Merek: Gambara ma töi ni'oguna'ö niha sangokhögö perusahaan tobali tandra ni'oniagö khöra

Gambara ni'oniagö andrö itaria göi latötöi logo. Ena'ö tola la'oniagö ia ha khö zokhö ya'ia, moguna lafasura'ö döi merek andrö ba gödo wamareta sangohalöŵögöigö fefu zi fakhai ba merek waniaga. Na no lafasura'ö merek andrö ba tebai la'oguna'ö sa'ae niha bö'ö merek andrö, irege i'anema'o oroma khöda hadia perusahaan na ta'ila logo ma töinia. Börö da'ö göi lö faehu-faehu gambara ma logonia ba simanö göi döinia.

Merek facebook duma-dumania ya'ia hurufo f nisura faoma hurufo safusi side-ide nifasui la'a-la'a sobalau (faigi gambara ba nga'örö andre). Simanö göi töi facebook no tobali merek perusahaan andre ba tebai la'oguna'ö niha bö'ö döi andre, irege na tarongo facebook, i'anema'ö ta'ila wa ya'ia andrö no Facebook, sambua perusahaan nifasindro Mark Zuckerberg.

Iada'a moguna sibai khö sambua perusahaan ma organisasi wa so khönia merek. Haniha zanöndra merek si faudu, tola alio tedou organisasi ma perusahaan andrö, börö me alio tehöngö ia ba alio la'ila niha haniha ia. Merek sambö faudu, ba lö alio muzawili ia, irege tola la'olifugö ia niha. Andrö wa itaria lafabö'öni merek si no so khöra organisasi ma perusahaan ba lahalö merek salio tehöngö.

Duma-dumania da'a merek Coca-Cola. Heŵa'ae so nibadu bö'ö si fakhili raso khönia, bahiza börö merek Coca-Cola abölö lafili niha wamadu idanö Coca-Cola moroi ba nidanö bö'ö. Simanö göi merek bö'ö simane Starbucks. Heŵa'ae oya lafo kofi tanö bö'ö, bahiza na la'ila niha merek Starbucks abölö aolo ira we'amöi ba da'ö wamadu kofi moroi ba nahia bö'ö.

•  
  Logo facebook. Gofu heza oroma logo andre ta'ila wa facebook ia
•  
  Merek Coca-Cola. Gofu heza oroma logo andre ta'ila wa Coca-Cola ia
•  
  Merek IndoMie. Gofu heza oroma logo andre ta'ila wa IndoMie ia