ᱵᱟᱦᱟ ᱯᱚᱨᱚᱵᱽ ᱫᱚ ᱦᱚᱲ ᱦᱚᱯᱚᱱᱟᱜ ᱫᱚᱥᱟᱨ ᱢᱟᱨᱟᱝ ᱯᱚᱨᱚᱵᱽ ᱠᱟᱱᱟ ᱾ ᱯᱷᱟᱹᱜᱩᱱ ᱵᱚᱸᱜᱟ ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱦᱤᱞᱚᱜ ᱠᱷᱚᱱ ᱱᱤᱭᱟᱹ ᱯᱚᱨᱚᱵᱽ ᱫᱚ ᱦᱩᱭᱩᱜᱼᱟ ᱾
ᱡᱟᱦᱮᱨ ᱛᱷᱟᱱ ᱨᱮ ᱵᱟᱦᱟ ᱵᱚᱸᱜᱟ ᱫᱚ ᱦᱩᱭᱩᱜᱼᱟ; ᱵᱟᱦᱟ ᱯᱚᱨᱚᱵᱽ ᱨᱮᱱᱟᱜ ᱫᱤᱱ ᱫᱚ ᱦᱩᱭᱩᱜ ᱠᱟᱱᱟ ᱯᱷᱟᱹᱜᱩᱱ ᱵᱚᱸᱜᱟ ᱨᱮᱭᱟᱜ ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱦᱤᱞᱚᱜ ᱵᱟᱦᱟ ᱯᱚᱨᱚᱵᱽ ᱫᱚ ᱯᱮ ᱫᱤᱱ ᱦᱩᱭᱩᱜᱼᱟ ᱾ ᱯᱟᱹᱦᱤᱞ ᱫᱤᱱ ᱫᱚᱠᱚ ᱢᱮᱛᱟᱜᱼᱟ ᱩᱢ ᱢᱟᱦᱟ, ᱫᱚᱥᱟᱨ ᱫᱤᱱ ᱫᱚᱠᱚ ᱢᱮᱛᱟᱜᱼᱟ ᱵᱟᱦᱟ ᱥᱟᱹᱨᱫᱤ ᱢᱟᱦᱟᱸ ᱛᱮᱥᱟᱨ ᱢᱟᱦᱟ ᱫᱚ ᱦᱩᱭᱩᱜ ᱠᱟᱱᱟ ᱵᱟᱦᱟ ᱡᱟᱞᱮ ᱾
ᱟᱹᱛᱩ ᱨᱤᱱ ᱱᱟᱭᱠᱮ ᱵᱟᱵᱟ ᱩᱢ ᱢᱟᱦᱟᱸ ᱦᱤᱞᱚᱜ ᱱᱟᱣᱟ ᱠᱤᱪᱨᱤᱪ ᱞᱩᱝᱜᱤ ᱫᱷᱩᱛᱤ ᱦᱚᱨᱚᱜ ᱠᱟᱛᱮᱫ ᱡᱟᱦᱮᱨ ᱛᱷᱟᱱ ᱨᱮᱭ ᱵᱚᱸᱜᱟᱭᱟ ᱾ ᱠᱟᱸᱥᱟ ᱛᱷᱟᱹᱨᱤ ᱛᱮ ᱜᱩᱨᱤᱡ, ᱥᱤᱸᱫᱩᱨ, ᱫᱷᱩᱯ ᱟᱨ ᱥᱨᱤᱡᱚᱱ ᱨᱮᱱᱟᱜ ᱱᱟᱣᱟ ᱵᱟᱦᱟ ᱠᱚ ᱥᱟᱡᱟᱣ ᱠᱟᱛᱮᱫ ᱡᱟᱦᱮᱨ ᱛᱷᱟᱱ ᱨᱮᱭ ᱵᱚᱸᱜᱟᱭᱟ ᱾ ᱵᱚᱸᱜᱟᱭᱟ ᱞᱟᱦᱟ ᱨᱮ ᱜᱩᱨᱤᱡ ᱛᱮ ᱡᱟᱦᱮᱨ ᱛᱷᱟᱱᱮ ᱯᱚᱛᱟᱣ ᱞᱟᱦᱟᱭᱟ ᱾ ᱚᱱᱟ ᱛᱟᱭᱚᱢ ᱵᱚᱸᱜᱟ ᱵᱟᱲᱟ ᱠᱟᱛᱮ ᱟᱹᱛᱩ ᱛᱮᱭ ᱨᱩᱭᱟᱹᱲᱚᱜᱼᱟ ᱾
ᱱᱟᱭᱠᱮ ᱟᱹᱛᱩ ᱨᱮ ᱨᱩᱣᱟᱹᱲ ᱠᱟᱛᱮᱫ ᱠᱚᱲᱟ ᱜᱤᱫᱽᱨᱟᱹ ᱠᱚ ᱥᱮᱸᱫᱽᱨᱟ ᱠᱚ ᱪᱟᱞᱟᱜᱼᱟ ᱾ ᱧᱩᱦᱩᱢ ᱞᱟᱦᱟᱨᱮ ᱥᱮᱸᱫᱽᱨᱟ ᱠᱷᱚᱱ ᱨᱩᱣᱟᱹᱲ ᱠᱟᱛᱮᱫ ᱡᱚᱛᱚ ᱠᱚᱜᱮ ᱱᱟᱭᱠᱮ ᱭᱟᱜ ᱚᱲᱟᱜ ᱠᱚ ᱪᱟᱞᱟᱜᱼᱟ ᱾ ᱟᱫᱚ ᱮᱱᱮᱡ ᱥᱮᱨᱮᱧ ᱮᱦᱚᱵᱼᱮᱱ ᱠᱷᱟᱱ ᱡᱟᱦᱮᱨ ᱮᱨᱟ, ᱢᱟᱨᱟᱝ ᱵᱩᱨᱩ ᱟᱨ ᱯᱟᱨᱜᱟᱱᱟ ᱵᱚᱸᱜᱟ ᱯᱮᱭᱟ ᱠᱚᱲᱟ ᱴᱷᱮᱱ ᱠᱚ ᱨᱩᱢᱩᱜᱼᱟ ᱾ ᱟᱫᱚ ᱡᱟᱦᱮᱨ ᱮᱨᱟ ᱱᱟᱭᱠᱮ ᱴᱷᱮᱱ ᱥᱟᱠᱚᱢ, ᱢᱟᱨᱟᱝ ᱵᱩᱨᱩ ᱟᱜ ᱥᱟᱨ ᱟᱨ ᱯᱟᱨᱜᱟᱱᱟ ᱵᱚᱝᱜᱟ ᱰᱟᱹᱞᱤᱡ ᱟᱨ ᱡᱚᱱᱚᱜᱼᱮ ᱠᱷᱚᱡᱚᱜᱼᱟ ᱾ ᱤᱱᱟᱹ ᱛᱟᱭᱚᱢ ᱡᱚᱛᱚ ᱠᱚᱜᱮ ᱡᱟᱦᱮᱨ ᱴᱟᱺᱰᱤ ᱨᱮᱠᱚ ᱪᱟᱞᱟᱜᱼᱟ ᱾ ᱯᱟᱨᱜᱟᱱᱟ ᱵᱚᱝᱜᱟ ᱡᱚᱜ ᱯᱷᱩᱨᱪᱟᱹᱭᱟ, ᱡᱟᱦᱮᱨ ᱮᱨᱟ ᱜᱮᱡ ᱜᱩᱨᱤᱡᱟᱭ ᱟᱨ ᱢᱟᱨᱟᱝ ᱵᱩᱨᱩ ᱫᱚ ᱟᱜᱼᱥᱟᱨ ᱱᱤᱭᱟᱹᱛᱮ ᱯᱟᱨᱦᱟᱭᱟᱭ ᱾ ᱠᱟᱹᱢᱤ ᱢᱩᱪᱟᱹᱫ ᱠᱟᱛᱮᱫ ᱟᱹᱛᱩ ᱨᱮ ᱨᱩᱣᱟᱹᱲ ᱠᱟᱛᱮᱫ ᱡᱟᱹᱲᱠᱚ ᱞᱟᱹᱭ ᱠᱚᱣᱟ ᱾ ᱱᱟᱭᱠᱮ ᱵᱟᱵᱟ ᱯᱮᱭᱟ ᱵᱚᱸᱜᱟᱭᱟ ᱠᱩᱞᱤ ᱠᱚᱭᱟ ᱱᱤᱭᱟ ᱥᱮᱨᱢᱟ ᱨᱩᱣᱟᱹ ᱦᱟᱥᱩ, ᱫᱟᱜ ᱡᱟᱹᱯᱩᱫ, ᱟᱵᱟᱫᱽ ᱥᱩᱵᱟᱫ ᱪᱮᱫ ᱞᱮᱠᱟ ᱦᱩᱭᱩᱜᱼᱟ ᱾ ᱟᱫᱚ ᱩᱱᱠᱩ ᱚᱱᱟ ᱡᱚᱛᱚ ᱠᱩᱠᱞᱤ ᱨᱮᱭᱟᱜ ᱛᱮᱞᱟᱠᱚ ᱨᱩᱣᱟᱹᱲᱟ ᱟᱨ ᱛᱟᱭᱚᱢ ᱫᱟᱨᱟᱢ ᱪᱮᱫ ᱞᱮᱠᱟ ᱪᱟᱞᱟᱜ ᱦᱩᱭᱩᱜᱼᱟ ᱚᱱᱟ ᱠᱚᱠᱚ ᱞᱟᱹᱭ ᱥᱚᱫᱚᱨᱟ ᱾ ᱤᱱᱟ ᱛᱟᱭᱚᱢ ᱥᱟᱨᱟ ᱧᱤᱫᱟᱹ ᱮᱱᱮᱡ ᱥᱮᱨᱮᱧ ᱞᱮᱛᱟᱲᱚᱜᱼᱟ ᱿
ᱵᱟᱦᱟ ᱥᱮᱨᱮᱧ ᱠᱚ ᱥᱮᱨᱮᱧᱟ ᱱᱚᱝᱠᱟ :
ᱵᱟᱦᱟ ᱵᱚᱸᱜᱟ ᱯᱤᱨᱤᱞ ᱯᱤᱨᱤᱞ
ᱪᱟᱸᱫᱚᱭ ᱢᱩᱞᱩᱜᱼᱮᱱ
ᱵᱟᱦᱟ ᱡᱚᱛᱮ ᱯᱚᱨᱚᱭ ᱯᱚᱨᱚᱭ
ᱫᱤᱥᱚᱢ ᱯᱩᱞᱩᱜᱼᱮᱱ᱾
ᱦᱟᱞᱟᱭ ᱫᱟᱞᱟᱭ ᱵᱟᱦᱟᱭᱮᱱᱟ
ᱥᱟᱹᱨᱤ ᱥᱟᱨᱡᱚᱢ
ᱫᱟᱨᱮ ᱯᱮᱨᱮᱡ ᱜᱮᱞᱮᱭᱮᱱᱟ
ᱠᱷᱚᱫᱮ ᱢᱟᱛᱠᱚᱢ᱿
ᱥᱟᱨᱤ ᱢᱟᱦᱟ
http://www.indiantribalheritage.org/?p=21797%7Ctitle=Slideshow Archived ᱒᱐᱒᱒-᱐᱙-᱑᱑ at the Wayback Machine. - Baha Parab, the Santal Flower Festival "celebrating Man’s Communion with Nature" – West Bengal
This article uses material from the Wikipedia ᱥᱟᱱᱛᱟᱲᱤ article ᱵᱟᱦᱟ ᱯᱚᱨᱚᱵᱽ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.