Kaschuubsche Spraak

Kaschuubsch (ook Kaschubsch schräven, kaschuubsch: kaszëbsczi, poolsch kaszubski), ook (Slaawsch) Pommersch (kaschuubsch: pòmòrsczi, poolsch pomorski) nöömt, is ’n westslaawsche Spraak in Noordpolen. Se ward in’n Danziger Ruum snackt. In öllere Tieden snacken se ähr ook in Vörpommern, ehr dat dat Plattdüütsche in dat Rebeed begäng worrn is. Poolschspräkers kœnt de Spraak nich good verstahn. Liekers staht se as lechietsche Spraak mit dat Sleessche un dat nu utstorvene Polaabsche dat Poolsche tonehgst. Dat Slovinzische, dat in’t 20. Jahrhunnert utstorv, ward vun ’n Barg Minschen as ’n kaschuubsche Dialektgrupp ankäken, vun annere Minschen as ’n egenstänne Spraak.

Dat Kaschuubsche harr lang enge Kuntakten mit dat Plattdüütsche. In Pommern snacken vääl Kaschuben ook plattdüütsch. Dat Kaschuubsche hett ’n groten Barg plattdüütsche Lehnwöörd’ annahmen un harr up de pommerschen Dialekten vun’t Plattdüütsche ook ’n besünner Inwarken. In verlädene Tieden dään se in Polen so, as weer dat Kaschuubsche ’n poolsche Dialektgrupp, man nu laat se’t as egenstännige Regionaalspraak gellen.