ߞߐߣߊߞߙߌ߫

ߊ߬ ߦߋ߫ ߖߌ߬ߣߍ߬ ߞߊ߲ߓߍ߲ ߠߊ߫ ߛߐ߬ߘߐ߲ ߣߌ߫ ߣߊ߲߬ߝߟߏ߬ߦߊ߬ߟߌ ߣߌ߫ ߟߐ߲ߠߌ߲ߦߊ߫ ߕߊ߲ߓߊ߲ ߠߋ߬ ߘߌ߫. ߂߀߁߅ ߟߊ߫ ߸ ߛߏ ߛߌ߰ߓߊ߮ ߕߘߍ߬ ߦߋ߫ ߞߋ߲߬ߥߟߎ߫ ߃ ߣߌ߫ ߝߊ߲ߘߊ߫ ߘߌ߫.

ߞߐߣߊߞߙߌ߫

ߛߏ

ߞߎ߲߬ߠߊ߬ߛߌ߰ ߕߐ߮	Conakry, ߞߐߣߊߞߙߌ߫
ߕߐ߮ ߓߊߖߎ	Conakry, ߞߐߣߊߞߙߌ߫, Kɔnakiri, 𞤑𞤮𞤲𞤢𞥄𞤳𞤭𞤪𞤭
Demonym	Conakrienne, Conakrien, ߞߐߣߊߞߙߌߞߊ
ߖߡߊ߬ߣߊ߫	ߖߌ߬ߣߍ߫
ߖߡߊ߬ߣߊ߫ ߞߎߓߋߘߊ	ߖߌ߬ߣߍ߫, People's Revolutionary Republic of Guinea, ߞߐߣߊߞߙߌ߫ ߕߌ߲߬ߞߎߘߎ߲
ߕߌ߲߬ߞߎߘߎ߲	ߞߐߣߊߞߙߌ߫ ߕߌ߲߬ߞߎߘߎ߲
ߕߌ߲߬ߞߎߘߎ߲ ߕߎ߬ߡߊ߬ߙߋ߲	ߜ߭ߑߙߌ߲ߥߌߗ ߕߎ߬ߡߊ ߕߍߡߊߞߊ߲ߞߋ
ߖߌߡߊߦߙߐ	ߟߌ߲ߓߊ߲߫ ߡߊ߲ߞߊ߲
ߘߎ߰ߡߊ߬ߛߓߍ ߛߌ߰ߝߏ߲
ߝߌ߬ߟߊ߬ߣߍ߲߬ߢߐ߲߮	ߝߙߌߕߊ߲߫ߏ, ߞߑߟߍߝ߭ߍ߬ߟߊ߲ߘ, ߘߊ߬ߞߊ߯ߙߌ߫
ߓߐߕߏ߲ߢߐ߲߮ ߠߎ߬	ߞߌ߲߬ߘߌߦߊ߫ ߕߌ߲߬ߞߎߘߎ߲߫, ߘߎ߬ߓߙߋߞߊ߬
ߖߡߊ߬ߣߊ߫ ߞߊ߲	ߝߊ߬ߙߊ߲߬ߛߌ߬ ߞߊ߲, ߞߊ߲ ߛߓߍ ߣߌ ߟߎ

ߦߙߐ

 

 

ߞߐߣߊߞߙߌ߫ ߦߋ߫ ߖߌ߬ߣߍ߬ ߥߙߏ߬ߘߎ߯ߕߟߋ߬ߓߋ߬ ߝߊ߲ ߠߋ߫ ߝߍ߬ ߸ ߞߐ߰ߖߌ߬ߘߊ ߟߊߞߢߊߣߍ߲߫ ߣߌ߫ ߓߊߖߌ߫ ߡߌߛߍ߲ ߛߌߦߊߡߊ߲߫ ߠߋ߬ ߝߣߊ߫ ߦߴߊ߬ ߟߊߡߌߣߌ߲ ߘߐ߫ . ߞߊߟߎߡߎ߫ ߦߴߊ߬ ߞߐ߰ߘߎ߯ߕߟߋ߬ߓߐ ߘߐ߫ ߸ ߕߏ߲ߓߏ߫ ߕߌ߲ ߦߴߊ߬ ߥߙߏ߬ߘߎ߯ߕߟߋ߬ߓߐ ߘߐ߫.

ߞߐߣߊߞߙߌ߫ ߓߊ߲ߘߊ ߦߋ߫ ߕߙߊߞߌߘߌ߲߫ ߓߊ߲ߘߊ ߟߋ߬ ߘߌ߫ ߸ ߞߏߟߌ߲ߞߏ߬ߟߌ߲ ߣߌ߫ ߞߏ߲ߞߏߘߌ߬ߓߌ ߕߍߟߊ ߦߋ߫ ߕߟߋ߬ߡߊ߬ ߥߊ߯ߕߌ ߟߋ߬ ߘߌ߫ ߸ ߘߓߊ߬ߓߌߟߊ ߦߋ߫ ߓߍ߲߬ ߠߊ߫ ߛߡߊ߬ߖߌ߬ ߥߊ߯ߕߌ ߟߋ߫ ߡߊ߬.

 

 

 

 

ߞߐߣߊߞߙߌ߫ ߦߋ߫ ߞߣߍ ߡߍ߲ ߞߊ߲߬ ߓߌ߬߸ ߏ߬ ߕߘߍ߬ ߦߋ߫ ߘߎߓߙߋߞߊ߫ ߝߊ߰ߡߊ߬ߟߊ ߟߊ߫ ߡߊ߬ߙߊ ߟߋ߬ ߞߣߐ߫. ߊ߬ ߕߌ߲߬ߞߎߘߎ߲ ߛߌ߰ߓߊ߮ ߟߎ߬ ߕߘߍ߬ ߓߜ߭ߊ ߟߎ߫ ߟߋ߬ ߘߌ߫ ߡߍ߲ ߠߎ߫ ߞߊ߬ ߛߏ߬ߛߏ ߟߎ߫ ߖߌ߬ߦߊ߬ ߞߊ߬ ߓߍ߲߬ ߊ߬ߟߎ߬ ߟߊ߫ ߝߎ߲ߘߌ ߡߊ߬ ߞߊ߬ ߓߐ߫ ߡߊ߲߬ߘߋ߲߫ ߁߂߃߆ ߟߊ߫. ߞߐߣߊߞߙߌ߫ ߕߘߍ߬ ߘߊ߲߬ߣߍ߲߫ ߕߏ߲ߓߏ߫ ߕߌ߲ ߡߌߛߍ߲ ߠߋ߬ ߘߐߙߐ߲߫ ߡߊ߬ ߊ߬ ߕߎ߬ߡߊ߬ ߖߏߣߊ ߏ߬ ߟߊ߫ ߸ ߓߊ߬ߙߌ߬ ߞߐߝߍ߬ ߊ߬ ߣߊ߬ ߘߊ߫ ߦߙߌߥߊ߫ ߞߊߟߎߡߎ߫ ߕߌ߲ߡߎߣߎ߲ ߟߊߡߌߣߌ߲ ߓߍ߯ ߟߊ߫ ߸ ߞߎߘߍ߫ ߃߆ ߘߎ߰ߞߟߏ ߖߊ߲߬ߧߊ ߘߐ߫ ߊ߬ ߣߌ߫ ߞߎߘߍ߫ ߆ ߞߊ߲߬ߞߊ߲ ߘߐ߫. ߊ߲߬ߜ߭ߌߟߋ߬ ߥߙߎߣߍߦߟߊ ߟߊ߫ ߣߊ߬ߟߌ ߞߐ߫ ߁߈߈߅ ߟߊ߫ ߸ ߊ߬ߟߎ߫ ߞߊ߬ ߞߐߣߊߞߙߌ߫ ߕߌ߲ ߠߊ߫ ߕߊ߬ߡߌ߲߬ ߝߊ߬ߙߊ߲߬ߛߌ߫ ߡߊ߬ ߁߈߈߇ ߟߊ߫ ߸ ߕߎ߬ߡߊ ߏ߬ ߟߊ߫ ߞߐߣߊߞߙߌ߫ ߕߌ߲ ߛߌ߰ߓߊ߮ ߡߎ߰ߡߍ߫ ߕߘߍ߬ ߡߊ߫ ߡߐ߰ ߅߀߀ ߓߐ߫. ߁߉߀߄ ߟߊ߫ ߸ ߞߐߣߊߞߙߌ߫ ߞߍ߫ ߘߊ߫ ߝߊ߬ߙߊ߲߬ߛߌ߫ ߖߌ߬ߣߍ߬ ߞߎߓߋߘߊ ߘߌ߫ ߊ߬ ߣߌ߫ ߝߣߊ߫ ߊ߬ ߞߍ߫ ߘߊ߫ ߖߎ߬ߟߊ߬ߦߊ߬ ߛߏ߫ ߕߣߐ߬ߡߊߓߊ߫ ߘߌ߫ ߞߊ߬ ߓߍ߲߬ ߘߊ߲ߞߊ߲ ߣߌ߫ ߣߍ߰ߛߌߟߊ ߡߊ߬ ߡߍ߲ ߕߘߍ߬ ߥߊߣߍ߲߫ ߤߊ߲߯ ߞߊ߲ߞߊ߲߫. ߖߌ߬ߣߍ߬ ߞߊ߲ߓߍ߲ ߠߊ߫ ߡߦߊ ߕߊ߭ ߞߐ߫ ߁߉߅߈ ߠߊ߫ ߸ ߞߐߣߊߞߙߌ߫ ߡߌ߬ߙߌ߲߬ߘߌ ߦߙߌߥߊ߫ ߘߊ߫ ߞߏߛߓߍ߫ ߸ ߞߊ߬ ߓߐ߫ ߡߐ߰ ߅߀߀߀߀ ߘߐ߫ ߞߊ߬ ߦߟߍ߬ߡߊ߲߬ ߡߐ߰ ߆߀߀߀߀߀ ߘߐ߫ ߁߉߈߀ ߕߍ߫ ߟߊ߫ ߘߐ߫ ߸ ߊ߬ ߓߌ߬ ߝߐߟߌ߫ ߘߐ߫ ߸ ߊ߬ ߦߋ߫ ߗߋ߲߬ߥߟߎ߫ ߛߓߊ߬ ߣߌ߫ ߝߊ߲ߘߊ߫ ߟߋ߬ ߘߌ߫. ߁߉߇߀ ߟߊ߫.

ߞߐߣߊߞߙߌ߫ ߦߋ߫ ߛߏ߫ ߞߙߍߞߙߍߣߍ߲ ߠߋ߬ ߘߌ߫ ߡߍ߲ ߦߋ߫ ߡߙߊ߬ߓߊ߰ߘߊ߫ ߞߎ߲߬ߠߊ߬ߛߌ߮ ߟߊ߫ ߡߊ߬ߙߊ ߞߣߐ߫. ߁߉߉߁ ߟߊ߫ ߞߐߣߊߞߙߌ߫ ߞߊ߬ߝߏ߬ߓߊ ߓߏߟߏ߲ߓߐ߫ ߘߊ߫ ߞߊ߬ߝߏ߬ߓߏ߬ߟߏ߲߬ ߟߏ߯ߟߎ߫ ߘߌ߫ ߡߍ߲ ߠߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߞߎ߲߬ߠߊߛߌ߰ߣߍ߲߫ ߛߏߕߌ߮ ߟߎ߫ ߓߟߏ߫. ߏ߬ ߟߎ߬ ߝߟߍ߫ ߘߎ߰ߟߊ߫ ߣߌ߲߬ :

• ߞߊߟߎߡߎ߫ ߸ ߏ߬ ߡߍ߲ ߦߋ߫ ߛߏ ߕߊ߲ߓߊ߲ ߘߌ߫
• ߘߞߌ߬ߛߌߣߌ߫ ߸ ߞߐߣߊߞߙߌ߫ ߖߊ߯ߓߘߊ ߣߌ߫ ߟߊ߬ߛߌ߰ߘߊ ߛߌߦߊߡߊ߲߫ ߡߊߞߍ߫ ߦߙߐ
• ߙߊ߬ߕߏߡߊ߬
• ߡߊ߯ߕߊߡ

• ߡߊ߬ߕߏߕߏ߫ ߸ ߞߐߣߊߞߙߌ߫ ߡߊ߲߬ߕߏ߲߬ߕߍ߬ ߛߊ߲ߡߊߘߊ߲߫ ߊߤߊߡߍߘ ߛߋߞߎ߬ ߕߎ߬ߙߋ ߦߋ߫ ߦߋ߲߬ ߠߋ߬ . ߞߊ߬ߝߏ߬ߓߏ߬ߟߏ߲߬ ߟߏ߯ߟߎ߫ ߢߌ߲߬ ߠߎ߬ ߟߊߘߍ߬ߣߍ߲߫ ߠߋ߬ ߦߋ߫ ߞߐߣߊߞߙߌ߫ ߕߌ߲߬ߞߎߘߎ߲ ߘߌ߫ ߡߍ߲ ߦߋ߫ ߞߎ߲߬ߠߊߛߌ߰ߟߊ߫ ߞߋߟߋ߲߫ ߠߊ߫ ߡߊ߬ߙߊ ߞߣߐ߫.

ߛߌ߰ߓߊ߰ߓߙߍ߬ߟߐ߲

ߞߐߣߊߞߙߌ߫ ߛߏ ߛߌ߰ߓߊ߮ ߦߋ߫ ߖߘߌ߫ ߓߟߏ ߟߋ߬ ߡߊ߫ ߛߊ߲߬-ߊ-ߛߊ߲߫. ߁߉߅߈ ߠߊ߫ ،ߊ߬ ߛߌ߰ߓߊ߮ ߖߊ߬ߕߋ ߕߘߍ߬ ߡߐ߰ ߅߀ ߀߀߀ ߸ ߁߉߈߀ ߠߊ߫ ، ߡߐ߰ ߆߀߀ ߀߀߀ ߸ ߁߉߈߃ ߟߊ߫ ،ߡߐ߰ ߇߀߅ ߃߀߀ ߸ ߁߉߉߆ ߟߊ߫ ، ߁ ߀߉߂ ߉߃߆ ߸ ߂߀߀߈ ߠߊ߫ ، ߡߐ߰ ߁ ߈߅߇ ߁߅߃ ߸ ߂߀߀߉ ߟߊ߫ ، ߡߐ߰ ߂ ߁߆߀ ߀߀߀. ߖߊ߬ߕߋ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߛߊ߲߬ ߁߂ ߞߎ߲߬ߕߊ߮ ߞߘߐ߫ ߞߐߣߊߞߙߌ߫ ߛߌ߰ߓߊ߮ ߖߘߌ߫ ߘߊ߫ %߄.߅߂ ߟߋ߬ ߟߊ߫ ߛߊ߲߬-ߏ-ߛߊ߲߬. ߞߐߣߊߞߙߌ߫ ߦߋ߫ ߛߏ߬ߛߏ߬ ߖߡߊߣߊ ߟߋ߬ ߘߌ߫ ߡߍ߲ ߠߎ߫ ߓߊ߯ߙߊ ߦߋ߫ ߡߐ߲ߠߌ߲ ߘߌ߫ ߊ߬ ߣߌ߫ ߖߎ߬ߟߊ߬ߦߊ. ߞߟߍ߬ߕߌ߮ ߟߊ߲߬ߛߣߊ߫ ߞߐ߲ߕߍ߫ ߟߊ߫ ߛߋߓߊ߯ߦߊ ߕߊ߭ ߞߐ߫ ߸ ߝߎߟߊ ߟߎ߬ ߞߊ߬ ߛߏߞߎߘߊ߫ ߜߙߋ߬ߡߊߕߍ߰ ߞߐߣߊߞߙߌ߫ ߛߎߘߊ ߟߊ߫ ߦߏ߫ ߤߊߡߑߘߊߟߊߦߌ߫ ، ߓߊ߲ߓߋߕߏ߬ ، ߞߏߖ߭ߊ߬ ߸ ߊ߬ ߘߏ߫ ߟߎ߫ ߝߣߊ߫ ߛߌ߰ߣߍ߲߫ ߡߊ߬ߕߏߕߏ߫ ߊ߬ ߣߌ߫ ߘߞߌ߬ߛߌߣߌ߫. ߊ߬ߟߎ߫ ߝߊ߲߬ߓߊ ߦߋ߫ ߖߎ߬ߟߊ߬ߦߊ ߟߋ߬ ߟߊ߫.

ߞߊ߲߫ ߞߎ߲ߓߊ߫ ߛߊ߬ߓߊ߫ ߟߋ߬ ߝߐ߫ ߟߊ߫ ߞߐߣߊߞߙߌ߫: ߛߏ߬ߛߏ߬ߞߊ߲ ߸ ߡߊ߬ߣߌ߲߬ߞߊ߬ߞߊ߲ ߊ߬ ߣߌ߫ ߝߎߟߊߞߊ߲.

ߖߊ߯ߓߘߊ߫ ߡߎ߬ߥߊ߲߫ ߣߌ߫ ߞߐ߬ߣߐ߲߬ߘߐ߬ ߣߌ߫ ߞߊ߬ߙߊ߲ ߛߊ߯ߘߊ߫ ߛߓߊߣߊ߲ ߣߌ߫ ߝߌߟߊߣߊ߲ ߣߌ߫ ߝߟߐߡߊ ߛߌߦߊߡߊ߲߫ ߠߋ߬ ߞߐߣߊߞߙߌ߫. ߏ߬ ߟߎ߬ ߘߊ߲ߘߐ߫ ߝߟߍ߫ ߘߎ߰ߟߊ߫ ߣߌ߲߬ :

• ߞߐߣߊߞߙߌ߫ ߜ߭ߊ߬ߡߊߟ ߊߓߑߘߍߟ ߣߊߛߍߙߌ߫ ߖߊ߯ߓߘߊ
• ߞߟߍ߬ߕߌ߮ ߟߊ߲߬ߛߣߊ߫ ߞߐ߲ߕߍ߫ ߖߊ߯ߓߘߊ
• ߖߌ߬ߣߍ߬ ߖߊ߯ߓߘߊ߫ ߞߏ߬ߝߌ߫ ߊ߲ߣߊߣ
• ߞߐߣߊߞߙߌ߫ ߣߐ߲ߜ߭ߐ߫ ߖߊ߯ߓߘߊ
• ߊߡߊߘߎ߫ ߖߍ߲ߜ߭ߌ߫ ߖߊ߯ߓߘߊ
• ߓߊߙߊߞ ߏߓߊߡߊ߫ ߖߊ߯ߓߘߊ
• ߊߝ߭ߌߛߍߣ ߖߊ߯ߓߘߊ
• ߛ߭ߍߞ ߡߏߘߌߓߐ߬ ߖߙߊ߬ ߡߊ߲߬ߕߏ߲߬ߕߍ߬ ߖߊ߯ߓߘߊ
• ߡߍߙߑߞߌߙ ߡߊ߲߬ߕߏ߲߬ߕߍ߬ ߖߊ߯ߓߘߊ
• ߡߊߤߊߕߑߡߊ߬ ߜ߭ߊ߲ߘߌ߫ ߖߊ߯ߓߘߊ
• ߝߊ߬ߡߊ߫ ߤߊߛߊߣ ߝߌߟߊߣߊ߲ ߖߊ߯ߓߘߊ ߊ߬ ߣߌ߫.....

ߕߏ߬ߟߊ߲߬ߕߊ߲߫ ߞߍߙߍ߲ ߛߌߦߊߡߊ߲߫ ߠߋ߬ ߞߐߣߊߞߙߌ߫ ߸ ߏ߬ ߟߎ߬ ߘߏ߫ ߟߋ߬ ߤߙߐߦߊ߫ ߝߊ߬ߘߌ߬ߡߊ߬ߞߟߏ߬ߞߏ ߞߍߙߍ߲ ߘߌ߫ ߸ ߤߊߝߌߦߊ߫ ߕߏ߬ߟߊ߲߬ߕߊ߲ ߞߍߙߍ߲ ߸ ߞߊߟߎߡߎ߫ ߝߊ߬ߘߌ߬ߡߊ߬ߞߟߏ ߘߍ߭.

ߝߊ߬ߘߌ߬ߡߊ߬ߞߟߏ߬ ߦߙߐ߫ ߢߊ߬ߣߍ߲ ߝߊ߲ߓߊ ߦߋ߫ ߞߐߣߊߞߙߌ߫ ߟߋ߬ ߦߏ߫ ߕߎߟߊߝߌ߲ ߂߈ ߕߏ߬ߟߊ߲߬ߕߊ߲߬ߝߏ ߸ ߣߐ߲ߜ߭ߐ߫ ߕߏ߬ߟߊ߲߬ߕߊ߲߬ߝߏ ߊ߬ ߣߌ߫ ߡߑߛߌߦߐ߲ ߕߏ߬ߟߊ߲߬ߕߊ߲߬ߝߏ ߡߍ߲ ߦߋ߫ ߡߐ߰ ߥߊ߯ߞߋߟߋ߲߫ ߦߙߌߥߊ ߖߊ߬ߕߋ ߕߊ߬ ߟߊ߫.

ߞߐߣߊߞߙߌ߫ ߞߍ ߖߌ߬ߣߍ߬ ߞߊ߲ߓߍ߲ ߞߎߓߋߘߊ ߘߌ߫ ߊ߬ ߣߌ߫ ߞߐߣߊߞߙߌ߫ ߘߊ߲ߞߊ߲ ߞߍ ߦߋ߲߬ ߸ ߏ߬ ߟߋ ߣߊ߬ ߊ߬ ߞߍ߫ ߟߊ߫ ߖߡߊ߬ߣߊ ߞߏߕߌ߯ߘߊ ߟߎ߬ ߣߴߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߕߊ߲ߓߊ߲ ߢߊ߲߬ߞߐ߬ߓߊߟߌ ߘߌ߫. ߝߊ߲ߓߏ߲ ߠߎ߬ ߛߌߦߊߡߊ߲߫ ߣߴߊ߬ ߛߏ ߞߣߐ߫ ߦߏ߫ ߞߏߞߊߞߏߟߊ߫ ߸ ߕߏߔߊ߯ߖ߭ ߖߌ߬ߣߍ߫ ߸ ߖߌ߬ߣߍ߬ ߞߓߊߡߎ߮ ߸ ߞߐ߰ߦߊ߫ ߖߌ߫ ߝߊ߲ߓߏ߲ ߸ ߖߊ߬ߡߊ߫ ߛߊ߬ߝߌߣߊ ߝߊ߲ߓߏ߲ ߸ ߕߏߜ߭ߎߣߊ߬ ߝߊ߲ߓߏ߲ ߊ߬ ߣߌ߫.... ߞߊ߬ߦߌ߯ ߂߀߁߆ ߟߊ߫ ߸ ߥߎߟߊߟߊߜߊ߲ߞߎ߲ߠߌ߲߫ ߞߏߟߊߘߍ ߛߌߦߊߡߊ߲߫ ߠߎ߫ ߘߊߦߟߍ߬ ߘߊ߫ ߞߐߣߊߞߙߌ߫߸ ߏ߬ ߘߏ߫ ߟߎ߫ ߟߋ߬ ߍߡߑߕߌߍߟ ߘߌ߫ ، ߏߙߊ߲ߖ߭ ، ߍ߲ߕߍߙߑߛߍߟ ، ߛߏߕߍߟߑߖߌ߫ ߣߌ߫ ߛߍߟߑߞߐߡ.

ߜߍߓߏ߲ ߠߎ߬ ߛߌߦߊߡߊ߲߫ ߦߋ߫ ߞߣߍ ߞߊ߲߬ ߦߏ߫ ߛߌ߬ߟߊ߬ߡߊ߬ߦߊ ߜߍߓߏ߲ ߸ ߋߞߏߓߊ߲ߞ ߸ ߓߌߛߌߖߌ߫ ߊ߬ ߣߌ߫....

ߝߙߎߕߎ ߟߎ߬

 

• ߡߌ߬ߙߌ߲߬ߘߌ ߟߊ߫ ߞߎߓߋ ߸ ߏ߬ ߡߍ߲ ߟߐ߬ ߘߊ߫ ߁߉߆߇ ߟߊ߫ ߛ߭ߌߣߌߞߊ ߟߎ߬ ߓߟߏ߫. ߓߘߍ߬ߓߘߍ߬ߟߌ߬ ߜߙߊ ߣߌ߫ ߢߣߊߕߍ߮ ߦߋ߫ ߞߍ߫ ߟߴߊ߬ ߝߏ ߞߣߐ߫ ߛߐ߲߬. ߥߛߊ߬ߘߋ߲ ߠߎ߬ ߟߊ߫ ߝߊ߬ߛߏ߬ ߜߙߊ ߕߊ߲ߓߊ߲ ߠߋ߬ ߝߣߊ߫.

• ߡߊ߲߬ߕߏ߲ ߠߎ߬ ߟߊ߫ ߞߎߓߋ ߸ ߏ߬ ߡߍ߲ ߟߐ߬ ߘߊ߫ ߁߉߇߈ ߟߊ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ߬ߟߌ ߘߍ߭ ߟߊ߫ ߜߊ߬ߙߊ ߛߌ߲߬ߝߏ߲߬ߧߊ߬ ߞߊ߲ ߡߊ߬ ߞߐߣߊߞߙߌ߫. ߛߋߞߎ߬ ߕߎ߬ߙߋ߬ ߟߊ߫ ߛߏߡߊߦߟߍߡߊ߲ ߞߐ߫ ߸ ߁߉߉߆ ߟߊ߫ ، ߣߊ߲߬ߕߌ߰ ߡߙߎߕߌߣߍ߲ ߘߏ߫ ߟߎ߫ ߞߊ߬ ߝߏߘߏ߲ ߛߊߙߌ߫ ߊ߬ ߞߊ߲߬ ߞߵߊ߬ ߘߐߕߌߢߍ߫ ߗߌߙߏ߲߫. ߂߀߁߃ ߟߊ߫ ߸ ߡߊ߬ߙߐߞߎ߫ ߡߊ߲߬ߛߊ߬ߞߍ ߡߎ߬ߤߊߡߍߘ ߅ ߞߴߊ߬ ߟߐ߬ߡߊ߬ߛߊߦߌ߫ ߸ ߏ߬ ߞߣߐߡߊ߬ ߸ ߞߊ߲ߕߌ߮ ߊߟߌߝߊ߫ ߞߐ߲ߘߍ߫ ߞߊ߬ ߞߎߓߋ ߕߐ߯ߟߊ߫ ߡߊ߬ߙߐߞߎ߫ ߝߊ߰ߡߊ ߟߊ߫.

• ߞߐߣߊߞߙߌ߫ ߡߌ߬ߛߙߌ߬ߓߊ ߸ ߁߉߈߂ ߟߊ߫ ߸ ߛߎ߰ߘߎ߬ߟߊ߫ ߝߊ߰ߡߊ ߝߤߊߘߌ߬ ߞߴߏ߬ ߣߊ߲߬ߝߟߏ߬ߦߊ߫ ߸ ߊ߬ ߦߋ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߡߌ߬ߛߙߌ߬ߓߊ ߟߎ߬ ߘߐ߫ ߓߏ߲߬ߓߊ ߘߏ߫ ߟߋ߬ ߘߌ߫.

• ߖߌ߬ߣߍ߬ ߗߍߓߏ߲ ߝߊ߬ߛߊ߬ߟߊ߬ߞߊ ߸ ߏ߬ ߟߐ߬ ߘߊ߫ ߁߉߆߀ ߟߊ߫ ߸ ߊ߬ ߘߐߞߍߣߍ߲߫ ߕߏ߲ߓߏ߲ߞߊߒߞߋ ߣߌ߫ ߛߌߦߊߟߐ߲ߘߐ ߝߋ߲߫ ߓߐߣߍ߲ߢߐ߲߰ߡߊ ߟߎ߫ ߟߋ߬ ߟߊ߫.

• ߞߐߣߊߞߙߌ߫ ߝߍߘߍ߲ߝߋ߲ߟߏ ߸ ߏ߬ ߟߊߞߊ߬ ߘߊ߫ ߁߈߉߄ ߟߋ߬ ߟߊ߫ ߞߐߣߊߞߙߌ߫.
• ߛߍ߲ߕ ߡߊ߬ߙߌ߫ ߓߊ߬ߕߏ߬ߓߊ߬ߘߊ ߸ ߊ߬ ߟߐ߬ ߘߊ߫ ߁߉߂߈ ߟߊ߫ ߸ ߊ߬ ߦߋ߫ ߕߎ߬ߡߏ߬ߙߌ߬ߜߡߍ ߡߊߞߍߘߊ ߟߋ߬ ߘߌ߫.

ߘߊ߲ߘߊߛߏ ߟߎ߬

• ߘߐ߲ߞߊ߬ ߘߊ߲ߘߊߛߏ
• ߌߢߊߛ ߘߌ߯ߣߌ߫ ߘߊ߲ߘߊߛߏ

• ߖߌ߬ߣߍ߬ ߣߌ߫ ߛ߭ߌ߯ߣߌ߬ ߕߋߙߌߦߊ߫ ߘߊ߲ߘߊߛߏ

• ߊ߲ߓߙߎߥߊ߯ߖ߭ ߔߊߙߋ߫ ߜߋ߲߬ߘߐ߬ߘߊ߲ߘߊߛߏ

ߖߌ߬ߦߊ߬ߛߏ ߟߎ߬

• ߕߊߥߎߦߊ߫ ߙߌ߬ߝ߭ߋߙߊ߬ ߖߌ߬ߦߊ߬ߓߏ߲

• ߛߊ߲ߘߊߙߑߝ߭ߊߟߌߦߊ߫ ߛߌ߰ߦߙߐ

• ߞߡߊ߬ߦߍߣߌ߫ ߖߌ߬ߦߊ߬ߓߏ߲

• ߡߊߙߌߦߊߘߐߙ ߔߊߟߊߛߌ߫ ߖߌ߬ߦߊ߬ߓߏ߲

• ߞߐߣߊߞߙߌ߫ ߣߎ߯ߡߎ߫ ߖߌ߬ߦߊ߬ߓߏ߲

• ߛ߭ߋߙߊߕߐ߲߫ ߖߌ߬ߦߊ߬ߓߏ߲

• ߞߐߣߊߞߙߌ߫ ߏߣߏߡߏ߫ ߖߌ߬ߦߊ߬ߓߏ߲ ߊ߬ ߣߌ߫....

ߟߐ߯ߝߍ ߟߎ߬

• ߡߊ߬ߘߌߣߊ߬ ߟߐ߯ߝߍ

• ߣߌߖ߭ߍߙ ߟߐ߯ߝߍ

• ߘߊ߬ߓߏ߲߬ߘߌ ߟߐ߯ߝߍ ߊ߬ ߣߌ߫.....