ဒဒန် တကအ်ခၟိုင်

 

ဒဒန်ဝွံ နာဲလှမောင် ညးမဒှ် ညးစၞးကၠတ်ထဝ်ညးဍုင်ကွာန် (ကၟိန်ဍုင်) နူကဵု ပွိုင်ဍုင်ၜါသွာင် နူဗော်ဒဳမဵုကရေဇြဳအလုံဒေသရးမန် (AMDP) ပတိုန်ထ္ၜး ကုအလဵုအသဳ သမတ ဦးသိန်းစိန် မဒှ်အလဵုအသဳဗော်ပၞာန်ရာံ မကော်ဂး ဗော်ပြည်ခိုင်ဖြိုး တုဲ နကဵု သြန်ဗွဝ်ကၟိန်ဍုင် ကေုာံ သြန်ဗွဝ်တွဵုရးဍုင်မန် ပံင်ပကောံတုဲ ဖျေဟ်လဝ် သြန် သွက်ဂွံသြိုင်ဒဒန်ဝွံရ၊၊ ဒဒန်ဝွံ နူဂိတုဖေဖဝ်ဝါရဳ သၞာံ ၂၀၁၅ ဂှ် စရပ်ကမၠောန် ပရေင်သြိုင်ခၞံရ၊၊

ဒဒန်ဝွံ နူစသြိုင်တေအ်ဂှ် ကဵုလဝ် ယၟု သံလွင်တံတား (ချောင်းဆုံ)ရ၊၊ အလဵုအသဳ အေန်အေဝ်ဒဳ ကလိဂွံအဝဵုတုဲ ကာလဒဒန်ကြပ်တုဲဂှ် ညးတအ် သၠာဲထောအ် နကဵုယၟု ဗိုလ်ချုပ်အောင်ဆန်းတံတား (ဘီလူးကျွန်း)ရ၊၊ စပ်ကဵု ကိစ္စဏအ်တုဲ ညးဒေသဂမၠိုင် ဟွံဒးဂၞပ်တုဲ ဒစဵုဒစးရ၊၊

စပ်ကဵုပရူမသၠာဲထောအ် ယၟုဏအ်ဂှ် ၜိုန်ရ မၞိဟ်မ္ၚးဟွံဂွံတီဏီကီုလေဝ် ဝန်ဇၞော်ဍုင်မန် ဦးမင်းမင်းဦး ဟွံဒးဂၞပ်တုဲ ပတိုန်ထ္ၜး ညံင်ဂွံဆက်ကဵုအာ အတိုင်ယၟု ညးဍုင်ကွာန်တအ် မဒးဂၞပ်စိုတ်ရ၊၊ ဆဂး နူကဵု ဗော်အေန်အေဝ်ဒဳ (ဗဟဵု) ဟွံဒုင်တဲ ဒးကဵု ယၟု ဗိုလ်ချုပ်အောင်ဆန်း ဟေင်ရောင်ဂးတုဲ ဝန်ဇၞော်တွဵုရးဍုင်မန် ဦးမင်းမင်းဦး နုက်တိတ်ထောအ် နူကဵု ဒၞာဲဝန်ဇၞော်ရ၊၊ စပ်ကဵုကိစ္စဏအ်တုဲ ညးတေအ် ဒုင်သှ်ကဵု လိက်ပရိုင် Myanmar Time (မြန်မာတိုင်းမ် နေ့စဉ်သတင်းစာ) ဗီုဏအ်ရ ＂ဟိုတ်ဂွံနုက်တိတ် နူကဵုကဆံင်ဝန်ဇၞော်ဂှ် အဓိကဍေဟ် ဟိုတ်နူယၟုဒဒန်ဂှ်ရ၊၊ စပ်ကဵု ယၟုဒဒန်ဏအ်ဂှ် ဒှ်ဒၟံင်အကာဲအရာ ကိစ္စဇၞော်မွဲရ၊၊ ပ္ဍဲအခိင် မကၠောန်ဒၟံင် သဘင်သဳကၠဳပေန်လုံ ညံင်ဂွံအံင်ဇၞးမာန်ဂှ် တင်ဒုင်စသိုင် ပ္ဍဲကောန်တၟအ် ကောန်ဍုင်အရင်တအ်ဂှ် ဝိုတ်ထောအ် ဟွံဂွံ၊၊ စိုတ်ဓါတ်ပေန်လုံဂှ် စဵုကဵုဂၠံသြိုဟ် ယဝ်ရဟွံလုပ်စိုပ်ဒၟံင်မ္ဂး သွဟ်(ပရေင်ဍုင်ကွာန်) မံက်ဂတဝ်ကၠုင်မာန် ဟွံသေင်ရ၊၊ အရာဏအ်ဂှ် ဒှ်အရာ ကိစ္စဇၞော်ရဏး၊၊ (အဲ)အုပ်ဓုပ်ဒၟံင် တွဵုရးဍုင်မန်၊၊ ပ္ဍဲမဒှ်ဒၟံင် မိမညးဍုင်ကွာန်တအ်ဂှ် တင်ဒုင်စသိုင် ပ္ဍဲကောန်တၟအ် ကောန်ဍုင်အရင်တအ်ဂှ် အဲတီဒၟံင်ဖအိုတ်ရ၊၊ စတမ်နူ ပြသနာဒဒန်ဏအ် ကတဵုဒှ်ကၠုင်တုဲ ကျာ်ဇၞော်အစာဇၞော်ဇၞော်ဂမၠိုင်လေဝ် ဟွံအေင်ဒုင်ဒၟံင်ရ၊၊ ကဆံင်စဵုကဵုဏအ် ကတဵုဒှ်ကၠုင်မာန်ရ၊၊ ယၟုဂှ် ခုတ်ကဵုယၟု ကောန်ဂကူမဆေင်စပ်တအ်ညိ၊၊ အရာတၞဟ်တအ် ဟွံမိက်ရီုတှ်ေ စွံလဝ်ကၠာရ၊၊ စဵုကဵုကဆံင်ဂှ် အကာဲအရာပရေအ်ကၠုင်ဒၟံင်ရ၊၊ ဟိုတ်ဂှ်ရ စပ်ကဵုကိစ္စဏအ် အဲဒတဴလိုင်ပိုတ်ပိုတ်သကုတ်တ်ဂှ်ရ ဣဏအ်ဂှ် အဓိက ပြသနာရ၊၊ ၜိုတ်ဏအ်တှ်ေ သွဟ်ဒေအ်တအ် မိက်ဂွံတီဂှ် ကလိဂွံရ အဲထေင်ကေတ်၊၊＂

ဂိတုမာတ် ၂၊ ၂၀၁၇ဂှ် ညးဒေသ ရဲတကအ်ခၟိုင် ၜိုတ် ၃၀၀၀ ထ္ၜးဆန္ဒရ၊၊ စနူတ္ၚဲဂှ်တုဲ သွက်ဂွံဆက်ဒစဵုဒစးအာ အရာမသၠာဲယၟုဒဒန်ဂှ်တုဲ နူကဵု ညးဍုင်ကွာန်မန် ပွိုင်ဍုင်နာနာ ဒက်ပ္တန်လဝ် ကမ္မတဳမွဲ (သံလွင်တံတား(ချောင်းဆုံ)ဆိုင်ရာ လူထုလှုပ်ရှားမှုကော်မတီ) သီုဖအိုတ် မၞိဟ် ၁၅၀ တၠရ၊၊ အပ္ဍဲဂှ် နာဲမန်ရာဇာ၊ ဒံက်တာအံင်နာင်ဥူ၊ နာဲမေန်မေန်၊ မာံအံင်မန် တအ် ပါလုပ်ကီုရ၊၊ ညးဒစဵုဒစးတအ် စနူဂိတုဨပြဳ ၁၃ ဂှ် စပကောံစၟတ်တဲ ညးမဒစဵုဒစး ယၟုဒဒန်အောင်ဆန်း ပွိုင် (၅)တ္ၚဲဂှ် ကလိဂွံသီုဖအိုတ် ၜိုတ် မွဲပြကောဋိကိုဋ်ဘာ် (၁၂၀၀၀၀၀)ရ၊၊ စၟတ်တဲတအ်ဂှ် ညးတအ် ပလံင်ဗစိုပ် ဇရေင် သမတ ဥူခေန်ကျဝ်၊ ညးမကဵုကသပ်ဍုင် ဒဝ်အံင်သာန်သုကျဳ၊ ဝန်ဇၞော် တွဵုရးဍုင်မန် ကေုာံ ကၠတ်ထဝ်တွဵုရးဍုင်မန်ရ၊၊

ဂိတုမာတ် ၁၄ ပ္ဍဲ ကောံဓရီုကၠတ်ထဝ်ညးဍုင်ကွာန် မရနုက်ကဵု စတုတ္ထ (စတုတ္ထအကြိမ်မြောက် ပြည်သူ့လွှတ်တော် ပုံမှန်အစည်းအဝေး) ဂှ် နူကဵု အမာတ်ဗော်အေန်အေဝ်ဒဳ မိကောန်ဆာန် ညးမဒှ် မၞိဟ်စၞးကၠတ်ထဝ် ပွိုင်ဍုင်ပံင်ဂှ် ပတိုန်ဂလာန် ဒဒန်မကၠောန်ဒၟံင် အကြာမတ်မလီု ကဵု တကအ်ခၟိုင်ဂှ် ညံင်ဂွံခုတ်ကဵုယၟု ဒဒန် ＂ဗိုလ်ချုပ်အောင်ဆန်းတံတား＂ရ၊၊ စပ်ကဵု ဂလာန်ဂှ်တုဲ မၞိဟ်မလုပ် ပတိုန်ဂလာန် သီုဖအိုတ် ၁၆ တၠ၊ မၞိဟ်လပါ်ဒစဵုဒစး ၃ တၠ ကဵု မၞိဟ်ထံက်ဂလာန် ၁၃ တၠ၊၊ ကာလဖျေဟ်မာဲဂှ် မၞိဟ်မထံက်ဂလာန် ၂၁၈ မာဲ၊ ဒစဵုဒစး ၄၃ မာဲ၊ မၞိဟ်မမံင်လဒေါဝ် ၁၁၆ မာဲတုဲ မာဲလပါ်ဂၠိုင်တုပ်စိုတ်တုဲ ဒှ်အာဒတန်ရ၊၊

ဂိတုမာတ် ၁၉ ဂှ် ညးဍုင်ကွာန် နူဒေသနာနာ ကောန်ဂကူမန် ကေုာံ ဂကူကောန်ဍုင်အရင်ဂမၠိုင် သီုဖအိုတ် မၞိဟ် ပိလက်ပြင် တိတ်ထ္ၜးဆန္ဒ ဒစဵုဒစး မကဵုယၟု ဒဒန်ဂှ် နဒဒှ် ဒဒန်ဗိုလ်ချုပ်အောင်ဆန်း ရ၊၊ ＂အတိုင်ယၟုဂှ် ယဝ်ရ ဒှ်အာဒတန်မ္ဂး ပိုဲကောန်ဍုင်အရင်ဂမၠိုင် ဒးဆက်ထ္ၜးအာ ဆန္ဒဟေင်ရ၊၊ ဗွဲကြဴ ယဝ်ရဒးဆက်ထ္ၜးဆန္ဒမ္ဂး ပိုဲတအ်ကၠုင်ပါလုပ်တွဵုရ၊၊ စောစံတင် ဥက္ကဋ္ဌ ဂကောံလိက်ပတ်ယေန်သၞာင်ကရေင် ပွိုင်ဍုင်သဓီု ဟီုကဵု ပရိုင်ဟင်္သာရ၊၊ ညံင်ရဴသာ်ဂှ်ကီု ကောန်ဂကူပအိုဝ် သိန်းထွန်းလေဝ် ＂ပိုဲဂှ် ညံင်ရဴကောန်ဂကူမန်တအ် မဒုင်စသိုင်ဂှ် ပိုဲလေဝ် ဒးဒုင်စသိုင်ကီုရ၊၊ ဟိုတ်ဂှ်ရ အဲကၠုင်ပံင်တောဲ ပေါဲထ္ၜးဆန္ဒဏအ်၊ နကဵုလညာတ်အဲမ္ဂး ယၟု သံလွင်တံတား(ချောင်းဆုံ) မ္ဂး ဂွံဒၟံင်ရ၊၊

ယၟုဒဒန် သံလွင်(ချောင်းဆုံ)တံတား ဂှ် ပြံင်လှာဲထောအ် နကဵုယၟု ဒဒန် ဗိုလ်ချုပ်အောင်ဆန်းမ္ဂး ဟွံဒှ်ဂုဏ်ဖဵု ကုပရေင်ဆာန်သၟိန် အကြာကောန်ဂကူဂမၠိုင် သၟးဟွံက သီုကဵုပလီုပလာ်ထောအ် ပရေင်ညဳသၟဟ်ကောန်ဂကူဂမၠိုင် အတိုင်သၞောဝ်ဥပဒေသဇိုင် ပိုဒ်ဇၞော် ၆(ခ)ကီုရောင် သီုဖအိုတ် ဗော်ပရေင်ဍုင်ကွာန် ၁၄ ဗော် သီုကဵု ဗော် ပြည်ထောင်စုကြံ့ခိုင်ဖွံ့ဖြိုးရေးပါတီ USDP လလောင်တြးလဝ်ရ၊၊

နကဵုကၠတ်ထဝ်ညးဍုင်ကွာန် (ကၟိန်ဍုင်) မဖျေဟ်ဏာ သ္ဂုတ်သွာတ် ယၟုဒဒန်ဂှ် ကဵုယၟု ဒဒန်ဗိုလ်ချုပ်အောင်ဆန်း၊ ဒဒန်ဂှ်လေဝ် ၜိုန်ရတုဲဒှ်အာတုဲကီုလေဝ် မုက်လိက်ခတဵု ယၟုဒဒန်ဂှ် ဟွံဂွံပတိုန်ဏီဖိုဟ်ရ၊၊ စိုပ်ဂိတုဨပြဳ ၂၆ ဗတံ ၉ နာဍဳဂှ် ကၠတ်ပတိုန်ယၟုဒဒန်ဂှ်ရ၊၊ တ္ၚဲယး ဨပြဳ ၂၇ နူဂယး ၉ နာဍဳကဵု ၄၅ မိနေတ်ဂှ် ကဵုအခေါင် ညးဍုင်ကွာန်တအ် စတတ်ဒဒန်ဂှ် ကၠာအိုတ်ရ၊၊

ဂိတုမေ (၉) ဂှ် ကၠောန်သဘင်ပံက်ဒဒန်ရ၊၊ အလဵုဇကု ဥက္ကဋ္ဌကၠတ်ထဝ်ညးဍုင်ကွာန် ဦးဝင်းမြင့် တိုန်စိုပ်တုဲ ဝန်ဇၞော်နူကဵုတွဵုရး ကေုာံ ရးနာနာတအ်လေဝ် တိုန်စိုပ်ကီုရ၊၊ ＂နကဵုအလဵုအသဳတၟိ ကဝက်သၞာံ လပါ်စဂှ် ဂွံပံက်ဒဒန် နကဵုယၟု ဗိုလ်ချုပ်အောင်ဆန်းဂှ် ကေတ်ဂုဏ်စရာဲကွေဟ်ရ၊၊ ဟိုတ်နူဒဒန်ဏအ်တုဲ ကောန်ဍုင်ကွာန် တကအ်ခၟိုင်တအ် ပရေင်ဘဝ ကေုာံ ပရေင်ပိုန်ဒြပ် ဇၞော်မောဝ်ကၠုင်မာန်ရ၊၊ ဒဒန်ဏအ်ဂှ် ဒှ်ဂုဏ်ဖဵု ဆညးဒေသတအ် သၟးဟွံသေင် ဒှ်ဂုဏ်ဖဵု သွက်ညးအလုံမွဲဍုင်ရ၊၊ မွဲဒၞာဲကဵုမွဲဒၞာဲ ဆက်စၠောအ်အာကၠုင် လောဲသွာမ္ဂး ပရေင်စိုတ်ဓါတ် ကၟိန်ဍုင်လေဝ် ကတဵုဒှ်ကၠုင်မာန်ရ၊၊ နကဵုမပတိုန်စရာဲ ကုဗိုလ်ချုပ်အောင်ဆန်းတုဲ မကဵုယၟုဒဒန်ဏအ်ဂှ် ဒှ်အရာမခိုဟ်ပြဲမွဲရ၊၊＂ မြဴသာ်ဝွံ ဦးဝင်းမြင့် ဟီုပ္ဍဲသဘင်ဂှ်ရ၊၊

＂စပ်ကဵု ပရူမပံက်ဒဒန်ဏအ်ဂှ် နကဵုပိုယ် ပ္ဍဲဗွိုင်သၞောဝ်ဂှ် ပတိုန်ထ္ၜးလဝ်တုဲအိုတ်ရ၊ ၜိုတ်ပိုဲကၠောန်ဂွံဂှ် ကၠောန်ဏာတုဲရ၊၊ အလဵုအသဳဒဳမဝ်ကရေသဳတှ်ေ ညးတအ်ဂှ် ဒှ်မၞိဟ် မဂွံလဝ် အခေါင်ကၠောန်ရ၊၊ ညးတအ် ဟွံကဠင် အရေဝ်ညးဍုင်ကွာန် ဟွံကၠောန်ကဵု အတိုင်ပၟိက် ညးဍုင်ကွာန်ဂှ် လပါ်ညးတအ်ရ၊၊ ညးတအ်မဟီုဒၟံင် ညံင်ကောန်ဂကူဂမၠိုင် ဂွံဆာန်သၟိန်တအ်၊ ညံင်ဂွံဒက်ပ္တန် ကၟိန်ဍုင်ပံင်ကောံဖေဝ်ဒရေဝ်တအ်ဂှ် ကမၠောန်ညးတအ်ဂှ် ဗၠေတ်ဒၟံင်ကဵု လဟီုညးတအ် သီုဖအိုတ်ရ၊၊＂နာဲအံင်မန် နူကဵု ကမ္မတဳမချဳဓရာင် ကိစ္စဒဒန်တကအ်ခၟိုင် ဟီုကဵုပရိုင် The Voice ရ၊၊

နူဌာနပရိုင် 7Day Daily ဆက်သၟာန်နင် ဝန်ဇၞော်တွဵုရးဍုင်မန်တၟိ ဒေါက်တာအေးဇံ နကဵုဖုန် စပ်ကဵု ညးဍုင်ကွာန်တအ် မပါ်ပါဲဒၟံင် လတူယၟု ဂှ်တုဲ ဒေါက်တာအေးဇံ ဟီုဟီုကဵု ပရိုင် 7Day Daily ＂အဲဒါ ဝေဖန်တာ မဟုတ်ဘူး ဗျ၊ အဲဒါ ဖွတာ ဖွတာ၊၊ ဖွတဲ့သူတွေ ဘယ်သူလဲဆိုတာလည်း မသိဘူး မဟုတ်ဘူး၊၊ သိတယ်၊၊＂

＂စပ်ကဵု မကဵုလဝ်ယၟုဒဒန်ဏအ်ဂှ် ပိုဲတအ် ဒစဵုဒစး ထ္ၜးဆန္ဒရ၊၊ ယၟုနူစသြိုင်တေအ် ဖျေဟ်ကိုန်စဳမာန်တေအ် နွံဒၟံင်တုဲတုဲရ၊၊ သွက်ဂွံဒက်ပ္တန် ကၟိန်ဍုင်ပံင်ကောံဖေဝ်ဒရေဝ်ဂှ် အခေါင်မကၠောန် တွဵုရးဂမၠိုင်ဒးကဵုလဝ်ရ၊၊ စပ်ကဵုယၟုဏအ် ဗက်စအလိုက်ပၟိက် ညးဒေသတအ်ညိဂှ် ဂၠိုင်ကဵုအလန် ပ္တိုန်ဟီုကၠုင်လဝ်ကီုရ၊၊ ဆဂး မုလေဝ် ဟွံက္လေင်ဟီု၊ ဒုင်ဆဵုဂဗတအ်ဂှ် ဟွံမဲတုဲ စိုတ်ဟွံခိုဟ်ရ၊၊＂ မြဴသာ်ဝွံ ဒံက်တာအံင်နာင်ဥူ ညးမဒှ် ဒု-ဥက္ကဋ္ဌကၠတ်ထဝ် တွဵုရးဍုင်မန် ဟီုကဵု ပရိုင်ဨရာဝတဳ ပ္ဍဲတ္ၚဲပံက်ဒဒန်ဂှ်ရ၊၊

၁ ဂျောန် ၂၀၂၁ အခိင်နူဂယးဂှ် ကၠောန်သဘင်မ္ၚဵုပတိုန်ယၟုဒဒန် နကဵု ယၟု အတိုင်တြေံ "သံလွင်တံတား (ချောင်းဆုံ) ရ။ ပ္ဍဲသဘင်ဂှ် အလဵုဇကု ဥက္ကဋ္ဌ ကံင်သဳနစက သကိုပ်ဂဥုပ်ဗိုလ်ဇၞော် မင်းအောင်လှိုင်တိုန်စိုပ်တုဲ ပ္ဍဲအခိင် ၜိုတ် ၀၈း၄၅ ဂှ် ညးဍဵုကောန်ဍေင်စက် ပံက်ယၟုဒဒန်ဂှ်ရ။ ပ္ဍဲသဘင်ဂှ် ဒံက်တာဗညာအံင်မဵု ညးမပါလုပ် ဂကောံကံင်သဳနစက နူကဵု ဗော်ညဳသၟဟ်မန်၊ မန်းငြိမ်းမောင် လေဝ်တိုန်ကီုရ။ ညံင်ဂွံသၠာဲကဵု ဗီုဏအ်ဂှ် နကဵု ဒံက်တာဗညာအံင်မဵု ပ္တိုန်ထ္ၜးလဝ် ပ္ဍဲကံင်သဳနစက။