Добытя Азтецкой империи Испанцями — еден из найважнѣйшых епизодох испанской колонизации Америкы, котрый ся одогравав в роках 1519–1521.
Азтецка империя склала ся в серединѣ XV. стороча. Испанскы конкистадоры под проводом Ернана Кортеса первый раз появили ся в главном городѣ империи Теночтитлану в року 1519, и император Монтезума ІІ. их прияв цѣлком приязно. Теночтитлан быв на островѣ серед озера, а достати ся на него мож было гатями. Азтеци мали силне войско и держали в покорности иншы завоеваны нима народы империи, котры мусѣли платити дань. Ернан Кортес зробив з Монтезумы ІІ. свою марионетку, и так думав подрядити собѣ вшиткых Азтекох, але они наконець повстали и забили свого императора. Далшы императоры, Квитла́вак, пак Квауте́мок, чинили одпор интервентам. Але их силы не стачили на то, обы перемочи войско Кортеса и его споенцьох, в року 1521 Теночтитлан быв завойованый, а империя закончила свою историю.
Ернан Кортес быв испанскый статкарь и урядник на Кубѣ, котру Испанцѣ колонизовали уже десяткы рокы перед тым. На островѣ знали, же на континентѣ мож добыти золото и рабох, зато губернатор Кубы выбавив выправу, на чоло котрой хотѣв поставити Кортеса, з котрым ся мали подѣлити на зыску, але в послѣдну минуту змѣнив свое рѣшѣня, бо стратив ку ньому довѣру. 10. фебруара1519Ернан Кортес вшак, одплыв з Кубы без дозвола. Коли испанскы конкистадоры, ведены Кортесом, высадили ся на невеликый остров прямо при континентѣ, завязали з нима бой мѣстны племена, але были поражены. За одкупне дали Испанцям 20 жен, меджи котрыма была АзтекыняMallinalli Tenépatl (1502–1527), называна ИспанцямиДонья Марина, а по мѣстному Малинче, котра знала испанскый язык и мѣстны языкы и в цѣлой далшой выправѣ служила Кортесови за толмачку и порадницю при догварянях з мѣстныма племенами.
Зысканя споенцьох
21. апрѣля1519Кортес выступив на континент. Не мав доста воякох, жебы перемочи Азтекох, зато споив ся з народами, котры ненавидѣли Азтекох, бо были нима покорены и мусѣли им платити дань. Обѣцяв им, же як сполочныма силами поразять империю, не будуть платити дань Азтекам. Подля вѣровань Азтекох даколи мав прийти их Бог Кецалкоатл, котрый цѣлком правдоподобно достав у них образ бѣлого чоловѣка з бородов. Император бояв ся прияти Кортеса в Теночтитлану, все придумуючи выгварькы и лем посылаючи дары на знак своей приязности.
Принятя в Теночтитлану
Ернан Кортес поступно здобывав собѣ все веце споенцьох змеджи покореных племен империи. Наконець, 8. новембра1519 быв приятый в Теночтитлану зо своима вояками, але увидѣв, же ту ся нашли в окружѣню силного и переважаючого азтецкого войска, и може им грозити повне вынищѣня. Жебы так ся не стало, зробив то, што традично робили Испанцѣ в такых припадах. Монтезума ІІ. (1502–1520), девятый император, быв арештованый и держаный под дозором до самой смерти. Азтеци неодовго в едной потычцѣ забили Испанцьох и так пересвѣдчили ся, же то не суть богы, а лем обычайны люде. Одношѣня меджи нима ставали ся все горшы. Император мусѣв скласти присягу вѣрности испанскому кральови и выступати як марионетка, научаючи Азтекох, жебы ся покоряли Испанцьом. Испанцѣ заставили Азтекох прияти христианство, чому ся противили шаманы. Монтезума ІІ. готовый быв оддати Кортесу вшитко золото, котре мав, и просив го, най иде гет, але Кортесу того было мало: хотѣв мати и золото, котре ся добывать в азтецкых колониях и так мати сталы жерела золота.
Зачаток войны
Испанцѣ против Испанцьох
Тым часом в апрѣлю 1520 губернатор Кубы послав в слѣды непослушного Кортеса другу, моцнѣйшу выправу, на челѣ з Памфилио Нарваесом, з росказом вернути назад Кортеса, живого або мертвого. Кортес лишив в Теночтитлану малу часть свого войска под командов Педро де Алварадо, а з векшов частьов войска рушив бити ся з Памфилио Нарваесом. Кортесови ся подарило Нарваеса невтрализовати, а его офицерох з войском подплатити и обернути на свою сторону.
Повстаня Азтекох
Покля Кортес з основным войском не быв в Теночтитланѣ, там в в серединѣ мая 1520 одбыла ся славность на честь Бога войны Уицилопочтли. Высокочестованы вождѣ, войновы ветераны, судцѣ и иншы ноблесны особы зобрали ся в Великом Храмѣ, спѣвали, танцьовали, без жадного вызброя. Испанскый капитан Алварадо дав росказ заперти выходы з храма и забити вшиткых участникох свята. Як позднѣйше оправдовав ся перед Кортесом, дознав ся, же Азтеци по закончѣню славности плановали атаковати и забити испанскый невеликый числом гарнизон. Тота масакра спровоковала повстаня Азтекох, котры уже и без того ненавидѣли интервентох. Алварадо зо своим гарнизоном, императором Монтезумом ІІ. и его губернаторами закрыли ся в императорскых палатах и были там держаны в обсадѣ понад 20 днѣ. 24. юна1520Кортес вернув ся до Теночтитлану и видѣв, што ся дѣе. Император выйшов на муры и пробовав вызвати повсталых на покорность, але быв од них камѣньованый и по трьох днях умер. На пост пановника рада Азтекох выбрала его братанича Квитла́вака.
Кортес утѣкать з Теночтитлану
Ситуация Испанцьох неодовго стала ся безнадѣйна. Обсаджены в императорскых палатах, без ѣды и воды, мусѣли утѣкати з бойом и великыма стратами. Тото зробили в ночи30. юна1520, котра достала назву исп. "La Noche Triste" (смутна ночь), бо в ночном бою з их тритысячного войска зостала лем третина, а богатство, котре хотѣли зо собов однести, майже вшитко утратили.
Конець империи
Битка при Отумбѣ
Азтеци гонили Испанцьох и хотѣли их скыножити до лабы. Вшиткы конкистадоры и их конѣ были ранены и при послѣдных силах. На сѣверовосточной граници империи, при Отрумбѣ, 14. юла1520 мусѣли прияти послѣдну битку, котру лем чудом выиграли. Зато, же то была уже границя империи, ай же быв при том забитый еден азтецкый вождь, Азтеци лишили недобитых конкистадорох на покою.
Далшы напасти
В септембрѣ 1520 Азтецку империю поразив мор осыпок, котрый лютовав за 70 днѣ и забрав живот многых людей, меджи нима и десятого императора Квитла́вака. Во фебруарѣ 1521 еденадцятым и послѣдным императором ся ставать Квауте́мок, братанець Монтезумы ІІ.. Неодовго ся вертать Ернан Кортес, тот раз з великов военсков силов, котра пришла од испанского краля, и въедно зо своима давныма споенцями зачинать занимати азтецкы провинции едну за другов, де силов, а де дипломациев, аж наконець в руках Азтекох зоставать лем главный город Теночтитлан.
Обсѣданя и пад Теночтитлана
28. апрѣля1521 на воду озера были спущены бригантины, перенесены з океана, и одтеперь Кортес достав приступ ку Теночтитлану не лем по гатях. Гатѣ были заблокованы и зачало ся обсѣданя города. 13. августа1521 оборонцѣ города поддали ся, а император Квауте́мок быв заятый при пробѣ утѣкнути на каное.
Азтецка империя была розбита, на ей мѣстѣ появила ся испанска колония Нова Испания, котра екзистовала далшы 300 рокы, а в сучасности е то Мексико. Ей главным городом быв Мексико Сити, котрый выбудовали на руинах Теночтитлану.
Интересны факты
Донья Марина мала од Кортеса сына Мартина, метиса, она и ей сын ся поважують зачинателями Мексицкого народа.
В роках 1545–1550 од мора, занесеного з Европы, выгынули 15 млн Азтекох.
Жерела и одказы
Diaz B., 1963, The Conquest of New Spain, London: Penguin Books, ISBN 0140441239.
León-Portilla, Miguel (Ed.) (1992) [1959]. The Broken Spears: The Aztec Account of the Conquest of Mexico. Ángel María Garibay K. (Nahuatl-Spanish trans.), Lysander Kemp (Spanish-English trans.), Alberto Beltran (illus.) (Expanded and updated ed.). Boston: Beacon Press. ISBN 0-8070-5501-8.
Бородатова А. А.: Ацтеки. //Народы и религии мира: Энциклопедия / Гл. ред. В. А. Тишков, Редкол.: О. Ю. Артемова, С. А. Арутюнов, А. Н. Кожановский и др. — М.: Большая Российская энциклопедия, 1999. - 928 с: ил. ISBN 5-85270-155-6 Сс. 67–68.
This article uses material from the Wikipedia Русиньскый article Добытя Азтецкой империи Испанцями, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.