Dal'negorsk

Se om lidn randan alištusenke, Dal'negorskan lidnümbrikon (edel 1998. vot — rajonan) administrativine keskuz.

Dal'negorsk
Дальнегорск

Lidnanznam
Valdkund	Venäma
Eläjiden lugu (2021)	33,030 ristitud
Pind	31 km²
Pämez'	Aleksandr Terebilov (heinku 2019—)
Telefonkod	+7−42 373-xx-xxx
Aigvö	UTC+10 (MSK+7)

Eländpunktan aluz om pandud vl 1897 kuti Tetühe-külä samha äimetalližid kivendoid, nimitihe jogen mödhe (kit.: 野猪河 ječžuhe «mecsigoiden jogi»). Vspäi 1930 oli radnikžiloks. Vl 1972 udesnimitihe Tetühe-radnikžilod nügüdläižikš. Vl 1989 Dal'negorsk sai lidnan statusad.

Dal'negorsk šingotase kaivuztegimištol, sadas nenid substancijoid: tin, cink, hahktin, borühtnendad.

Lidn sijadase 35 kilometras Japonijan meren randaspäi, Sihote-Alin'-mägisisteman päivnouzmaižil pautkil, 180..804 m ü.m.t. korktusil, 200 m keskmäižel korktusel. Dal'negorsk om läz 25 km pitte i kaks'..koume kilometrad levette, seižub pidust' Rudnai-jogen randoid (ven.: Рудная, lankteb merhe). Jogen alangišt om kaid i ümbärtud sambnuziden vulkanoiden pautkil. Matkad Vladivostokhasai om 340 km suvipäivlaskmha orhal vai 490 km avtotedme (05H-100). Lähembaižed järedad eländpunktad oma lidnanvuitte Kavalerovo-žilo 68 km suvipäivlaskmha avtotedme i Arsen'jev-lidn 187 km päivlaskmha orhal vai 255 km sil-žo avtotel.

Klimat om ven mussonine, vilu Mererandaline joksend valatoitab sidä. Tahond om Edahaižen Pohjoižen arvoimižihe tazostadud. Voden keskmäine lämuz om +4,3 C°, kezakun-sügüz'kun +14,8..+19,4 C°, tal'vkun-uhokun −10..−12,8 C°. Tal'v om lumekaz, keza om neps pil'vesekaz.

Kaik nell' žilod i koume küläd mülüdas lidnümbrikho Dal'negorskan ližaks.

Edeline lidnan da lidnümbrikon pämez' om Igor' Sahuta (kül'mku 2013 — 2018).

Vn 2010 Venäman rahvahanlugemižen mödhe lidnan eläjiden lugu oli 37 519 ristitud, ümbrikon ristitišton nell' videndest, vn 2021 — 33 803 ristitud. Kaik 35 034 eläjad oli lidnas vl 2017. Kaikiš suremb lidnan ristitišt oli 50 400 eläjad vl 1992.

Ortodoksižen hristanuskondan kaks' pühäpertid om saudud lidnas: phh. Borisan i Gleban puine jumalanpert' (om letud vll 1996−1998), ph. Jurgii-vägestusenkandajan pühäpert'.

Dal'negorskan industrialiž-tehnologine kolledž om lidnan professionaližen opendusen aluzkundaks, mugažo Vladivostokan bazižen medicinižen kolledžan filial.

•  
  Lidnan ühthine nägu Televizionnai-mägespäi (uhoku 2018)
•  
  Himine edheotand vl 2001
•  
  Kodielon holitišiden keskuz (2002)
•  
  Lendimport vl 2018

• Lidnümbrikon tobmuden aluzkundoiden oficialine sait (dalnegorsk-mo.ru). (ven.)