elokun +17..+18 C°, tal'vkun-uhokun −3..−4 C°. Ekstremumad oma −31 C° i +38 C°. Paneb sadegid 590 mm vodes, enamba kezaaigan.

Vl 2010 eläjiden lugu oli 218 641 ristitud. Kaik pol'millionad ristituid elädas lidnaglomeracijas.

Kodikel' (2001): ukrainan kel' — 94,8%, venän kel' — 3,4%, toižed keled — 1,8%.

Nell' universitetad ratas lidnas: Päivlaskmaižen Ukrainan nacionaline universitet (ukr.: Західноукраїнський національний університет, vspäi 2005, alusenpanend 1966 kuti finansoiden da ekonomikan institut, 15 tuhad üläopenikoid vl 2015), tehnine, pedagogine i medicinine universitetad.

• Lidnan municipalitetan sait (ternopilcity.gov.ua). (ukr.)