علم حدیث

علم حدیث اس علم کو کہتے ہیں جس کے تحت پیغمبر اسلام حضرت محمد صلی اللہ علیہ والہ وسلم کے فرامین کو محفوظ کیا گیا اور ان فرامین کی صحت کے بارے فیصلہ کیا جاتا ہے۔

راوی

وہ شخص جو سند کے ساتھ حدیث کو نقل کرے۔

طالبُ الحدیث

وہ مبتدی جو روایت، درایت ،شرح اور فقہ کے اعتبار سے حدیث پڑھنے میں مشغول ہو۔

مُحَدِّث

وہ شخص جو علم حدیث میں روایۃ درایۃ مشغول ہوااور کثیر روایات اور ان کے راویوں کے حالات پر مطلع ہو۔

حافظُ الحدیث

وہ محدث جو ایک لاکھ احادیث کی اسانید ومتون کا عالم ہو۔

حُجَّت فی الحدیث

وہ محدث جسے تین لاکھ حدیثیں اسانید ومتون کے ساتھ یاد ہوں۔

حاکِم فی الحدیث

وہ محدث جسے جملہ احادیث مرویہ اسانید ومتون کے ساتھ یاد ہوں اور وہ راویوں کے حالات سے پوری طرح واقف ہو۔

صحیح

حدیث کی وہ کتاب جس میں صرف احادیثِ صحیحہ ذکر کرنے کا التزام کیا گیا ہوجیسے: صحیح بخاری ومسلم۔

سُنَن

حدیث کی وہ کتاب جس میں ابوابِ فقہ کی ترتیب پر فقط احادیث ِاحکام جمع کی گئی ہوں جیسے سنن ابوداود و نسائی۔

جامِع

حدیث کی وہ کتاب جس میں آٹھ عنوانات کے تحت احادیث لائی جائیں۔ وہ آٹھ عنوانات یہ ہیں: سیر، آداب، تفسیر،عقائد، فتن، احکام، اشراط، مناقب۔

مُسْنَد

حدیث کہ وہ کتاب جس میں ہر صحابی کی مرویات الگ الگ جمع کی جائیں جیسے مسند امام احمد۔

مُعْجَم

حدیث کی وہ کتاب جس میں اسمائے شیوخ کی ترتیب سے احادیث لائی جائیں، جیسے معجم طبرانی ومعجم کبیر،صغیرواوسط۔

مُسْتَخْرَج

وہ کتاب جس میں حدیث کی کسی دوسری کتاب کی احادیث کے اثبات کے لیے دیگر اسانید سے وہی احادیث جمع کی جائیں، اس میں دوسرے مصنف کی اسانید پہلے سے مختلف ہوتی ہیں۔ مثلاََ کوئی مئولف صحیح بُخارییاصحیح مُسلمکی احادیث اپنی اسانید سے بیان کرے، لیکن ان کی اسناد مختلف ہوں۔ اور اس امکان کے ساتھ کے یہ مئولف بخاری یا مسلم کے استاذ یا اس سے اوپر کسی بھی کڑی میں جاملے، بغیر یہ دیکھے کہ الفاظِ حدیث متفق ہیں یا مختلف، لیکن اس بات کا لحاظ رکھا جائے کہ مصنف اصل محدث کی سند میں بہت دور نہ چلا جائے، الا یہ کہ بہت اہم فائدہ مقصود ہو۔ مستخرج سے روایت کرتے ہوئے اصل کتاب کا حوالہ نہیں دیا جاتا، بلکہ مستخرج کا حوالہ دیا جائے گا۔ اس حوالے سے کافی کتابیں تصنیف کی گئی ہیں جن میں اہم مثال ابو نعیم کی مستخرج علی الصیحین۔ہے۔

مُسْتَدْرَک

وہ کتاب جس میں کسی حدیث کی کتاب پر ایسی حدیثوں کو زائدکیاجائے جو اس کتاب میں قابل ذکر ہونے کے باوجود مذکور نہ ہوں جیسے حاکم کی مستدرک علی الصحیحین۔

جُزو

وہ چھوٹی کتاب جس میں صرف ایک موضوع کے متعلق احادیث جمع کی گئی ہوں۔

اَمَالِی

وہ کتاب جس میں شیخ کے املا کرائے ہوئے فوائد ونکاتِ حدیث جمع ہوں۔

مُفْرَد

وہ کتاب جس میں ایک شخص کی احادیث جمع ہوں جیسے ابراہیم بن عسکری کی مسند ابوہریرہ۔

مُرْسَل

وہ کتاب جس میں مرسل حدیثیں جمع کی گئی ہوں جیسے ابوداود کی مراسیل۔