Henrik J. Lisæth: Norsk politikar

mars">11. mars 1933) er ein norsk forretningsmann og politikar frå Bergen. Han var stortingsrepresentant i tida 1966-73 for partiet Høgre og ordførar i Bergen 1986–87.

Far hans var seljar. Sjølv utdanna Lisæth seg til siviløkonom ved Norges Handelshøyskole i 1960. Dei neste åra var han fyrst tilsett i firma Johan C. Martens Co., sidan i eit reklamebyrå og til sist var han salssjef i grossisten B. Friele & Sønner. I 1965 var Lisæth ei kort tid formann i Unge Høgre. Same hausten fekk han jobb som statssekretær i Samferdsledepartementet. Då stortingsrepresentanten Edvard Hambro i 1966 fekk stillinga som norsk FN-ambassadør, rykka Lisæth opp frå varamannsplass til fast plass i stortinget. Resten av tingbolken var han sekretær i Forsvarskomiteen. Tingperioden 1969-73 representerte han Bergen og Høgre på stortinget, då medlem i Finanskomitéen.

Lisæth var medlem 1964-67 i bystyret for Bergen. Frå 1980 til 1991 engasjerte han seg i styringa av Hordaland fylke og Bergen kommune. Valbolken 1980-83 var han medlem i fylkestinget. Deretter sat han i bystyret i åtte år, fyrst som varaordførar 1984–85 og så ordførar 1986–87.

Etter åra på Stortinget arbeidde Lisæth som avdelingsdirektør og seinare regiondirektør i Storebrand. Han avslutta arbeidslivet 1990–2000 som administrerande direktør ved Chr. Michelsens Institutt.

Lisæth var styreleiar 1990–98 i Folketrygdfondet. Formann i representantskapa i selskapa NERA og Vital Forsikring. 2001–04 var han nestleiar i Kreftforeningen.