She Still Comes Around

She Still Comes Around (To Love What's Left of Me) er eit studioalbum av Jerry Lee Lewis. Det kom ut på Smash Records i 1969.

Meldingar
Karakter
Kjelde	Karakter
Allmusic
Rolling Stone	(positive)

Etter Lewis forlet Sun Records for Smash i 1963 hadde han hatt nokre mindre hittar, og var ikkje nøgd med korleis selskapet tok i mot innspelingane hans. Men dette endra seg med den overraskande suksessen til Another Place, Another Time og She Still Comes Around (To Love What's Left Of Me) som gav ny interesse i rock and roll-legenda.

She Still Comes Around følgjer same opplegget som Another Place, Another Time gjorde året før: «pur» country framført utan noko fiksfakseri med dei beste studiomusikarane i Nashville. Lewis tolka songar med stor autensitet. Albumet var produsert av Jerry Kennedy og bestod av ei blanding av honky-tonk og tåre-i-ølet-balladar, som tittelsporet til Glenn Sutton. Denne songen vart gjeven ut på singel og nådde andreplassen på countrylista. Oppfølgjaren til denne singelen var «To Make Love Sweeter For You», som toppa listene i 1969 (den første førsteplassen hans sidan «Great Balls Of Fire» i 1958). Brått var Jerry Lee Lewis ein av dei heitaste countryartistane som var å finne. Albumet inneheldt òg Merle Haggard-songen «Today I Started Loving You Again», i tillegg til fleire countrystandardar, som «Release Me» og klagesongen «There Stands the Glass.» «Out Of My Mind» var skriven av Kenny Lovelace, som spelte gitar med Lewis i mange år. Albumet inneheld òg ei innspeling av Sun-singelen «Let's Talk About Us» frå 1959.

She Still Comes Around nådde 12. plassen på Billboard si countryliste. AllMusic kalla det «eit reint countryalbum, laga for seine kveldar og røykfylte barar, og er nesten like bra som Another Place, med songar av like høg kvalitet og framføring.» Sjølv plateomslaget - eit bilete av ein nedslått Lewis i eit slite hotellrom, vart trekt fram for å bringe liv til tittelsporet.