آسمان

چِٹی روشنی حقیقت وچ سَت رنگاں دا مرکب ہُندی اے یعݨی لال، کھٹا، پیلا، ہرا، نیلا، کاہی تے جامنی ۔ ایہ اوہی رنگ نیں جو قوس قزح وچ نظر آوندے نیں ۔ جَد ایہ رنگ آپس وچ مل جاندے نیں تاں چٹا رنگ بَݨ جاندا اے ۔

سورج دی روشنی وی ایہناں ای سَت رنگاں اُتے مُشتمل اے ۔ ایہی وجہ اے کہ جَد روشنی شیشے یا صاف پاݨی اُتے پیندی اے تاں انعطاف دی وجہ نال ستو رنگ الگ الگ نظر آوندے نیں ۔

فضا وچ بے شمار ننھے ننھے ذرات ہر وقت موجود رہندے نیں ۔ گرد دے ایہ ذرات کچھ تاں زمین دی ای پیداور ہُندے نیں تے کچھ خلا دے وی ہُندے نیں ۔ جَد سورج دیاں کِرناں ایہناں ذرےآں اُتے پیندیاں نیں تاں نیلے رنگ دیاں شعاعیں ایہناں نال ٹکر کے دوسرے رنگاں دی نِسبت زیادہ تعداد وچ نِکلدیاں نیں ۔ جیہدی وجہ نال آسمان نیلا نظر آوندا اے ۔