အဗြီုကေုာံဗၟုဲ ဂွံပံၚ်တုဲ

       ယွံကောန်စဴကောန်ကၟိန်တအ် အပါဇၞော်ဏအ် အာယုက်လေဝ်ဇၞော်သော်လေဝ်ဗု ၚေက်ပြဟ်စၞာံကှ် မတ်သပါကၠုၚ်ရ၊ သၞာံအခါခြာဟွံလအ်ရ- အပါဇၞော် ဒးစဴဍုၚ်ပလိုတ်ရ၊အခိၚ်ရအပါဇၞော်စဴဍုၚ်ပလိုတ်မ္ဂး ဂွိၚ်ဖေက်ကောန်စဴကောန်ကၟိန်တအ် ဒးဒုၚ်ထ္ပက်ကၠာ် ဂွိၚ်ဖေက်ပါ်ပဲါဗ္စာရဏာဟွံလေပ် ဂွိၚ်ဖေက်ထကးပြး ဂွိၚ်ဖေက်ဟွံပံၚ်ဖက်ညးသ္ကအ်တုဲ အပါဇၞော်လဴထ္ၜးကဵုပုံအာဂီုမွဲရ။         ပ္ဍဲကာလကၠာကၠာတေံ နွံကွာန်သၟတ်မွဲရ၊ ကွာန်သၟတ်ဂှ် သ္ပဟိုတ်နူမညောန်ကြပ်ကဵုဂြိုပ်ဇၞော်ကီု သ္ပဟိုတ်နူမဒှ်ကွာန်ဗုဒ္ဓဘာသာကီုတုဲ ဇၟာပ်မၞိဟ်ဂမၠိုၚ် နွံကဵုစိုတ်စရိုတ်လ္ဂူတပ်တးအိုတ်ရ၊ ဇၟာပ်မၞိဟ်ဂမၠိုၚ် ဖေက်ပါပ်ဂွပါပ်လေပ်အိုတ်ရ။ပ္ဍဲကွာန်သၟတ်ဂှ်ဝွံ ဝုတ်ဇၞော်နွံမှ ဗၠာဲဇၞော်နွံမွဲရ၊ ညးတအ်ညးၜါ ဓမ္မတာကောန်ကွာန်ဂြိုပ်ဟီုတှ်ေ နွံသဘဴပွမဖေက်ဂွစလေပ်ရ၊ ညးတအ်ညးၜါ ဟိုတ်နူဟွံလေပ်လိက်ကီု ဟိုတ်နူဟွံကေၚ်အာကၠုၚ်လဝ်ဍုၚ်ကွာန်ဌာန်တၞဟ်သ္အာၚ်ကီုဂှ်ရ- အောန်ကဵုသတိပညာ အောန်ကဵုဗဟုသုတရ၊ဇၟာပ်ညးဂမၠိုၚ်မဟီု ပ္တေဟ်စလောဲကွေံရ။        သၟတ်ဝုတ်သၟတ်ဗၠာဲ ကေုာံညးကွာန်ပ္ဍဲကွာန်ဂှ် ထ္ၜးဟိုတ်ဒဒိုက်ဗျုဒဒိုက်ဂိယဲနာနာသာ်တုဲ ပအပ်ထပ်စကဵုတဲဝုတ်ဇၞော်ကေုာံ ဗၠာဲဇၞော်ဂှ်ရ၊ ပ္ဍဲတ္ၚဲမပအပ်ထပ်စကဵုတဲဝုတ်ဇၞော်ကေုာံဗၠာဲဇၞော်တုဲ အခိၚ်သဝ်တ္ၚဲ (ဗ္တံကၠာအိုတ်ဂှ်) သၟတ်ဗၠာဲဍောတ်သွတ်မွဲ စိုပ်ကၠုၚ်သ္ၚိဝုတ်ဇၞော်ဗၠာဲဇၞော်ဂှ်ရ၊သၟတ်ဗၠာဲဂှ်ဝွံ နွံသဘဴမလေပ်ဟီုဗျံက်ဟီုပျေက်လေပ်ရ။           သၟတ်ဗၠာဲဂှ် ကသေဲဟီုတိုန်ကဵုဝုတ်ဇၞော်သာသာ…ရဴဝွံမ္ဂး ယွဲၝဲဇၞော် လဓဳဗၠာဲဇၞော်ဏအ်ဂှ် မၞိဟ်ဍာံဍာံဟွံသေၚ် ဍေံဒှ်မံၚ် "အဗြိုၚ်ဇၞော်" မွဲရ၊ၝဲဇၞော်ဟွံပ္တေဟ်တှ်ေ အခိၚ်ရဍေံတိက်သၠိၚ် မတီမံၚ်တအ် ဟွံဂံၚ်ကေတ်ဍေံရ၊ ဟိုတ်ဂှ်ရ-ဍေံဒှ်အာဗၠာဲဇၞော်ရ၊ ၝဲဇၞော်ဏအ်မွဲရ-ဟွံချပ်ဗ္စာဂၠိၚ်သ္ၚောဲမွဲသာ် ကေတ်ဒးလဝ်အဗြိုၚ်ဇၞော်ဏအ် ဂိုဟ်ဘဝကွေံရ။       မာံသၟတ်ဗၠာဲဂှ် ကသေဲဟီုကဵုဝုတ်ဇၞော်ဂှ်တုဲ ဝုတ်ဇၞော်ဂှ်လေဝ် ပ္တေဟ်အာရ၊ မွဲလှ်ေပၠန် မာံသၟတ်ဗၠာဲဂှ် ကလေၚ်အာကဵုလဓဳဗၠာဲဇၞော်တေံ ကသေဲဟီုသာသာ ရဴဝွံမ္ဂး ယွံကောဇၞော် ကောဇၞော်ဂှ် မုဟွံကၠိုဟ်ခၠၚ်မွဲသာ်ရ၊ မူဟိုတ်ရောဟီုတှ်ေ လၟုဟ်ကောဇၞော်ကေတ်ဒးလဝ်မဂဳဝုတ်ဇၞော်ဏအ်ဂှ် ဂိုဟ်ဘဝကွေံရ၊မဂဳဝုတ်ဇၞော်ဏအ်ဂှ် "ဗၟုဲ ၁၂-ဇုက်" ဇၟာပ်မၞိဟ်တြုံတီမံၚ်တအ် ဟွံဂံၚ်ကေတ်ဍေံရ၊ ဟိုတ်ဂှ်ရ-ဍေံဒှ်အာဝုတ်ဇၞော်ရ၊ကောဇၞော်ဟွံပ္တေဟ်တှ်ေ အခိၚ်ဗ္တံ သ္ပပၞညံၚ်ရဴတိက်သၠိၚ် ဗရုခအဳတိုန် "ဂြဝ် ဂြဝ် ဂြဝ် ဂြဝ် " ညိ၊ ဣဗြဴဗၟုဲၝောံဂှ် ဍေံခယျဂး တိက်သၠိၚ်ကွေံတုဲ ဍေံဂၠက်စကြိုက်ကောဇၞော်ဍာံရ။         ရဴဝွံ မာံသၟတ်ဗၠာဲဂှ် မၞိဟ်မွဲမွဲဗီု ကသေဲဟီုလဝ်သီုကဵုယုတ္တိနွံနွံတုဲ ညးၜါ ဝုတ်ဇၞော်ကဵုဗၠာဲဇၞော် ပ္တေဟ်စဂွံညံၚ်ညံၚ် ပ္တေဟ်စဟွံဂွံညံၚ်ညံၚ် ဒှ်မံၚ်သံသယစိုတ်ရ၊ ကာလစိုပ်အခိၚ်ဗ္တံဂှ် ဝုတ်ဇၞော် မၚ်စၟဳခါတ်မံၚ်အကာဲ အခိၚ်ဗၠာဲဇၞော်တိက်သၠိၚ်ရ၊ဗၠာဲဇၞော်လေဝ် ဂွိၚ်ဖေက်ဗၟုဲၝောံ ဂၠံက်စကြိုက်ဇကုကီုတုဲ တိက်ဟွံသၠိၚ်ရ။      စဵုကဵုအခိၚ်ဗ္တံ ဂၠုဂၠက်တေံ ညးမၚ်ဂွန်အဲ အဲမၚ်ဂွန်ညး ဟွံသၠိၚ်ညးသ္ကအ်ဏီရ၊ ညးၜါဂှ် ဟိုတ်နူမၚ်ဂွန်ညးသ္ကအ်တုဲ ကွိုၚ်ကွုဲကၠုၚ်ရ၊ ဂတးလ္ပာ်တေံမွဲလစုတ် ဂတးလ္ပာ်ဏအ်မွဲလစုတ် ဒှ်မံၚ်ရ၊ ပ္ဍဲကာလဂှ် မဂဳဝုတ်ဇၞော်ဂှ် သၟာန်တိုန်လဓဳ ဗၠာဲဇၞော်ဂှ်မွဲနှေအ်မွဲနှေအ် ဟွံသၠိၚ်ဏီဟာ?          လဓဳဗၠာဲဇၞော်ဂှ်လေဝ် သွက်ဂွံရပ်ဂွံနဇိုၚ်နတဲမာန် လဝ်စိုတ်တုဲ သ္ပတိုန်ပၞညံၚ်ရဴတိက်သၠိၚ် ဗရုခအဳတိုန် "ဂြဝ် ဂြဝ် ဂြဝ် ဂြဝ်" ရ၊ ပ္ဍဲကာလဂှ် မဂဳဝုတ်ဇၞော်ဂှ် ခယျးဂးလဓဳဗၠာဲဇၞော်ဏအ် တိက်သၠိၚ်ကွေံတုဲ မွဲဝါဓဝ် ကၠတ်ဂၠာံစမ်ရံၚ်တၚ်ပုတ်ဗၠာဲဇၞော် ဗ္တနွံ/ဟွံမွဲရ။        "သြယာဲအဲကျာ်ဓဝ်သၚ်" ဟံၚ်ပြာ်ညိ ဟံၚ်ပြာ်ညိ ဗၟုဲၝောံ ဂၠံက်စကြိုတ်အဲ ဗၟုဲၝောံဂၠံက်စကြိုတ်အဲ ဗၟုဲ ၁၂-ဇုက်ဍာံမံၚ် ဍာံမံၚ် ရဴဝွံ ဗၠာဲဇၞော်ဂှ် ကညာၚ်ကရေဲတိုန်ဗွဲမသ္ကာတ်မြဟ်ရ၊ မွဲအခိၚ်ဓဝ် မွဲဒမြိပ်ဓဝ် ဝုတ်ဇၞော်ဂှ်လေဝ် ကညာၚ်ကရေဲတိုန် "သြမိအဲကျာ်ဓဝ်သၚ်" ကၠုၚ်အိုတ်ညိ ကၠုၚ်အိုတ်ညိ အဗြိုၚ်ဇၞော် ဗ္တဍေံနွံမံၚ် ဗ္တဍေံနွံမံၚ်။            ဝုတ်ဇၞော်ကဵုဗၠာဲဇၞော်ဂှ် ညးကညာၚ် အဲကညာၚ် ညးဖေက်အဲ အဲဖေက်ညးတုဲ ဂြိပ်စှ်ေအာတိ ဂၠံၚ်ညးညးအာရ၊ ပ္ဍဲကာလဂှ် ညးပွဳပွူဝုတ်ဒိုဟ်သ္ၚိရေၚ်ကၟေၚ်ဆက်ဇရေၚ်ဂှ် မိၚ်ဒးတုဲ ကောံကၠုၚ်အိုတ်ရ၊ မာံသၟတ်ဗၠာဲညးမခ္ဍက်ခ္ဍာဲလဝ်ဂှ်လေဝ် နွံမံၚ်ဇရေၚ်သ္ၚိဝုတ်ဇၞော်ဗၠာဲဇၞော်ဂှ်ကီုတုဲ ကၠုၚ်စိုပ်ကော်ပကောံနၚ် ဝုတ်ဇၞော်ဗၠာဲဇၞော်ဂှ်ရ။        ပရူဒဒှ်ဟီုဗျံက်ဟီုပျေက်ဝေၚ်ဂှ် လဴထ္ၜးဟီုထ္ၜးကဵုဝုတ်ဇၞော် ဗၠာဲဇၞော်တုဲ ဂြိုၚ်မံၚ်ရူရူအခိၚ်ဗ္တံရ၊ ဗၠာဲဇၞော်ဝုတ်ဇၞော်ဂှ်လေဝ် ကၠိုဟ်ခၠၚ်အာတုဲ ဂွံတိုန်တိတ်လ္တူသ္ၚိ ဂွံပံၚ်အာညးသ္ကအ် ဂွံလွဳပရာအာညးသ္ကအ် စဵုကဵုဗျုရ။        ။                 ✍ယၟုအ္စာကၞေဟ်➲နာဲညးဍုၚ်မန်✍