Азтецка Империя

Азтекскы городы-державы были положены в плодной долинѣ зоз плохов 6500 км² на широкой горской высочинѣ, де теперь лежить главный город Мексика. Долина надморской вышкы 2300 м и е зо всѣх бокох обступлена горами вулканичной природы, сягаючыма до вышкы 5000 м. В добѣ азтецкой империи в серединѣ долины была група звязаных озер з найвекшым з них озером Тешкоко.

Азтеци были бойовый и смѣлый народ и свою владу росширили на сосѣдны племена од Атлантичного до Тихого океана. Держава представляла собов конфедерацию. По смерти або онеспособлѣню императора, нового выберала старшинска рада з четырьох особ высокого рода змеджи его кровных сородникох. Императору належали законотворны функции, а на помочь му была тайна державна рада. Припадну самоволю и тиранство императора стримовав найвысшый суд, котрый быв цѣлком независимый. Окремы суды были про споры малженскы, войсковы и рабовластництва. Збераня даней на потребы императора и державы было функциев войска.

Азтеци вѣровали в едного бога сотворителя свѣта (Таотл), 13 главных и 200 меншых богох, котры суть ему на помочи. Оборонцьом народа быв страшный бог войны Уицилопочтли, котрому приносили людскы жертвы. Писмо Азтекох было гиероглифичне, мали школы, де ся учили будучы попы главны предметы: математику, астрономию, историю и богословие. Календарь Азтекох мав 18 мѣсяци по 20 днѣ и 5 переступных днѣ. Мали розвите земледѣлство, банництво, выробу судин з глины и дерева. Доднесь захранили ся остатки их скулптур и ритуалных будов.

• Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935.
• Ацтеки. //Энциклопедия «Кругосвет»