Miluoki

Se om štatan kaikiš suremb i valdkundan 31nz' lidn eläjiden lugun mödhe, Miluokin ümbrikon administrativine keskuz.

Miluoki
Milwaukee

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2020)	577,222 ristitud
Pind	250,75 km²
Pämez'	Kaval'je Džonson (tal'vku 2021—, Cavalier Johnson)
Telefonkod	+1−414
Aigvö	tal'vel UTC−6, kezal UTC−5

Ende ho-čank-, menomini-, foks-, maskuten-, sauk-, potavatomi- i odžibve-indejalaižed eliba neniš tahoiš. Evropalaižiden eländpunktan aluz om pandud Žak Vio-kanadalaižel vl 1795 kuti torguindžilo. Nimituz libub algonkinižes indejižes millioke-sanaspäi i znamoičeb «čoma ma». Kaznu eländpunkt sai lidnan statusad vn 1846 31. päiväl vilukud, se om Miluokin alusenpanendan oficialine dat.

Miluoki šingotase tervhudenkaičendan aluzkundoil, finansižil fondoil, pästandkodil, mašinansauvomižel (kaivuztransportine mašiništ — Komatsu, akkumulätorad — Johnson Controls), sömtegimištol (oludtegimed). Neniden kompanijoiden päfaterad sijadasoiš lidnas: Northwestern Mutual (varmituz, rahapanendad), Manpower (personalan rekruting), Rockwell Automation (tegimišton avtomatizacii), Harley-Davidson (motociklad, aviapalad).

Lidn sijadase štatan suvipäivnouzmas, Mičigan-järven päivlaskmaižel randal, 188 m ü.m.t. keskmäižel korktusel. Nene koume joged ühthejokstas da lanktas järvhe: Menomoni, Kinnikinik i Miluoki. Matkad štatan administrativižes Madison-keskushesai om 124 km päivlaskmha. Lähembaine toine järed lidn om Čikago 150 km suvhe.

Klimat om ven kontinentaline. Voden keskmäine lämuz om +9,6 C°, kezakun-sügüz'kun +18,3..+22,9 C°, tal'vkun-uhokun −1,4..−4,4 C°. Ekstremumad oma −32 C° (viluku i uhoku) i +41 C° (heinku). Kezaaigan minimum om +1 C° (kezaku), tal'vaigan maksimum om +22 C° (uhoku). Paneb sadegid 878 mm vodes, enamba sulakus-eloku (86..111 mm kus), vähemba tal'vkus-uhokus (43..48 mm kus). Paneb lunt 124 sm tal'ves.

Vn 2010 AÜV:oiden rahvahanlugemižen mödhe lidnan eläjiden lugu oli 592 025 ristitud. Kaik 594 511 eläjad oli lidnas vl 2018. Kaikiš suremb ristitišt oli 741 324 eläjad vl 1960. Vspäi 2000 lidnan eläjiden lugu om stabiline. Läz kaht millionad ristituid elädas lidnaglomeracijas (33nz' surtte valdkundas).

Augotižlibundan mödhe (2010): afrikalaižed — 40,0 %, evropalaižed (ispanijalaižita) — 37,0 %, ispanijalaižed i latinoamerikalaižed — 17,3 %, azijalaižed — 3,5 %, toiženke augotižlibundanke — 2,2 %.

Edeline lidnan pämez' (mer) om Tom Barrett (sulaku 2004 — tal'vku 2021).

Avtobusad i tramvain jono (vspäi 2018) oma kundaližeks transportaks lidnas. Avtobusad ühtenzoittas ezilidnoidenke da suridenke lidnoidenke. Om raudteühtenzoitust Čikagonke.

Rahvahidenkeskeine civiline Miluoki Mitčell-lendimport (MKE / KMKE, 5,4 mln passažiroid vl 2022) sijadase ühesas kilometras suvhe lidnan keskusespäi. Tehtas reisid AÜV:oiden äjihe surihe lidnoihe, om sezonreisid Kankun-lebutahoze. Toine lendimport Lourens Timmermanan nimed (MWC / KMWC) om regionaline, sijadase kahesas kilometras lodeheze lidnan keskuzpalaspäi.

• Lidnan oficialine sait (city.milwaukee.gov). (angl.)
• Lidnümbrikon oficialine sait (milwaukee.gov). (angl.)