Urang Sakai
Urang Sakai atau suku Sakai adolah kalompok panduduak asali nan iduik taseba di rimbo-rimbo padalaman Riau.
Rami urang Sakai tingga di rimbo-rimbo Bengkalis, Riau. Jumlah urang Sakai kini dipakiroan ado 4.995 jiwa. Agamo asali urang Sakai basipaik anismisme, tamasuak picayo pado antu-antu, jampi-jampi manto, jo upacara tulak bala.
| Urang Sakai |
|---|
| Jumlah populasi |
| 4.995 jiwa |
| Kawasan bapopulasi cukuik banyak |
| Bengkalis, Riau, Indonesia |
| Bahaso |
| Bahaso Sakai, Bahaso Malayu, Bahaso Minangkabau, Bahaso Indonesia |
| Agamo |
| Animisme, Islam, Kristen |
| Kalompok etnik takaik |
| Urang Malayu, Urang Minangkabau, Urang Talang Mamak, Urang Akik, Urang Asli |
Distribusi
Urang Sakai tingga di Bengkalis, Riau. Populasi paliang banyak tingga di Kecamatan Mandau. Sabagian ado nan tingga di Kecamatan Bukit Batu. Saketek dari urang Sakai masih iduik cando zaman saisuak nan iduik bapindah-pindah sarato tapisah dari kalompok-kalompok lain. Umumnyo urang Sakai tingga indak jauah dari mato aia sarupo rawo, payau, atau tapian ulu batang aia.
Sijarah
Ado babarapo teori tantang asa mulo urang Sakai. Manuruik Moszkowski (1908) jo Loeb (1935) manyabuik baso urang Sakai adolah hasia pancampuran antaro urang Wedoid jo urang Minangkabau nan kudian mandirikan karajaan pado abaik ka-14. Namun, karajaan ko runtuah dek disarang Kasultanan Aceh inggo akhianyo panduduak malarikan diri ka rimbo-rimbo Batang Gasib, Rokan, Siak, jo anak-anal sungainyo. Teori barikuiknyo nan diiyoan dek urang Sakai adolah asa muasanyo dari urang Mentawai nan dibaok dek Pagaruyuang katiko manaruko rimbo di daerah nan kini disabuik Mandau. Rombongan nan manaruko ko disabuik jo Pabatinan Limo (Perbatinan Lima) jo Pabatinan Salapan (Perbatinan Delapan).
Sistem kakarabatan
Urang Sakai dalam iduik badunsanak manggabuangkan sistem matrilineal jo parental (prinsip katurunan manuruik garih urang tuo). Hal iko mampangaruahi caro urang Sakai maimbau urang dalam kalompoknyo. Ciri parental tampak pado pabedaan caro maimbau urang manuruik generasinyo. Samantaro dalam ciri matrilineal, ado pabedaan dalam maimbau urang nan batalian darah jo mandehnyo. Misalnyo ado panyapoan sudaro laki-laki tatuo dari mandeh nan disabuik pak kuneng (Minangkabau: mamak), sadangkan sudaro laki-laki tatuo dari ayah disabuik bah tuwo (Minangkabau: pak uwo).
Rujuakan
Bahan Bacaan
- Suparlan, Parsudi (1995). Orang Sakai di Riau: masyarakat terasing dalam masyarakat Indonesia. Jakarta: Yayasan Obor Indonesia. ISBN 9794612154. https://books.google.co.id/books?id=XENTG7l7O6IC&printsec=frontcover&dq=orang+sakai+di+riau&hl=id&sa=X&ved=0ahUKEwiizLnDu6DnAhWPxTgGHRqbAKUQ6AEIKTAA.
This article uses material from the Wikipedia Minangkabau article Urang Sakai, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.